黃豆醬燜雞柳 + 銀蝦 XO 醬炒節瓜 ( 23-JUL-2026 )

( 23-JUL-2026  THU )

尋晚瞓到半夜去廁所   心諗又無飲水點解咁急   之後醒起食咗橙同龍眼呀 ~

今朝里奧大人去買早餐   買完就去佢公司食喇 ~

同阿妹傾偈   佢話佢老公成日會叫好多嘢食   兩個女讀小一嘅時候   一坐低就話要 4 個煲仔飯   食到啲女好驚   我話大人都未必食得哂啦   何況細路仔   哈哈 ~

菇場唔忙   咁就好喇 ~

Lunch Time 蒸完飯就同船頭去一田買嘢   買完都已經 12 點 15 分   要番菇場開餐喇 ~

我只係買 HASHIMOTO 北海道紅豆罐頭 ($14.90) / CP泰國新鮮雞蛋 L 10隻 ($40/2 件)

頭先我比錢先   之後船頭比 $500 我找   但我銀包又係全部 $500 喎   佢話比張百佳 $100 Cash Coupon 抵押   我話唔要啦   我銀包有幾張都仲未用呀 ~

一坐低   阿齋就比炸魚皮   西瓜嘅辣菜脯

船頭又整咗豬頸肉   佢用新鮮嘅豬頸肉   口感真係正好多   佢話諗上碟前仲會用火槍噴添呀   叮完出嚟好鬼香   好似經過美珍香咁呀

船頭喺泰國買嘅是拉差醬真係好正   我話下次去泰國就會大量入貨比佢哋   哈哈

我要洗個 Mouse Pad 呀   因為有啲是拉差醬喺面   搞到立黐黐   船頭佢叫我用消毒紙巾抹   我話已經用咗啦   不過都係覺得好污糟咁   我驚惹小強呀   同埋我話間唔中都會拎 Mouse Pad 番屋企刷㗎   佢話我有啲潔癖   但我話唔係囉   呵呵 ~

唔忙又做自己嘢   之後講開六合彩   船頭話仲咗六合彩都會番工   仲會買公司對面單位   要近過阿齋   之後阿齋話會買公司隔離單位   船頭大笑咁話公司有咩都第一時間就搵妳啦   見妳未番仲會叫妳起身番工添呀   真係笑鬼死呀 ~

放工即走   番到屋企都預備晚餐   里奧大人 6 點 45 分番到屋企   可以即刻開餐喇 ~

是日晚餐 - 黃豆醬燜雞柳 + 銀蝦 XO 醬炒節瓜

黃豆醬燜雞柳 - 之前醃咗 2 塊   諗住一餐煮哂   但無諗過 1 塊都咁多   所以今晚都係食雞柳   不過我就加咗啲豉油做啲汁呢 ~

銀蝦 XO 醬炒節瓜 - 又係節瓜就加啲銀蝦 XO 醬啦   咁唔駛兩餐都蒸節瓜粒咁悶   哈哈 ~

洗埋碗抖陣就同里奧大人去做機   點都想郁下呢 ~

開埋機洗衫就染髮   搞掂就沖涼休息喇 ~

睇 Youtube 又打機   唔知係咪飲咗 3 杯黑茶   到咗 11 點都仲未眼瞓   不過 11 點半都要瞓喇   但同里奧大人傾陣偈就變咗 11 點 45 分先瞓呀 ~