鐵板吉列咖哩豬扒定食 ($65) - 吉列豬扒煮哂啲咖哩味 完全唔脆啦 所以變咗好難食
野菜豚肉湯 (細) - 食咗呢間幾次 但原來每 Set 都有個豚肉湯㗎 但點解無之前比我哋嘅 ?! 不唔就算佢有 我都唔會要 因為蘿蔔同豬肉口感係霉嘅 我飲咗 2 啖 真係頂唔信 無辦法再飲落去
吉列豬柳泡菜湯烏冬鍋 ($69) - 呢個湯烏冬好食 熱辣辣 但我晏畫食完酸辣米線 所以夜晚唔想食濕嘢 哈哈
綠茶好立克 (+$10)
( 31-DEC-2015 THU )
尋晚 Feel 到有人幫我蓋被 仲以為發緊夢 原來真係里奧大人幫我蓋被 佢話覺得凍咗喎 咁半夜真係凍咗嘅 因為我記得我發夢同人講話有被蓋住係幾咁舒服溫暖呢 究竟係夢定現實嚟㗎 ~
話咁快就過咗一年 我尋晚先同里奧大人講 番埋聽日 星期五又放假 上星期又係星期五放假 但我覺得好似前日放完咁咋噃 ~
今朝凍咗 但又有陽光 呢啲天氣真係超級勁舒服呢 ~
8 點半家姐打嚟 話聯合醫院打比佢 嚇死佢 但佢咁講 我都比佢嚇死啦 原來係嗰次媽咪出院比漏藥 叫媽咪攞番 但媽咪又唔開電話 好在工人聽到電話咋 所以食完早餐就同媽咪一齊去醫院拎番啲藥 晨早流流又要我激氣 媽咪係用平安手機嚟 有咩事一按制就知道佢位置 呢樣嘢係好緊要 但成日又唔帶電話 咁有咩意思呢 ?! 之後我又同家姐講話真係都費鬼事理佢 ~
咁阿姐知我傾緊電話 所以唔問我食咩 但都 8 點 37 分喇 要叫早餐喇 咁我叫家姐等陣 我叫咗早餐先 之後我叫完早餐 佢即問我食咩 我話正常應該妳係會繼續講落去 唔係問人食咩囉 又問八卦嚟唔嚟 邪到問完即刻收到八卦 Whatsapp 叫我幫佢叫定早餐 ~
菇場忙咗陣就可以 Hea 過 呵呵 ~
12 點半收到 Email 通知放 4 點 超勁開心呀 所以要買酸辣米線慶祝 哈哈 ~
本來諗住送表表機㗎 不過佢 6 點半先到機場 咁唔送喇 同埋佢唔想我哋咁趕 加上佢哋一陣 Check-in 又要排隊 可能真係連偈都傾唔到 咁仲慘 哈哈 咁唯有下次再見啦 希望可以好快見到呢 ~
4 點即走 里奧大人 2 點半去太子見客 所以佢 4 點鐘都番到屋企 lu ~
2015 年圓滿結束
我諗住熨埋 3 機衫啦 熨咗幾件 個熨斗無啦啦又漏水 肯定係壞啦 今年 1 月買咋喎 諗住八百幾蚊會襟用啦 點知一年唔夠已經壞 所以以後唔用 Tefal 呢隻牌字呀 對佢實在太無信心喇 ~
飲埋湯就抖陣 之後睇下雜誌 Hea 過 唔錯唔錯 哈哈 ~
尋日特登再買比表表嘅零食 但我真係食唔到咁多 所以要分比人呢
6 點半出去食飯 之後里奧大人話要食雪糕 話頭先個泡菜烏冬好辣喎 ~
着綠色衫食綠茶雪糕特別好味啲咁呢 哈哈
食完去德福行陣 里奧大人買咗 2 對 Florsheim 嘅皮鞋 ($1,360 + $1,480) 折上折再減 $100 所以只係 $1,973 都算抵呀 咁之後再去買埋埋熨斗就番屋企喇 ~
