煎釀三寶 + 咖哩魚蛋拚腸粉 (外賣) ( 6-FEB-2024 )

( 6-FEB-2024  TUE )

半夜去完廁所   好難先瞓得番呀   好在今朝係出去食早餐   哈哈 ~

里奧大人又食雞扒蕃茄通粉   我話今次塊雞皮唔脆嘅   之後我話係咪因為上次我鍾意食塊脆雞皮先叫雞扒呀 ?!   佢苦笑話係   不過我話唔緊要啦   我都鍾意食蕃茄通粉

切到一粒粒就方便入口

食完就去里奧大人公司坐陣   9 點幾都出發去婦檢喇 ~

容姐突然比個老婆餅比我   仲話因為星期日見唔到我   所以比唔到我   真係太客氣啦

今次我自己去婦檢   里奧大人問咗我兩次駛唔駛陪我去 ?!   因為佢次次陪我嘛    不過我話真係唔駛陪我呢 ~

Book 咗 10 點   但早到咗未開門   咁我就周圍行陣先 ~

估唔到咁早都有唔少自由行   咁我都有自拍比里奧大人睇   啲人都以為我係自由行   哈哈

10 點開門   但醫生 10 點 35 分先番到   我差唔多 11 點先有得睇   其實算快喇 ~

我話今次係婦檢   醫生話應該 7 月先做喎   我話記得妳叫我半年後嚟咋   仲以為婦檢添 ~

之後話係睇個瘤呀   睇下食藥有無控制到   照完之後   非常之感恩係控制到 ~

醫生話我做手術嘅傷口埋得好靚   我話因為妳做嘛   佢話因為係我啲皮膚靚先會埋得靚   我話真係唔知係咁喎 ~   

醫生話啲組織鬆咗係好好   我話以前經痛要請假好慘   佢話佢都知   所以佢同醫生同姑娘都講   人哋講得痛就好痛   唔會想話無啦啦唔出現   我話個個好似妳咁諗就好啦   之後我話我上司話我病假率高呀   佢即話妳上司係咪男人 ?!   哈哈 ~

睇完就搭小巴去里奧大人公司   最搞笑係 11 點 45 分開始   我 11 點 35 分   擺明嚟到即食咁   哈哈 ~

其實佢哋都整得七七八八   同埋佢哋又唔會比我幫手   我做反而會鬧我㗎 ~

依家叫阿妹全名   我最鍾意咁㗎   但其實我都成日叫里奧大人部門啲同事全名   我話我同表弟妹都係叫全名㗎   我當妳係屋企人咁㗎   哈哈 ~

差唔多 12 點就開始食喇   我勁期待咁多人一齊打邊爐呀 ~ 

開咗 3 張長枱   好似食自助餐咁   哈哈

皮蛋芫茜魚湯底

蓮藕排骨薯仔湯底 ?!

粟米蘿蔔湯底

好似話係醉雞   但我只知道係新鮮雞咋   不過我都無食到呀

魚蛋 / 墨魚丸 / 菜 / 雜菇 / 金菇   我唔記得係咩魚片

蜆

日本蠔

帶子

初初以為係打邊爐食嘅   但原來係用嚟做湯底嘅魚

買咗 3 份牛肉

薯仔同埋唔記得咩豆腐

豆腐

皮蛋

響鈴

蕃茄 + 菜

我食得最多係炸魚皮   因為唔熱   食完即刻可以傾偈   哈哈

細細聲整嘅酸齋

指天椒+蔥花

咁皇上見到牛肉熟   但里奧大人咁啱放咗蠔同帶子   我叫皇上唔好食住啦   頭先放咗生嘢呀   佢話啲水係 100 度唔怕   不過我最後都無睇到佢有無食到添 ~

之後佢同阿妹都話無問題   我話點得㗎   之後我再係咁講講講   我再話里奧大人又係咁囉   點可能食㗎   又生又熟咁   里奧大人係咁笑   我咪順便話埋佢囉   佢之後笑住話佢都無出過聲   鴛鴦都係咁笑住話里奧大人好慘   皇尚又攬住里奧大人話其實佢真係無出過聲    哈哈哈哈 ~

咁啱細細聲又嚟到   我又問佢會點 ?!   佢話佢都唔會食住呀   終於有人同我一樣   但佢哋係都話其實咁無問題   我話等多我一陣   我食完再問其他人   哈哈 ~

今日我都無咩點食嘢   真係傾多過食 ~

始終啲食物落咗個鍋   真係想食哂   所以我叫 Mix 唔好講嘢快啲食   再講嘢就夾哂啲嘢比佢食   之後佢真係即刻食呀   其他同事都話佢第一次咁聽話   我話因為我係長輩呀   呵呵 ~

無啦啦又講起胚胎   因為頭先阿妹講咗豆胚做胚胎   之後忌廉話佢之前喺柬埔寨食過炸猛   之後 佢話細個嘅時候   佢爸爸成日食和味龍   我屈咗佢話細個成日食炸猛   佢哋話呢啲就係以訛傳訛囉   哈哈哈哈 ~

一路食一路傾   食完又一齊傾   真係好開心呀我   之後我發覺全場最多嘢講就係我   其實平時大家如做嘢嘅時候   係會好專注做嘢   係無咩時間傾到計   所以鴛鴦話我今日唔似平時嘅我呀   除咗阿妹   哈哈 ~

差唔多 1 點幾就食完   我都要幫里奧大人做嘢喇 ~

個個以為我食完番屋企   所以見到我都好愕然   我話食飽要幫手做下嘢嘅 ~

阿妹又叫我陪佢去 Pantry   逐樣介紹啲餅乾零食   係咁叫我食   又比啲我   因為全公司應該得佢最為食   我有時問里奧大人啲零食係邊個買 ?!   佢真係每次都答唔知   但阿妹就會講係邊個邊倨買   所以我依家買零食都買埋比佢   大家一齊開心下   哈哈 ~

里奧大人 5 點可以放工   但最後又係 5 點半先走得 ~

我話唔係咁餓   里奧大人即話煎釀三寶再煮麵   但我話食唔落麵噃   食腸粉算啦 ~

食完抖陣就開機洗衫   之後即沖涼休息   今晚好攰咁   所以都唔熨衫住喇 ~

沖完涼發現唔見咗隻十字架耳環呀   里奧大人話其實好易唔見囉   我明明今朝摸都仲有嘅   嗚嗚   我都唔同家姐講住   唔係佢又再買 ~

里奧大人喺 Pantry 開咗樽魚酥丸   我即問佢係咪好餓 ?!   佢話唔係呀   知道我想食   所以特登開   可能頭先我同阿妹講話幾好味咁呀   做咩今日咁在意我嘅   哈哈

阿妹話呢條豬肉乾好好味   所以又拎條比我食

之前喺馬莎買咗兩盒   咁問阿妹鍾意唔鍾食呢款餅 ?!   佢話鍾意   咁我比盒佢啦   之後阿妹同里奧大人講話我哋口味好似   里奧大人即話梗係似啦   兩個都咁為食   有咩唔鍾意食呀 ?!?!   哈哈   佢又講得啱喎   真係無咩話唔鍾意食喎   呵呵

睇多陣 Youtube   10 點 20 分都瞓覺喇   呢排唔會做運動住   因為瞓極唔夠咁   唉 ~