薑蔥雞肶 + 蕃茄薯仔魚湯 ( 6-NOV-2008 )

見里奧大人唔舒服   我個心仲唔舒服   又擔心喎   我覺得係呢排成日出街食  所以食得太雜  無哂營養  又無湯水   無埋抵抗能力   加上里奧大人工作壓力大   又唔夠時間休息   所以咁易比病菌打倒   好可憐呀 ~

就係因為里奧大人病咗   所以嚟緊嘅將來我會發奮煮飯   煮到煮唔到為止 ~

尋日雖然請咗假   但真係忙過番工   陪完里奧大人睇醫生   之後去超市  街市  去 Bank  煲粥  拖地   清理文件等等 ~

晏晝清清哋   煲啖粥   加啲陳皮絲   但唔知點解個粥會咁杰嘅   唔知係咪因為唔係用電飯煲煲粥呢 ~    

全日未停過    又要周不時摸下里奧大人有無標冷汗    搞到我呢日都精神緊張呀 ~ 

是日晚餐 - 薑蔥雞肶 + 蕃茄薯仔魚湯

薑蔥雞肶 -  里奧大人想食薑   所以整薑蔥蓉   雞肶就咁蒸  放落電飯煲都蒸唔熟  又要開火再蒸   麻鬼煩 ~

蕃茄薯仔魚湯 - 想醒胃啲   所以用 4 個蕃茄 + 1 個細薯仔  + 2 條紅衫魚   依家紅衫魚又貴咗咁   2 條要廿蚊呀   不過有營養   點都要買嘅  最多食埋條魚去囉 ~

今次里奧大人唔舒服   我特登請假陪佢   佢話好感動呢   因為估唔到我會咁做喎 ~

我覺得佢今次病係我做成   因為我懶   成日無煮飯    佢又為咗可以令我有舒適嘅生活   所以佢份工點辛苦都要番工   我個心真係好痛好痛 ~   

我情願我有病   因為我唔想病會令佢辛苦   我病無所謂   唔食嘅話   體內仲有大量脂肪燃燒   工作壓力又唔大   留番第日做都得   但里奧大人一唔番工  手頭上嘅嘢都係佢做番   所以好慘呢 ~ 

今朝早咗起身   所以去美心食早餐  食至愛嘅吉列魚柳腸仔厚多士 + 奶茶 ($21) 

食到飽飽番菇場   又係忙到震   好充實呢 ~

晏晝同里奧大人去公司附近食 Lunch   食完可以快啲番公司休息   基本上茶餐廳無咩嘢係唔油膩   所以清清哋食粟米豬扒飯 + 熱檸檬菜蜜 ($37)   不過個汁超稀   無咩味    所以真係好清囉 ~