臘腸蒸排骨 + 菜心 ( 7-SEP-2021 )

( 7-SEP-2021  TUE )

雖然半夜去咗一次廁所   但感恩起身都精神   同埋個肚無再乸住痛了 ~

早餐食芝腿治烘底   但飲完杯咖啡有啲胃痛 ~

送比阿花嘅   佢話鍾意食甜嘢多啲

菇場忙呀   做到個腦都實哂 ~

家姐知我今日去買洗衣珠比佢   所以打比我話原來有好多味道   佢驚我買錯   之後話有隻味道係 "愛的宣言"   真係笑死我呀   咁即係咩味呀 ?!   好難估喎大佬 ~

又傾咗半個鐘   所以要開行 Turbo 做喇 ~

Lunch Time 出去一田行下   買咗新鮮無花果 + Flakes   之後番菇場食 Flakes + 乳酪   好耐無食   覺得唔錯㗎   嚟緊都會一星期一次   哈哈 ~

$59一盒   仲好大粒   超級抵呀

仍然忙呀   對數字對到眼都濛   好想快啲放工 ~

準時放工就去超市買菜   之後番屋企預備晚餐 ~

里奧大人 6 點幾放工   等佢沖埋涼就可以開餐 ~

是日懶餐 - 臘腸蒸排骨 + 菜心

臘腸蒸排骨 - 過咗期嘅臘腸   好在無壞   所以想快啲食哂去呢 ~

菜心 - 無哂菜心苗   唯有買菜心啦   都好林甜呀 ~

洗埋碗就去徑步   但行咗兩個圈之後搞肚痛   嚇到即刻番屋企   可能頭先煮飯前食咗件紅火龍果呀 ~

開機洗衫就沖涼   之後食生果同睇 Youtube ~

里奧大人話好攰   所以 10 點都瞓覺   我就 10 點半瞓覺   今晚我都好攰呀 ~

翡翠拉麵小籠包 @ 九龍灣 ( 6-SEP-2021 )

百步香蔥油餅 ($36) - 幾好味   但奇怪一個熱一個唔熱囉

酸辣湯拉麵 ($66) - 今次唔辣喎   本身想叫小籠包   但食呢碗麵都幾飽   所以最後唔叫 lu

宮保雞丁 ($80) - 份量唔算多   但就啱我哋

呢度靜靜哋唔錯㗎

( 6-SEP-2021  MON )

半夜瞓瞓下聽到鬧鐘響   心諗咁快就天光嘅   好似明明瞓咗無耐咁咋喎   點知原來係里奧大人鬧鐘響   當時係 1:47am   因為佢校錯 Reminder 鬧鐘呀   不過咁都好   起碼唔係天光   哈哈哈哈 ~

今朝去徑步   呢排又好似熱番咁 ~

早餐食吞拿魚包   唔知點解食完有啲反胃 ~

呢支 SAMHWA 醬油 (500ml) 係阿花送比我   仲有車銀優小卡   因為要代購   所以我叫佢幫我訂一支   點知佢話我之前成日請佢食嘢   又整咁多 Sticker 比佢   佢係都要送比我   真係太客氣   又出錢又出力   怪不得我每次問佢都話唔知價錢啦

車銀優陪我番工真開心   哈哈

菇場忙呀   做到 Lunch Time ~

出去行 20 分鐘先   之後再買牛腩米番菇場食   今次係另一個阿哥煮粉麵   米粉扣底都好多   平時得好少咋   好似喺泰國食嘅份量咁   哈哈   所以今餐就好飽喇 ~

仍然忙呀   做哂 Urgent 嘢先   因為我要準時放工 ~

里奧大人都 5 點半放工   所以去翡翠拉麵食晚餐 ~

估唔到里奧大人會記得今日係註冊紀念日   仲話點都要出去食慶祝   嘻嘻 ~

食完就去 MUJI 買棉花糖比家姐同阿花   之後再去書局買 2022 年月曆 ~

我想買個比阿花   不過 Whatsapp 佢未覆   里奧大人即刻幫我按佢電話   最後阿花都唔要   仲再 Whatsapp 千其唔好買   哈哈 ~

之後再問家姐要咩款 ?!   我同里奧大人都話家姐一定揀紫色   果然無錯 ~

我就再買蠟筆小新   里奧大人話估唔到佢會翻生   哈哈哈哈   家姐又係咁講   話做咩無啦啦又鍾意番小新 ?!   因為好耐好耐之前我係勁鍾意小新   仲買佢啲漫畫睇添㗎 ~

