樂林小鍋米線 @ 鰂魚涌 ( 17-OCT-2013 )

豬軟骨小鍋米線 (小辣) - 今次無咗半隻蛋添 

( 17-OCT-2013  THU )

星期四喇又   如果今朝超級精神就好啦   哈哈 ~

早餐食奄列餐   今朝間餐廳啲光線好唔同咁呀   我超鍾意呢 ~

Lunch Time 未餓   又出去行下先   再去 7-11 買咖哩魚蛋烏冬番菇場食   我想食好耐㗎喇   因為之前食係好好食   辣汁夠辣   烏冬又煙韌   不過依家唔好食 lu   咖哩無味   烏冬唔煙韌 ~

8 卦終於幫我搞掂咗個 Skype   唉   Skype 之前叫我更新   我唔理啦   但因為同晴晴會用 Skype   但驚 Version 唔同用唔到   所以我咪更新囉   點知更完之後就死咗   依家要用番舊 Version 先用到   之得唔鬼更新   嘥哂啲時間 ~

真係邪   之前真係諗住同 8 卦反哂面   依家兜兜轉轉又要佢幫手   唔通我人生一定要有灰色   唔可以得黑同白 ~

放工即走喇   今晚自己去鰂魚涌睇中醫   好感恩無人排隊睇呀   哈哈 ~

睇完都係 6 點 45 分   咁打比里奧大人   佢話係啱啱先開工咋   因為成日見客   咁佢叫我自己食喎   咁又好   因為我想食酸辣米線 ~

下次都唔好一個人去樂林   因為勁掛住家姐呀   因為之前佢陪我食家嘛   但今晚佢要番學   陪唔到我   突然覺得自己一個食好孤單咁 ~

今晚搭地鐵番屋企   咁我要買當參同北芪   所以打比媽咪   咁媽咪話聽日可能買唔到   咁無問題啦   我又唔急   我以為媽咪要覆診咋   點知媽咪話頭暈呀   可能血糖低   所以即飲咗半罐可樂   咁又好啲喎   咁我都無咁擔心 ~

番到屋企又即煲中藥喇   之後再打幾次比媽咪   問佢點   駛唔駛番屋企睇佢   幾驚佢話我煩呀   哈哈   差唔多 9 點幾媽咪打嚟話無嘢   叫我唔駛擔心   咁我都鬆一口氣喇 ~

里奧大人 9 點半就番到屋企   買埋唐記牛肉飯   其實唐記真係唔錯   不過依家食咗 2 次啫   遲啲佢應該又話厭㗎喇 ~

今晚玩 Pokopang 玩到 11 點   因為 11 點之後就無 1.5 Cherry   我同個朋友玩到想嘔   話玩完之後真係要抖一抖   因為成日係咁玩   玩到對眼好攰   同埋好多嘢都無做到   哈哈 ~