住家飯 @ 媽咪屋企 ( 4-OCT-2013 )

腐皮卷 - 上次同媽咪講話不如整腐皮卷   因為係齋嘛   咁媽咪可以食多啲   不過媽咪加咗蟹柳   因為家姐鍾意食   我真係食咗起碼 6 條   因為我叫得整就一定食好多   但佢哋又唔信   狼來了 ?!

材料有紅蘿蔔絲 / 沙葛絲 / 木耳絲 / 冬菇絲 / 蟹柳

滷水燜牛展 - 超級勁好味

蒸黃花魚

炒豆角

煲湯嘅豬潤   食落起沙㗎   口感好得意   媽咪同家姐係咁叫我食豬潤同牛展   夾一次講一次話補血   搞笑 

當參栗子豬潤瘦肉湯 - "北" 起湯渣   無咗一半湯   所以食湯渣都已經好飽

( 4-OCT-2013  FRI )

又星期五喇   早餐食豐富啲 ~

菇場忙咗陣呀   之後收到家姐 Whatsapp 話早餐食咗姐夫買嘅老婆餅同我買比佢嘅愛心麵包   我話姐夫買都係愛心啦   之後佢話佢買咗唔食比我食咋   哈哈   咁唔怪得佢話我買係愛心麵包啦   因為我特登買比佢食嘛   次次買嘢食比家姐   佢都好鬼開心   所以我好鍾意買嘢比佢食呢 ~   

之後 8 卦又 Skype 問我下星期邊日唔帶飯 ?!   條友前前後後問咗得 3 次幾時唔帶飯   咁我當然知咩事啦   佢 10 月唔知邊號生日嘛   所以咪成日問我邊日唔帶飯囉   咁我話我唔知邊日唔會帶飯喎   之後話我無心肝   我唔理佢啦   佢又 Copy 番呢句比我   但我都唔會理佢   之後佢話嬲我   我就哦   唔好以為我會問咩事呀   再隔咗 1 個鐘   又同我講   妳真係唔記得呀 ?!  不過佢又同事講埋另一樣嘢   咁我只覆佢另一樣嘢   唔會問咩嘢唔記得囉   講真   如果唔係佢拎番人情仲嫌少   我都會請佢食生日飯   但其實佢都知我拎番人情嫌少都唔老嚟㗎啦   依家仲好意思開口叫我請食飯   都黐黐哋線   佢應該由今日開始    又要同佢老婆諗下講啲咩說話我聽㗎喇   不過我都諗咗點串爆佢啦   臉係人地比   架係自己丟㗎 ~

今日有 Lunch Box   不過份量唔會多   因為要留肚番媽咪屋企食飯呢 ~

里奧大人呢排會成日見客   所以唔駛上大陸   咁仲好啦   無咁頻樸   不過我同佢講   我會照番媽咪屋企食飯   呵呵 ~

放工即走啦   媽咪次次都差唔多時候打比我   問我喺邊 ?!   同埋叫我唔好買嘢食   所以我次次一番到屋企就會有碗熱湯等緊我呢 ~

依家都無咩好勞氣話媽咪   如果佢話工人   我都隻眼開隻眼閉   始終佢哋相處時間耐   我唔知乜頭乜路   好難講邊個唔啱   不過就會話囉   話完佢又令自己激氣   有咩謂呢   工人只係輔助妳   調番轉頭諗   好過無工人幫手啦   係咪先 ~

好記得上次我好開心同媽咪講   話不如買啲乾果妳食   咁等妳無咁悶   點知佢好大反應   乸埋口臉耍手擰頭咁話唔駛喇唔駛喇   嗰啲反應我最憎   好似覺得妳多餘咁呢   搞到我火都嚟   不過我無大聲鬧番佢   只係合實對眼同佢講   妳可唔可以聽埋我講先呀   嚇到媽咪同工人呆住望實我   之後媽咪聽完我講就好驚咁哦哦哦    諗起都好笑   之後同番家姐講   佢話媽咪好驚同我講嘢   話我惡呀   哈哈   但其實媽咪係好多嘢同我講嘅   因為佢打嚟   我會問佢食咩呀   做緊啲咩呀   睇咗咩電視咁嘛   好溫柔咁問㗎   哈哈哈哈   唔係真係 Say Hi Say Bye 呢 ~

今晚又拎咗湯 +  2 個巨蕃鬼荔枝 + 幾隻牛奶蕉   袋又重   真係好 Balance 喇 ~

賤物鬥窮人   喺惠康買 2 卷 Andrex 紙巾送 8 罐忌廉呀   所以我又買 2 條   最勁係唔駛叫里奧大人幫手   一手拎袋同廁紙   另一隻手捧住汽水   所以番到屋企   對手好似斷咗咁 ~

里奧大人 7 點半就放工   買咗唐記番屋企食   我講明話唔好預我   之後佢見我又買汽水   我話送架   佢居竟然唔信   因為我好鍾意飲忌廉   以為我又買   不過咁又係嘅   買廁紙送汽水又真係幾搞笑嘅   我覺得送番啲日用品又 Match 啲   哈哈 ~

今晚里奧大人唔做公司嘢   仲食薯片飲啤酒添   搞到我又食喎   薯片好難忍口家嘛 ~