咖哩王 + 糖仁街 @ 尖沙咀 ( 9-AUG-2013 )

薄餅 (免費) - 辣辣哋幾好味   

自家香草醬 - 好怕呢啲綠色醬   同埋我覺得有 "格甩底" 味

咖哩角 - 素咖哩角嚟㗎   薯仔好飽肚   不過辣辣哋都幾好味呀

馬沙拉咖哩烤雞 - 阿 Mi 話唔太辣   有蕃茄味嘅   我其實想食香辣雞   不過我驚好辣食唔到   但因為奉行 "邊個叫邊個食哂"   所以我唔敢叫啦

香蒜烤餅 - 老闆娘話似酥餅   咁信佢啦   但根本都唔酥囉   凍咗食有啲硬添呀   同埋好飽肚   比人呃咗添

芒果特飲 - 唔好飲嘅  好似飲奶昔咁   但唔凍又甜囉

白雪紅霞 (荔枝 + 西瓜冰底 / 鳳梨醬 + 粟米片 + 仙草凍 + 西瓜 + 鳳梨) - 西瓜好味   荔枝就無咩味喇   依個甜品要 $54   我覺得好鬼貴囉  

( 9-AUG-2013  FRI )

今日同 8 卦食早餐   我講明只係去菇場附近食   因為今晚去街   唔想行到成身汗呀 ~

菇場靜呀   所以 Lunch Time 就出去行陣   之後再買牛腩米番菇場食   食完抖陣就開工 ~

放工去尖沙咀   因為我約咗阿 Mi 去重慶大廈食印度嘢   但我唔識去   所以又要阿 Mi 帶路呢 ~

阿 Mi 一早同我講   話入到重慶要黐住佢   不停步向前行   講到咁恐怖   真係要黐實行囉 ~

今次去咖哩王   其實阿 Mi 比我揀幾間   我揀咗咖哩王   Book 咗 6 點 45 分   去到啱啱好   不過服務態度就真係麻麻喇   我應該唔會再去囉 ~

真係好邪   我同阿 Mi 講話唔要對住坐   一定要平排坐   因為我要佢幫我食糖過關   今次真係平排坐喇   我哋坐近 Cashier 位置   如果我哋打對面坐   咁佢哋一收錢   我就要企身讓比佢哋入   好煩囉 ~

好餓呀   所以一坐低就叫嘢食   要聽阿 Mi 話   叫咗 3 樣嘢先   食完唔夠飽再叫   仲要奉行 "邊個叫邊個要食哂"   所以我都唔咁一次過叫咁多   因為我驚好多印度嘢太多香料   我唔係咁接受到   要食哂真係好大鑊囉 ~

我影 Menu 嘅時候   老闆娘話唔比影 Menu   咁我都明嘅   驚我哋係行家   不過其實真係影咗都唔知啦   但我無影   我影嘅目的係想知食物叫咩名之嘛   記性唔好懶得記囉 ~  

點完哂食物   咁就叫阿 Mi 喺食譜度簽名啦   之後佢又送咗包胡椒粉比我   好鬼香呀   其實我前日先去超市睇胡椒粉   估唔到石 Mi 又送比我   實在太好喇 ~

年幾無見阿 Mi 啦   又好好傾喎   佢講啲生活細節   笑到肚痛   同埋覺得佢真係好有耐性   我要向佢好好學習   因為我實在好易放棄呢 ~

食下傾下都差唔多 8 點   之後開始越嚟越多人   又越嚟越嘈   咁我哋又飽飽哋   阿 Mi 話出去行下   再飲杯嘢好過喎   咁又係   反正呢間服務態度又唔好   都唔想留咁耐 ~

今餐係 Share   當我比番錢比阿 Mi 嘅時候就鬧出個中笑話   呢餐飯係 $150   咁我比 $105   但佢無 $30   所以比 $50   而我就找番 $20 比佢   正路我係拎番張 $50 嘅啫   不過我居然拎張 $100 放入銀包   其實我仲諗住擺好張 $100 先拎埋張 $50 㗎   但擺錢嘅時候覺得好怪   點解同一位置拎又擺番同一位置嘅   之後阿 Mi 話佢有睇警訊   哈哈哈哈   真係好在佢開口講咋   唔係真係以為我呃佢呢 ~  

條街好熱呀   但阿 Mi 話唔熱   奇人呀   其實可能我太肥啦   之後佢陪我去買香水比家姐   再行利時   不過我無咩嘢想買住   細手袋又實在太細   銀包都裝唔落   真係買嚟無咩用   高跟鞋靚就靚   但我無本事着呀   驚 PK 呀 ~

之後行下韓超   多人到唔想行   咁索性去搵地方飲嘢   去到糖仁街唔駛等就入去啦   真係好感恩有 2 人位   唔駛坐近門口呢 ~

又食下傾下   差唔多 10 點就搭地鐵番屋企喇   同阿 Mi Whatsapp   大家都勁口渴呀   下次都係飲嘢唔食冰   好似食完仲口渴咁 ~

番到屋企 App 埋比 阿 Mi 知我已在家中就沖涼喇   今晚里奧大人唔駛上大陸   所以早番過我   之後一齊睇陣電視就瞓覺喇 ~