California Pizza Kitchen @ Mega Box (九龍灣) ( 10-AUG-2013 )

烤燒雞肉沙律 - 有我最鍾意食嘅脆卜卜   咁唔駛特登再叫 Tortilla Chips

西西里風味薄餅 ( 薄批 ) - 新鮮熱辣好味呀   又有里奧大人最鍾意嘅 Salami   不過我地真係好飽   食咗 3 塊   其餘打包留番聽日做 tea

唔記得佢地嘅Tabasco 係呢枝 "格甩底味" 辣椒醬添

( 10-AUG-2013  SAT )

終於又等到每月一次嘅 Off 喇   10 點半自然醒   梳洗之後就去食早餐喇 ~

我食剩啲牛肉 蛋黃同麵   所以叫里奧大人幫手食   佢話飽   但都居然肯食   如果食菜係咁就好喇 ~

食完就去建設銀行整嘢   排咗 15 分鐘都仲唔郁   鬼咩   得 2 個 Counter 開   之後我同里奧大人講我再番屋企沖涼先   好過嘥時間喺度等 ~ 

等埋里奧大人上嚟就出發喇   又要去南洋銀行   整完都差唔多 1 點   真係好慢啦   去呢 2 間銀行整嘢   次次都要每間預 1 個鐘   南洋就仲勁   無人都可以咁慢   係咪慣咗慢活呢下 ~

天氣非常非常之好   仍都非常非常之熱   本想諗住去西貢食 Pizza   不過去到小巴站   起碼要等 2 架先上到   所以唔去喇   即轉場去 Mega Box   等咗 3 架 Shuttle Bus 先上到   但見到西貢都仲未有車嚟   真係好在無等咋 ~

去到 Mega Box 都 2 點幾   其實我未餓   不過里奧大人話佢可以食得嘢喎   咁食啦   難得假期佢勁有胃口   但今次我唔想飲茶   想去 Ikea Cafe 食嘢呢 ~

呢碟燒火腿完全唔得呀   上次食係好腍好入味   今次鞋嘅   好似食煲湯豬展咁囉 

同里奧大人講 $19/10粒   所以叫佢買   但原來可以叫 5 粒   如果叫 5 粒就最好   因為真係好飽

食到好飽   所以去 Ikea 睇嘢   買咗張毛毯   最開心係買到裝 Remote Control 嘅掛袋   因為衰里奧大人成日將啲 Remote Control 周圍擺   可以擺喺書房同睡房   之後我話佢呢   佢就話因為我叫佢整嘢嘈住哂   所以無拎出廳   咁都可以賴人   唔通我喺廚房切嘢   佢叫我去書房拎嘢   我將把刀擺喺書房咩   藉口多多我最憎 ~

有次仲離奇   我同佢搵咗成晚都搵唔到個電視 Remote Control   佢都搵唔到   之後到第晚再搵   居然佢背囊搵到   係咪顛吖   咁無手尾真係好嘥人時間囉 ~

其實我鍾意行 Ikea   因為佢設計啲概念非常之啱我   同埋我又好鍾意佢啲碗碟   就咁睇已經好開心呢 ~

最後買埋膠碗同 Suction Cup 同香薰座就走喇   行咗個幾鐘好攰呀 ~

咁里奧大人去洗手間   我就喺 Ikea 睇嘢食   買咗包細爆谷   $5 咋   估唔到係熱添呀   都幾好味   之後去埋 Aeon 同十蚊店   再去扭蛋就去大眾睇書喇 ~

我地鍾意喺呢間書大眾睇書   因為有得坐呀   睇完都差唔多 6 點幾喇   都出唔到黃大仙食嘢   同埋呢個時間開始多人   所以喺番 Mega Box 食嘢算喇 ~

今次同里奧大人去 CPK   因為無咩人嘛   咁我哋有 3 袋嘢   個 Waiter 比張 2 人枱我哋   但佢有好多 4 人卡位㗎噃   有好多都無人坐嘅   有幾張就係 "留座"   咁里奧大人話我哋多嘢   所以想坐 4 人卡位   佢哋話無喎   留咗位   咁里奧大人話無呀  咁唔食 lu   之後個 Waiter 就比張 4 人卡位我地   其實如果全場都 Full   我地當然會坐 2 人枱   但根本無人   做咩唔比我哋坐喎 ~

實在唔太餓   所以只係叫沙律同 Pizza   呢間 Pizza 好味喎   上次喺旺角食係唔好食嘅   無計啦   旺角人流旺   所以只求妳食完快啲走囉 ~

坐番 Shuttle Bus 走人   去埋 Market Place 買生果就番屋企喇   本來想去徑步   不過我同里奧大人都覺得對腳有啲攰   所以唔去喇   喺屋企 Relax 下好過呢 ~