里奧大人話去運動店睇下嘢   估唔到 Adidas 白色帽只係 $108   恆生卡仲額外有 9 折   咁一定要買啦   每次睇帽   真係睇一次就平一次呀 ~

我同里奧大人講話行商場當徑步   因為我個肚乸住痛   唔想再去徑步   我覺得行商場嘅體力係大過徑步   因為要揹住個袋   同埋頭先買咗好多嘢   雙手肯定攰啦 ~

番到屋企都 8 點幾   沖埋涼就睇 Youtube ~

我 10 點瞓覺喇   里奧大人嚇親呀   因為我唔舒服先咁早瞓呢  哈哈 ~

香炸雞膇 + 辣菜脯生菜 + 自家製麵包 ( 5-SEP-2021 )

( 5-SEP-2021  SUN )

今朝 8 點半都醒咗   咁可以開機洗自己張冷氣被   之後就出發去徑步 ~

買埋早餐就番屋企   食完抖陣就大清潔廁所   沖埋涼就番教會喇 ~

今次証道   講到每個人應該將恩賜發揮出來   有個的士司機   專登係去醫院   因為佢知道好多人會嫌啲老人家好慢   所以佢每次都會叫老人家慢慢   又會幫佢拎輪椅放車尾箱 ~

講真   有時搭的士都好鬼受氣   我都試唔少   如果個個的士司機都有啲耐性就好啦   唔好要乘客貼錢買難受嘛 ~

上次聽道仲有得着   講喺職場見到好多奇怪嘅人   反而咁樣更加可以做好一個好品格嘅人   咁當中一定要有忍耐要有愛   其實我覺得好難   我都希望自己做到呢 ~

散會之後再有事奉   點知出現嚴重問題   要重覆再做   簡直浪費時間   之後我全程無講過嘢   真係好唔鍾意快得嚟又錯   錯完又要改   改完又要重做咁囉 ~

里奧大人 2 點打嚟   我話仲喺教會   佢問我食咩 ?!   我話一陣先講啦   佢聽到我啲語氣唔對路   所以都即收線   今次終於 2 點半搞掂   個個見到我都好驚訝   仲問做咩咁遲走呀 ?!

同里奧大人差唔多時間番到屋企   咁一齊去買下午茶喇   不過就負責佢等   我就番屋企沖涼先   哈哈 ~

食完就熨 3 機衫   又係特登唔睇 Youtube   真係個幾鐘就搞掂 ~

諗住抖下   但家姐打嚟傾偈   佢話買咗 14 包花生糖   所以超級勁重呀   我話仲駛講咩   幾包都重啦 ~

今日的起心肝睇聖經   不過只睇咗 6 節咋   要繼續努力 ~

里奧大人 4 點幾瞓到 6 點幾   咁我都預備晚餐 lu ~

是日懶餐 - 香炸雞膇 + 辣菜脯生菜 + 自家製麵包

香炸雞膇 - 清埋最後一包雞膇   我覺得 5 隻真係唔錯   咁樣唔駛咁飽   下次做特價再買先 ~

辣菜脯生菜 - 買咗 4 棵唐生菜   估唔到淥埋都幾多呢 ~

自家製麵包 - 前晚㗎喇   所以今晚點都要食   依家多數蒸熱   口感煙韌好多㗎 ~

洗埋碗就同里奧大人出去徑步   呢個星期又熱番   所以行一陣已經好哂汗   勁正呀   哈哈 ~

開埋機洗衫就沖涼   之後食西瓜   不過尋晚飲完豆漿有啲暈   今晚食西瓜又有啲暈   可能涼得滯 ~

今晚有啲攰   但 11 點先瞓覺 ~

西洋菜餃 (外賣) ( 4-SEP-2021 )

( 4-SEP-2021  SAT )

感恩一覺瞓天光呀   梳洗之後就去徑步 lu ~

早餐食丁米餐   丁米少米 腸仔餐肉走包 凍啡走甜少奶   係咪好煩呢   哈哈哈哈 ~

菇場有嘢做   但無 Mood 做 ~

放工即走   今日塞車呀   差唔多 2 點先去到家姐屋企 ~

好餓呀   所以一坐低就開餐 ~

JOLLIBEE 6 件桶雞 ($99) 辣嘅好味   感覺無咁滯   哈哈   我同家姐講係兩隻色嘅   仲以為原味同辣味添

有雞膇

提子味嘅人氣飲品   唔係好甜

之後家姐話幫我抹手機   話好似好污糟咁   我話因為成日搽 Hand Cream   所以手機屏幕會一撻撻   妳唔好亂講嘢   哈哈哈哈   之後佢喺度笑   話無諗過叫佢唔好亂講嘢喎   哈哈 ~

