五福臨門 ( 8-FEB-2024 )

里奧大人研究咗好耐   再問我係咩 ?!   佢以為係中藥呀   哈哈哈哈

( 8-FEB-2024  THU )

今朝 7 點醒咗   但好凍唔想做運動呀   之後 7 點 20 分都起身喇 ~

依家第一時間煲薑茶   之後焗麵包   搞掂就刷牙沖涼洗頭   其實唔沖涼洗頭真係慳好多時間   不過我唔習慣   覺得朝早沖涼洗頭精神啲同埋乾淨啲咁 ~

早餐食丹麥條   依家幾鍾意食   一個星期食一次都唔錯 ~

靈修咗一陣就出發番工   呢排都懶咗靈修添 ~

菇場唔忙呀   又做自己嘢 ~

Lunch Time 行咗陣就去食米線   因為好想食豬潤呀 ~

豬潤米線 (重慶三小辣湯底) - 家姐話好辣咁   但我話一啲都唔辣囉

食完就行一田幫糟糟睇果仁禮盒   之後阿妹叫我打比佢   我以為講聽日食咩   原來問我要唔要糕 ?!   佢依家醒喇   直接搵我好過問里奧大人   哈哈 ~

買埋新年禮物比婆婆就去買橙   行下行下又已經 12 點 45 分   係時候番菇場喇 ~

呢盒係青林蘋果撻   婆婆鍾意食 A1 嘅蘋果撻㗎   但當日無時間去 A1   買呢盒頂住先   哈哈 

坐低無耐   家姐打嚟話買 Tee   叫我幫佢揀顏色   我揀米色同墨綠色   佢話佢都係揀米色同黑色   佢問番我點解唔揀黑色 ?!   我話黑色普通啲囉   不過妳鍾意就得啦   之後佢話聽我話買番墨綠色   真搞笑啦   一早買墨綠色咪得囉 ~

仍然唔忙   咁就啱喇   因為要同阿妹傾聽日叫咩食好   點知我拎咗張舊 Menu 番嚟   激死我呀 ~

傾咗半個鐘   但都要問下其他人夠唔夠食   我話請人食一定要人哋食飽啦   唔好令我咁樣衰喎 ~

不過佢係想幫我慳錢   我話加錢轉其他嘢食   佢係都話唔駛   哈哈 ~

諗住收線   佢聽到有人扯蝦   我咪話係阿爽囉   成日扯完蝦就 "dum" 腳   好在今日比阿妹聽到   叫佢講比里奧大人聽呢件真人真事呀   哈哈 ~

放工即走   番到屋企要即預備晚餐   所以叫里奧大人沖涼先   因為今晚起碼 7 點先食得呀 ~

是日晚餐 - 五福臨門

茄汁蝦碌 - 之前買咗包急凍熟鳳尾白蝦   諗住整沙律   但反而無整   所以間唔中要清咁啲蝦   里奧大人話個汁好味呀   其實我都覺得好味㗎   以前唔識整呢啲汁   媽咪同家姐工人又係整得好味   所以我都想自己整到呢 ~      

鮑魚生菜 - 家姐之前比㗎   安記嘅紅燒溏心鮑   個鮑汁好味呀 ~

辣炒年糕 - 好似喺一田買   估唔到辣汁好辣   年糕好煙韌   唔想年糕咁單調   所以加 4 條蜜糖腸 ~   

蟹棒辛辣麵 - 特登煮比里奧大人食㗎   佢不知幾開心 ~

海帶牛肉湯 - 唔知煮咩好   所以整個湯   煮少一樣餸   呵呵 ~

洗埋碗再仲一陣小清潔   開埋機洗衫就沖涼喇 ~

睇下 Youtube 又打下機   里奧大人 9 點 15 分就瞓覺喇   以為佢唔舒服添   佢話佢好攰   想早啲瞓 ~

今晚越坐越凍呀   我想 10 點瞓㗎   但頂到 10 點 15 分先瞓   哈哈 ~