辣汁焗雞翼 + 蒜蓉炒菜心苗 + 煎薑汁年糕 ( 15-FEB-2024 )

( 15-FEB-2024  THU )

感恩一覺瞓天光呀   但瞓極都咁攰咁   之後諗起可能每月一到呀   等佢快啲走就繼續做運動   咁樣個人會精神啲 ~

煲完薑茶就整早餐   搞掂就快快去沖涼喇 ~

早餐食牛角酥   係好味   但真係要好間唔中先食呢 ~

菇場唔忙啦   做下自己嘢又派下利是   不過又無通知話今日有開年飯同放早   我估都應該無喇 ~

最開心係收到開工利是同老闆利是

但 Lunch Time 無人出去   咁我都唔出去啦   個個你不動我不動咁   之後先話有開年飯食   我見雪櫃有個飯盒㗎喎   咁點解唔早一日通知話有開年飯食呢 ?!

影埋大合照就出去食飯   都差唔多 12 點 15 分   食到 1 點半就番菇場喇 ~

好多時都係船頭負責切開食物

我求其話食羅漢齋伊麵   船頭以為真呀   我話講笑咋   但佢係都要叫   哈哈

船頭記得我鍾意食雞軟骨   估唔到佢咁有記性   哈哈

甜品到咗   但我叫嘅素餃仲未到   之後上枱   溫總話係邊個叫 ?!   我話唔知邊個話叫嘛   唔理啦   妳食啦   妳鍾意食餃   船頭同阿花話我好衰呀   呵呵

抖咗陣又話食燒肉乳豬   但食 1 嚿就算喇   至在同同事吹下水 ~

食完又要企喺老闆房前面影大合照   真係做咩影咁多張呀   頭先酒樓又影咗   唔怪得阿花話今年咩玩法要影咁多相 ~

今日居然無得放早   個個都好唔慣呀   最搞笑阿花話影咩相呀   放我哋走好過啦   哈哈 ~

但以前就算放多我哋新年假   第日食完開年飯就放工㗎喎   家姐同佢啲同事講   仲話我公司咁好添 ~

放工即走   番到屋企都預備晚餐喇   咁啱里奧大人都番到屋企   本來佢同我同時間放工   無啦啦又變咗 6 點放工   因為榴槤話好彩見到里奧大人   但佢話佢好唔好彩見到榴槤   哈哈 ~

是日晚餐 - 辣汁焗雞翼 + 蒜蓉炒菜心苗 + 煎薑汁年糕

辣汁焗雞翼 - 里奧大人話啲雞翼好靚呀   我話賣相靚但其實可能唔好食   佢話我煮嘅賣相靚又好食喎   真係幾識講嘢呀 ~

蒜蓉炒菜心苗 - 淥完再炒   皇太后話咁怪嘅   我話入得落口就得啦   過程唔重要㗎   哈哈 ~

煎薑汁年糕 - 今次好有心機煎啦   算係煎得唔錯㗎喇   第一次食咁多年糕   但真係覺得好好味   我同里奧大人下年會再幫襯呀 ~

洗埋碗就開機洗衫   之後沖涼休息喇 ~

差唔多 9 點就睇 "繁花" 大結局   我同里奧大人都唔太明白點解結局會係咁   哈哈 ~

睇多陣 Youtube   今晚 10 點半都瞓 lu ~