家姐又係咁問炸雞好唔好食   次次叫佢話事想食咩   就會好緊張我鍾唔鍾意食   同埋佢一定唔會買牛雜米呢啲比我食   因為知我番工成日食湯粉麵呢 ~

Berry 好鍾意食零食   所以依家唔食飯呀

好硬咁   但佢又食得哂

之後望定定想再食

唔會拎隻手出嚟按住零食   懶到呢

懶到咁

家姐比我嘅 L'OCCITANE Cream

奇華迷你月餅   我居然問家姐係咩黃 ?!   佢反哂白眼話妳話呢 ?!   哈哈哈哈

傾下偈   差唔多 4 點就同家姐一齊出門口   佢去整嘢   我就去剪髮   去到巴士站   感恩家姐好快有車   我就等咗 2 分鐘   仍都超級感恩呢 ~

剪完頭髮就去街市買餸   買咗 2 盒免治豬肉 + $80 一字排 + 4 個紅火龍果 + 1/4 西瓜 + 4 支豆漿 + 1 盒西洋菜餃就收手   因為已經好重喇   最勁係我個袋已經有 3 支 Cream + 125 個 KF94 + 8 個迷你月餅呀 ~

番到屋企切埋西瓜放入雪櫃   之後即去徑步   其實超級攰   但頭先食完炸雞   所以點都要徑步半個鐘 ~

今晚要做大清潔   但用咗個半鐘就搞掂   因為特登唔睇 Youtube   咁樣我係絕對會分心呢 ~

里奧大人就啱啱放工   今晚 9 點先開餐呢 ~

是日懶餐 - 西洋菜餃 (外賣)

西洋菜餃 (外賣) - 呢度係 $42/一打   最鍾意多菜少肉   加埋幾棵白菜仔墊底   咁樣就最好   唔想洗多隻碟呀   哈哈哈哈 ~

洗埋碗就即沖涼喇   之後就食西瓜   勁爽呀 ~

今日食咁多嘢   完全無重過   所以流汗真係好鬼正   哈哈哈哈 ~

睇陣電視   差唔多 11 點半先瞓 ~

生炒骨 + 蒜蓉節瓜 + 白菜仔 ( 3-SEP-2021 )

( 3-SEP-2021  FRI )

今朝好熱呀   所以徑步又出成身汗   勁爽 ~

早餐食吞拿魚包   本來想食重口味嘅芝士蒜蓉包   不過得番一個所以唔買 lu ~

菇場唔忙   咁家姐打嚟傾偈   講開話食啲健康嘢   佢話想食堅果   我話無鹽先健康喎   之後佢教我整健康好味嘅乳酪   咁講開藍莓   我話酸嘅藍莓加乳酪好味呀   家姐話啲藍莓係咪變甜 ?!   我真係爆笑咗出嚟呀   我話藍莓撈埋乳酪無咁酸囉   唔會變甜呢   哈哈 ~

菇場唔太忙   所以做 Filing ~

家姐問咗幾次係咪得 3 粒鯪魚球 ?!   我話係 3 粒   之後佢再問有無粉麵?!   我話米粉扣底   佢可能以為我只食 3 粒鯪魚球呀   哈哈哈哈   咁睇又真係好似得鯪魚球咁呢

仍然唔忙   仍然做 Filing   因為張枱太多文件好有壓迫感   哈哈 ~

放工即走   今晚等好耐車呀   里奧大人話 6 點半放工   所以番到屋企要即預備晚餐喇 ~

時日晚餐 - 生炒骨 + 蒜蓉節瓜 + 白菜仔

生炒骨 - 想整好耐   之前特登買排骨粒   所以真係好下定決心整呢   哈哈   可惜個皮唔夠脆   家姐話我落得太少油喎   佢其實唔識煮飯都咁講   都唔知係咪嘅   不過我係半煎炸嘅   下次就咁買肉排好啲   咁樣唔駛怕有骨嘅唔熟   同埋唔駛整咁耐   哈哈 ~

