黑椒牛柳粒 + 海螺片扒生菜 ( 3-MAY-2015 )

( 3-MAY-2015  SUN )

今朝 9 點半起身   沖埋涼就落去食早餐 lu ~

番上屋企抖陣就番教會喇   奉獻完就去剪頭髮   今次到我頂唔順   因為啲頭髮成日整到眼皮   所以好鬼痕   其實自己都可以剪   不過無咁靚   反正都想修修啲髮尾嘛 ~

比里奧大人剪先啦   佢坐喺我隔離   我想打比媽咪   但唔小心打咗比佢   佢問我乜事 ?!   哈哈   髮型師都話我哋唔駛咁恩愛呀嘛   要理下佢感受好喎   哈哈 ~

里奧大人剪完頭髮就番屋企做公司嘢   終於到我剪喇   咁我索性剪埋後面啲頭髮   之後當堂成個人精神哂 ~      

剪完都 2 點幾   咁食 Tea 喇   今晚想早啲食飯去徑步呢 ~

食完就自己去街市買餸   今次勁呀   我揀節瓜嘅時候   有個女人問我點揀節瓜 ?!   見我好識揀咁話喎   最搞笑佢扮埋我嘅動作   拎起節瓜擰下前擰下望   望完又放入籃   哈哈   我話揀啲多毛㗎咋   唔好揀啲光脫脫嗰啲   好似揀奇異果咁囉 ~        

買下買下   成個環保袋爆哂   買咗 12 磅嘢番嚟   雖然重   但之後呢兩日唔駛去街市買菜   勁正 ~

抖到 6 點半就預備喇   7 點幾可以開飯 ~

是日懶餐 - 黑椒牛柳粒 + 海螺片扒生菜  

黑椒牛柳粒 - 媽咪上星期四喺 Taste 之前買比我㗎   今晚一定要食   都幾好味   下次自己買嚟食先 ~      

海螺片扒生菜 - 真係完全唔記得買過海螺片   好在比我無意中見到   咁啱今晚又煮生菜   實在太好喇 ~    

洗埋碗   抖到 8 點 45 分就同里奧大人一齊出去徑步   徑半個鐘就走喇   勁焗熱   流咗成身汗呀   番到屋企再沖熱水涼   勁舒服呀 ~ 

今晚差唔多 12 點先瞓   希望聽朝有精神啦   哈哈 ~