黑椒牛仔骨 + 瑤柱燜節瓜 ( 2-OCT-2013 )

( 2-OCT-2013  WED )

雖然今日係星期三   但假期後第一日番工都好有星期一嘅感覺   即係好眼瞓   哈哈 ~

不過今朝好開心   因為里奧大人要去九龍灣拎辦   所以陪我食早餐   去到餐廳   佢同我講其實好眼瞓   想唔陪我食早餐   想瞓多陣   唔陪咪唔陪囉   有咩所謂喎   我最緊要係佢夠瞓   佢咁講   搞到我好心痛添   下次都係比佢瞓耐啲   瞓多 45 分鐘差好遠呢 ~

菇場唔忙   所以超勁想瞓覺   8 卦 Skype 問我忙唔忙 ?!   我話唔忙   做咩咁問   佢話關心下我喎   之後叫我食完飯陪佢落街買嘢   不過我要幫家姐買嘢   所以唔陪佢   其實佢有時都咁問   但我今日覺得佢係撩我講嘢   因為自從人情呢單嘢之後   我無再主動同佢 Skype   如果佢同我講嘢   我就答一句咁   以前唔係咁家嘛   會無無聊聊講廢話   但依家一定唔會啦   我估佢都應該 Feel 到咩事呢 ~

Lunch Time 一到就幫家姐去買嘢喇   之後去麥當勞食 Lunch   今日真係爆脂喇   所以食完去一田超市行 20 分鐘先番菇場呀 ~

超勁眼瞓呀   但又唔想飲咖啡   唔係夜晚瞓唔到仲慘 ~

放工唔駛去買餸   但番到屋企都要即刻預備晚餐   之後再煲中藥同開機洗衫 ~

家姐差唔多 6 點 45 分就到我屋企   食下薯片傾下偈   之後又食糖同餅乾   咁我想同佢 Share 包雞蛋餅   但佢見我未開   所以唔要   又問我食唔食   我話唔食啦   食雞蛋餅真係好鬼飽 ~

佢差唔多 7 點 15 分就走喇   佢都要番屋企食飯   佢一走   我就煮飯 lu ~

里奧大人 8 點幾先放工   咁我食先喇   咁我多數煮完餸   影完相就會即刻將啲餸放入暖壺   咁我裝完牛仔骨之後   正想放入暖壺   點知跣手   跌哂落枱同地呀   最慘啲汁整到成個櫃同地下都係   嗚嗚   抹到我呢 ~   
      
是日晚餐 - 黑椒牛仔骨 + 瑤柱燜節瓜 

黑椒牛仔骨 - 完全唔記得之後攞咗牛仔骨   好在媽咪叫我整先記得咋   今次又係 Overcook   不過其實次次都係   里奧大人話啲汁好好味   咁當然啦   現成醬料嚟家嘛   哈哈   唔好味搵妳買咯   呵呵 ~ 

瑤柱燜節瓜 - 尋日喺媽咪屋企拎咗 5 個節瓜仔   所以又整埋佢啦 ~