蒜蓉節瓜 - 尋晚食唔哂架   因為批咗皮   點都要食埋去 ~

白菜仔 - 一個節瓜唔夠   所以又整幾棵白菜仔   加埋其他配菜   我覺得菜嘅份量都好夠 ~

洗埋碗就大清潔廚房   好耐無咁啦   但炸嘢就一定要大清潔   好怕啲油彈到周圍都係咁囉 ~

搞完都得番半條人命   但都徑步啦   因為食咗飯呀   哈哈   里奧大人就做公司嘢唔去 lu ~

今晚唔駛睇劇   又睇下 ASTRO   但睇到 11 點都瞓喇   好眼瞓 ~

豉椒雞翼 + 蒜蓉蒸節瓜粒 ( 2-SEP-2021 )

( 2-SEP-2021  THU )

感恩一覺瞓天光   又可以精精神神去徑步喇 ~

早餐食腸仔包   好味呀 ~

菇場勁忙   做到個腦都實埋 ~

Lunch Time 出去買洗衣珠同麥提莎比家姐   上次傾偈 Feel 到佢係想要   哈哈哈哈 ~

買完去買白粥同炸兩   順便買 2 條牛脷酥比阿齋媽 ~

白粥熱   炸兩又脆   今餐好滿足呀

仍然忙呀   做完長命 Report 又要做煩嘢   做到有啲想嘔 ~

5 點搞掂   終於鬆一口氣 ~

放工去街市買菜   之後都番屋企喇 ~

今晚 7 點唔夠就可以開餐   可以慢慢食   哈哈 ~

是日晚餐 - 豉椒雞翼 + 蒜蓉蒸節瓜粒

豉椒雞翼 - 今晚煮新嘢   其實好簡單   哈哈哈哈   但因為要依埋尋晚嘅辣拋豬肉   所以只係食咗 2 隻雞翼   仲有 7 隻要留番聽晚食 lu ~

蒜蓉蒸節瓜粒- 本身諗住 3 個節瓜滾湯   但切咗 2 個已經好多咁   所以最後都係蒸節瓜算喇   剩番 1 個又係要留聽晚 ~

洗埋碗就抖陣   之後就同里奧大人去徑步 ~

我叫里奧大人睇我塊臉   佢笑住話我真係好鍾意流汗   不過我話如果流完汗即番屋企沖涼先鍾意囉   番工流汗真係唔多鍾意喇   哈哈 ~

沖埋涼就即刻睇 "模範計程車" 大結局   所以今晚成 11 點 15 分先瞓呀 ~

辣拋豬肉 + 菜心苗 ( 1-SEP-2021 )

( 1-SEP-2021  MON )

尋晚瞓得唔係咁好   感恩起身又唔係太攰   所以就去徑步   我覺得出完一身汗係精神好多呢 ~

又到 9 月   時間係咪過得咁快呀 ?!

早餐食吞拿魚包   真係覺得自己幾勁   食咁多餐吞拿魚包都唔厭   哈哈哈哈 ~

又到 9 月   時間係咪過得咁快呀 ?!

菇場勁忙呀   月頭多數係咁呢 ~

Lunch Time 出去行陣   呢排落完雨即有太陽   感到喺蒸籠上面行咁   所以行 20 分鐘已經係極限 ~

本身想食魚柳包   但諗諗下又唔想食咁多包   最後都係買鯪魚球米粉 ~

仍然忙呀   因為又要做長命 Report   真係做到眼都濛埋 ~

放工即走   今日有啲頭痛   不過最後都係想煮飯咁囉 ~

里奧大人 7 點幾番到屋企   等佢沖埋涼就食得 ~

是日晚餐 - 辣拋豬肉 + 菜心苗

辣拋豬肉 - 用埋最後一包現成醬   唔知幾時先可以再去入貨呢 ?!

菜心苗 - 呢期菜心苗都好甜同埋無渣   反而有時食菜心會有渣   所以其實我真係鍾意食菜心苗多啲呢 ~

洗埋碗就去徑步   里奧大人又話去喎   本身話好攰唔去嘛   之後話食完飯無咁眼瞓   所以又一齊徑步 ~

今晚都有啲風   涼涼地其實都舒服   但就無咩汗咁囉 ~

開機洗衫就沖涼   抖陣又睇劇   睇埋呢兩晚應該睇哂 lu ~

11 點都瞓覺咯   已經遲咗 15 分鐘喇 ~