翠河餐廳 @ 九龍灣 ( 2-MAY-2015 )

生炒排骨 - 呢個我叫㗎   見到人哋食好似好正咁   因為我好少主動叫生炒排骨呢

豆豉鯪魚油麥菜 - 真係食足九十九年   最慘係無味   又油喎   都唔明點解仲要叫嚟食

黑椒美果牛柳粒 - 一般啦  

鎮江骨 - 水姑係都叫嚟食   其實 3 個餸都食唔哂   最後佢又打包   之後放入雪櫃   擺到唔知幾耐又掉   唉

( 2-MAY-2015  SAT )

起身番工嗰下   開心到呢   哈哈 ~

早餐食奶油脆豬   好好味呀 ~

無 Mood 呀   所以唔做 Report 住   Load 哂相先做   揀到 11 點   眼又濛又想嘔   所以做番 Report 喇   哈哈 ~

想去買遮臉罩同背囊   咁里奧大人話出去波鞋街睇下喎   咁好啦   放工即坐小巴出去   等咗幾架車先上到車   勁驚無車呀 ~

我出到去旺角   里奧大人先啱啱有小巴咋   咁我一路行一路等啦   終於搵到個遮臉罩   不過等埋里奧大人一齊睇先買 ~

行下行下都已經 1 點 40 分喇   勁餓呀   可能又焗熱   我直頭有啲暈暈哋嘅感覺   咁啱去緊鉅記   諗住試食杏仁餅   不過等過馬路時   見到里奧大人坐喺小巴入面   我即停低對佢揚手   佢又見唔到   咁車入面個女仔知我想叫里奧大人   諗住叫啦   架車又開前咗少少   之後又停   我又再揚手   好在里奧大人都諗住落車   唔係有排塞 ~

好在拖住佢都好啲   起碼暈都有人知嘛   哈哈   之後即搵嘢食喇   想食削搖麵辣菜甫   不過無位   即轉場喇   去食海南雞飯   雖然地方勁迫   但估唔到食物都幾有驚喜 ~

牛丸湯金邊粉 - $23/碗   抵啦  同埋好味喎   有驚喜   哈哈 

泰妃雞飯 - 油飯好味   啲雞都滑   不過我唔想食啦    

個汁酸酸辣辣都唔錯  

椰汁涼粉冰

食完就充滿力量   搵唔到心水背囊   所以就去買遮臉罩喇   $289 有 9 折   好在有折   我依家行山唔敢搽 Cream 同防曬   試過幾次流哂汗   之後塊臉即敏感   但有次無搽 Cream 同防曬   流完汗都無敏感呀   但勁驚出斑囉   好大鑊嘛   所以一定要買遮臉罩呢 ~

買完嘢就叫里奧大人陪我行花園街   呢下感覺到佢對我勁好   佢次次都企喺 Boutique 門口等我   條街好焗嘛   但佢點都唔入 Boutique   話多人呀   哈哈 ~

真係次次佢要買嘢比我   就一定要買到為止   今日超感恩   因為間舖頭要搬   做清貨價   買咗件防水風褸   款同料都唔錯   真係無諗過只係 $100   因為去舖頭睇   起碼要 $800   但我又唔捨得買   因為我其實唔太鍾意風褸   哈哈   但係諗住去旅行着   所以要買囉 ~

買完再去買 4 碗芝麻糊番屋企   坐小巴真係好快   想坐耐啲都唔得   哈哈哈哈 ~

番到九龍灣已經 5 點   咁想去麥記飲咖啡呀   清埋最後一張 Coupon   我真係太論盡   拎咗張 Coupon 同 1 個十蚊銀放喺枱   咁我見到梳化枱有人啱啱走   我即飛去坐啦   之後玩玩下手機   先醒起無拎張 Coupon 同大蚊銀   勁心痛呀   後尾都係問番啲阿姐有無見到 ?!   好感恩阿姐收埋咗   咁我就唔駛蝕喇 ~

飲完抖陣就番屋企開機洗衫   再飲埋湯   今晚去舖頭   所以約埋水姑食飯   差唔多 8 點半先出門口   搞掂哂就去食飯喇 ~

紅蘿蔔牛蒡粟米豬骨湯

10 點半先番到屋企   勁攰呀   沖埋涼   抖咗陣就 Share 食一碗芝麻糊   12 點幾先瞓 ~