乾炒叉燒意粉 (外賣) ( 12-JUN-2026 )

( 12-JUN-2026  FRI )

感恩一覺瞓天光呀   但係咁流鼻水囉   如果一個鐘頭後仍然係咁就請病假喇 ~

我同里奧大人講話尋晚已經喉嚨痛同埋個人好凍   不過費事你瞓得唔好就講啦   之後佢話下次要講呀   咁等佢知道發生咩事嘛 ~

今朝同里奧大人去買早餐   買完就去佢公司喇 ~

8 點半仍然係咁流鼻水同個頭好痛   所以都係同西瓜請病假喇 ~

9 點即打去診所掛號   9 點半去到診所   感恩等多 1 個就到我 ~

醫生第一時間問咩事 ?!   我話流鼻水同頭痛   佢問我有無快測 ?!   我話無喎   唔係中呀嘛   之後佢話依家好多新冠同流感   話我又唔似中嘅   但開定抗生素   如果食咗仲唔好就要食抗生素喇 ~

感恩好快有車   但要去里奧大人公司拎番個飯盒   咁順便去 Circle K 買零食比黑珍珠同個女   等佢哋溫習 Break Time 食嘅 ~

黑珍珠好鍾意食忌廉賓   我初初以為佢講笑呀   哈哈

番到屋企又再沖涼洗頭   我覺得呢下係最攰呀 ~

食埋藥就即瞓覺   瞓到 2 點醒咗   咁就蒸熱啲飯食啦   食完就食藥   發現個藥袋唔見咗張收據同病假紙   唔通頭先去大生買飲品   比錢唔小心跌咗出嚟 ?!   諗緊落唔落樓搵好呢   但人哋見到張紙都會當垃圾啦   之後好感恩見到張餐枱附近有張白紙呀   我都唔知點解會跌咗出嚟   哈哈 ~

里奧大人 3 點番到屋企   原來佢今日本身係放 12 點㗎   我完全唔記得添 ~

我再由 4 點瞓到 5 點半   之後里奧大人要番公司睇啲嘢   所以就買埋晚餐番屋企食喇 ~

真係好怕食西藥   食完個人真係散哂   平時點都會沖多次涼   今晚真係唔沖喇   個人全程係溫溫燉燉咁 ~

雖然有睇 Youtube   但純粹睇住個畫面同有啲聲   咁等自己無咁易眼瞓   因為我要 10 點再食多次藥呀 ~

好難得食哂 4 次藥   所以食完即刻瞓覺喇 ~