韓式燜牛肋條 + 煎韭菜餃 (外賣) ( 14-JUL-2023 )

( 14-JUL-2023  FRI )

尋晚去咗 2 次廁所   但感恩係起身嘅時候都精神   唔通自己真係咁鍾意番工 ?!   哈哈哈哈   不過番工都真係好㗎   依家天氣咁熱一定要開冷氣   番工就有免費冷氣嘆   仲有好多飲品同餅乾供應   又可以吹下水   講到唔似番工咁添   哈哈 ~

早餐食朱古力瑞士卷   我覺得剪到細細粒咁細都好方便 ~   

菇場唔忙   感恩今朝終於無作嘔作悶   反胃嘅感覺   呢星期真係成日咁㗎   搞到我連水都唔想飲   我估因為之前食消炎藥關係   因為以前唔會咁嘛 ~

喺 Pantry 見到溫總飲盒凍檸檬茶   真係百年一遇   所以忍唔住話真係未見過妳飲凍嘢   但其實佢都係用熱水沖下個盒   再灘下先飲   佢話好多年前飲凍嘢   一飲就係咁咳   所以都好多年無飲凍嘢   不過我話其實唔飲凍都好嘅   女人仲更加要咁呢 ~

Lunch Time 出去行陣   諗住去萬寧買 M 巾   因為尋日見到買 2 送 1   點知今日無呀   嗚嗚嗚嗚 ~

咁買埋牛腩河就番菇場   條街真係熱到不得可了 ~

阿齋話以為我碗係羅宋湯   因為橙橙紅紅

仍然唔忙   又係傾計到放工 ~

放工即番屋企   今晚只係蒸熱同煲飯   超級簡單 ~

是日晚餐 - 韓式燜牛肋條 + 煎韭菜餃 (外賣)

韓式燜牛肋條 - 之前買咗包牛肋條   都擺到就嚟過期   所以拿拿聲煮埋去啦   只係用牛肉醬醃再加韓國辣椒醬   不過我覺得唔夠辣   如果唔係更加好味 ~

煎韭菜餃 (外賣) - 想食多啲蔬菜   咁就買煎韭菜餃喇   蘸醋食真係好正 ~

洗埋碗就開機洗衫   之後沖涼休息 ~

同里奧大人一齊睇 "驚天營救"   感覺都係有啲血腥   睇睇下都瞓着 ~

最後都係 10 點半瞓覺   里奧大人以為我唔舒服添呀   我話呢兩晚瞓得麻麻   想早啲瞓 ~