紅腸炒油麵 + 蒜蓉油麥菜 + 牛大力牛蒡豬骨湯 ( 28-MAY-2015 )

( 28-MAY-2015  THU )

好嘢   又到星期尾喇   同埋今日有小小陽光   人都精神啲呀 ~

唔係好餓就食奶醬多啦   懶得諗 ~

菇場唔忙   同 8 卦睇團購   又係無着落   哈哈 ~

咁好天氣   當然要出去食啦   食完再行陣先番菇場呢 ~

食河粉真係好滯   所以雖然已經 3 點   但都忍唔住要飲杯茶消消滯呢 ~ 

悠悠閒閒咁等到放工   但之後就忙啦   要去街市買餸   真係忙過真正番工   哈哈 ~

番到屋企都 6 點半喇   熱到死死下   成身成臉汗   出汗程度同徑完步無分別 ~

預備好晚餐再煲埋冬瓜祛濕水   都已經 7 點半放工   諗住煮完就出去徑步   等埋里奧大人一齊食   點知佢咁啱放工   又問我徑唔徑步喎   咁好啦   一齊食完先徑啦 ~

是日懶餐 - 紅腸炒油麵 + 蒜蓉油麥菜 + 牛大力牛蒡豬骨湯 

紅腸炒油麵 - 買咗 $8 紅腸   不過下次唔買喇   口感好怪 ~  

蒜蓉油麥菜 - 今晚只得一個爐頭   所以要淥菜   最緊要快 ~  

牛大力牛蒡豬骨湯 - 媽咪煲㗎   我依家都好少煲湯同滾湯   因為里奧大人夜番   飲埋湯一陣半夜去廁所仲煩   但媽咪煲咗就要飲啦   我真係覺得湯水好重要   好記得初初結婚無湯水飲   阿姐話我塊臉好黃呀   嚇死我   因為我做女時   真係晚晚有湯飲嘛   所以我之後要學識煲湯   第一個湯係節瓜鹹蛋滾湯    第二個湯係青紅蘿蔔豬骨湯   呢個湯夠經典   因為我開住蓋嚟煲湯   煲剩一碗   哈哈 ~   

搞掂哂都 9 點   開埋機洗衫   抖多 15 分鐘就出去徑步喇 ~   

                             

超級勁熱   所以徑半個鐘就番屋企喇   沖咗個涼   之後晾衫啦   晾到出哂汗   黐鬼線   又要再沖多次    我頭先最後用凍水沖身   反而仲熱過用暖水沖身咁   好在無搽 Cream 住咋   唔係嘥哂啲嘢   哈哈 ~    

今日晏晝 3 點幾飲咗杯茶   11 點 45 分都唔覺眼瞓呀   不過點都要瞓啦   聽日仲要番工嘛 ~