茄汁雞扒 + 蒜蓉豆豉炒蕃薯葉 ( 13-AUG-2013 )

( 13-AUG-2013  TUE )

尋晚瞓番自己位置真係舒服好多呢   里奧大人話星期六日再交換位置瞓   我話咪搞喇   我唔想周身骨痛同埋無厘精神呀 ~

早餐食芝腿治烘底   好在影相咋   咁我拎起塊多士見到幾點黑色   好似發霉咁   我即換啦   如果唔係影相   我真係就咁食吔咋   之後再換都有黑點   第 3 次就無喇   經此一役   下次真係要格外留意啲麵包先得咯   之後 8 卦嚟咗   我叫佢唔好食三文治   不過佢都唔太鍾意食包嘅   話唔飽喎 ~

菇場無嘢做   到 Lunch Time 又未餓   差唔多 1 點先食杯麵   呢個星期日日都落雨   真係無帶飯都要帶定杯麵   唔想落雨濕濕落街買 Lunch 呢 ~

雖然已經 3 號風球   但睇天文台又無話會改 8 號   咁即係又係準時放工啦 ~

放工同同事一齊行另 1 條 Short Cut   真係快好多   之後我睇 Road Show   話今晚考慮改發 8 號風球   所以即叫里奧大人放工走   佢問真定假喎   我話我睇 Road Show 咋   同埋媽咪聽收音機都咁講   佢話媽咪聽嘅應該係真啦   但其實我都親眼睇到啦   做咩唔信我喎 ~

今日整鬼家姐同 8 卦   差唔多 3 點就 Send 嘢比佢哋   話: Yeah  執定嘢啦   佢哋都問真定假   因為咁講以為係改發 8 號   之後我話我叫妳地執定嘢等放工之嘛   呵呵   之後再講啲咩都唔信我   咩都問真定假   我相信我都應該係誠信破產 lu ~

諗住去超市買菜同生果   但買下買下又一堆罐頭   重鬼到呢~

番到屋企煲中藥再開機洗衫   之後好有 Mood 咁拖埋地   拖完都 7 點 lu   諗住抖抖   點知里奧大人打嚟話放工   咁我都要預備晚餐 lu ~

是日晚餐 - 茄汁雞扒 + 蒜蓉豆豉炒蕃薯葉

茄汁雞扒 - 今次又求求其其煮啲茄汁   估唔到里奧大人又話好味喎   不過我真係信佢   因為佢話要用啲汁送飯呀 ~

蒜蓉豆豉炒蕃薯葉 - 媽咪話唔就咁要啲葉   咁好似食豆苗咁   所以今次我都就咁要啲葉   真係好食好多   因為里奧大人次次食蕃薯葉都問熟未   今次無問到呢 ~

搞掂哂就沖涼   食埋個橙   唔太甜但多汁   咁下次都唔買橙 lu ~

11 點幾瞓都仲係 3 號   唔知幾時 8 號呢   不過家姐話如果 8 號會打電話比我   叫我放心瞓喎 ~