鹽酥雞 + 喇沙即食麵 ( 15-MAY-2015 )

( 15-MAY-2015  FRI )

如果一星期番五日   妳話幾咁好呢 ~

今朝一出屋企門口已經好熱   想流汗咁   之後一路行真係覺得好鬼熱   咁上小巴   個八達通又嘟唔鬼到   "交易未完成"   諗住落車再嘟   但司機叔叔話叫我再嘟   話成日都 "交易未完成" 喎   咁再嘟都係唔得   所以要拎張八達通出來嘟   真係要講聲唔好意思喇   成車人等我   之後唔知係咪頭先緊張得滯   成身汗呀   咁我一路都同緊家姐傾電話家嘛   佢都話好鬼熱   行兩行就流汗   唔知係咪更年期   我話佢黐啦   流汗就更年期   8 卦夠成日熱到出哂汗啦   唔通佢又更年期咩 ~

食完早餐   諗住用 Coupon 買紙巾   估唔到又買到 "癲噹" Tempo   勁開心呀   又唔知係咪興奮得滯   行番去菇場搭電梯   我 Feel 到個頭都係汗   感覺好似徑完步咁呀   爭在無喺髮尾滴落嚟呢 ~

之後洗杯   渠王無啦啦講話今日超焗   企喺度都流汗呀   阿齋話我最勁   因為仲着中袖衫   但我唔知今日會咁鬼焗嘛   好在菇場冷凍夠哂凍   涼多陣就要着番件褸   唔係會凍死 ~

菇場唔忙   不過西瓜成日碌嚟碌去   都唔係點上網   個 Window 又開又關好煩   哈哈 ~

今日有 Lunch Box   食食下個炒飯覺得好腥咁   咁尋晚炒飯都有落魚露嘛   但越食壞腥咁   大佬   勁驚係壞呀   之後先醒起   尋晚食剩咗啲三文魚擺咗喺飯底   下次都唔帶魚喇   陣味真係好難頂 ~

差唔多食完嘅時候   阿齋同我講話 759 又有 7 折   所以我即洗碗即行動喇   哈哈 ~

番到菇場都差唔多要開工喇   忙下停下   咁都好   有啲細藝 ~

放工番屋企 lu   預備好晚餐就開機洗衫   今晚里奧大人 7 點半放工   咁我等埋佢一齊食   因為煮麵   唔想分開煮   哈哈 ~ 

買下買下   買咗咁多零食    

         
是日晚餐 - 鹽酥雞 + 喇沙即食麵

鹽酥雞 - 好有心機半煎炸   係最驚啲油彈落手   勁鬼痛呀   又要用隻手掩住塊臉   一手掩臉一手煎嘢   真係勁想帶個頭盔   咁就唔駛驚啲油彈落隻眼度喇 ~     

喇沙即食麵 - 今次唔落包奶   好味好多啦   不過啲麵條真係好鬼滯   食到最尾 1/3 真係要抖陣再食咁呢 ~

搞掂哂都 9 點   唔徑步喇   我想休息 ~

沖埋涼就睇雜誌   11 點幾都瞓喇   始終平日都慣咗呢啲時間瞓   早睡早起都好嘛   但我以前嘅同事就話 "早睡早起快啲死"   幾咁衰呀   哈哈 ~