番到屋企即沖涼 之後熨番 3 機衫 熨完就預備心情等倒數喇 ~
喺豐澤買嘅 PHILIPS 熨斗 ($738) 希望襟用啦
唔想用神睇雜誌 但又驚瞓鬼着 所以開電視睇 點知仲悶 哈哈 ~
11 點開始半同阿 Mi Line 傾偈 因為個人開始呆呆哋喇 哈哈 同埋我同佢其實都已經好鬼眼瞓 哈哈 但點都要頂住 所以話一倒數完就即瞓呀 ~
本來話等埋阿表安全到埗先瞓 但對唔住 真係頂唔到 哈哈哈哈 ~
一到 12 點就收到好多 MSG 覆埋睇埋都 12 點幾 好鬼攰呀 覆完即瞓喇 ~
北海道珍珠飯 + 元祖天津蛋 + 王將咖哩汁 (Step 1 + 3 就 $45)
我哋要吉列豬扒 (Step 4) 所以加 + $18 - 好味呀 下次會再嚟食 哈哈
我哋再要埋餃子 (Step 5) 所以再加 $18 食一個 Set 要睇 5 個 Step
蒜片牛柳粒鍋 (配北海道珍珠米 / 豆腐味僧湯 / 漬物) ($78) - 晴晴鍾意食 所以叫比佢食
香辣野菜豚肉醬油拉麵 ($68) - 都幾好味
( 30-DEC-2015 WED )
原來又已經星期三喇 放假放到都唔記得星期幾 只係記得要番工 ~
咁之後嘅星期五又係 1 月 1 日 如果星期六 Off 就好啦 又可以放 3 日 如果聖誕節開始請假到 1 月 1 日 即係請 4 日就連放 10 日 真係好正呢 ~
早餐無咩胃口 食奶醬多算喇 ~
菇場唔忙 認真清哂所有嘢 真係一身鬆哂 呵呵 ~
Lunch Time 出去入票 之後食粥 食完即去買零食比表表 半個鐘頭行咗 2 間超市同 3 間零食店 我覺得自己好勁 一頭一尾喎 買嘢呢個原動力 真係零舍不同 哈哈 ~
番到菇場覺得勁熱勁攰呀 哈哈 好在無嘢做 可以抖下 ~
放工去拎中藥 今晚拎兩日喇 驚聽日無時間拎呢 ~
再行多兩間超市就番屋企 我覺得對腳好似就嚟斷咁 哈哈 ~
開完機洗衫就諗住熨衫 點知將熨斗平放喺熨衫板 咁我行開咗 30 秒之嘛 估唔到成個熨衫板濕哂 咁熨唔到啦 個天都想我休息下呢 ~
晴晴今晚嚟我屋企 Print 嘢之後 Scan 比學校 但無哂 Ink 所以里奧大人準時放工 再去深水埗買 Ink 咁晴晴放咗工 差唔多 7 點半就上到嚟 佢喺九龍灣嘅時候打比我 問我食唔食西餅 我話妳唔係當我係阿婆 上嚟屋企要買西餅比我呀嘛 我覺得佢好婆仔囉 講 "西餅" 大佬 講 Cake 吖嘛 哈哈 之後佢話其實佢肚餓 想食件西餅 但驚肥 咁我話買一件 Share 食啦 佢又話都係唔好喇 問完又話唔好 問嚟做咩喎 哈哈 但咁似我嘅 ~
佢上到嚟之後見到筒綠茶餅就即開嚟食 仲話我屋企超多零食 好在里奧大人唔喺度咋 唔係又嘈嘈嘈 ~
佢睇八卦雜誌見到有人離婚 咁我話如果父父出面有女人 妳會點呀 ?! 佢話會好嬲父父 之後我話如果舅母同父父離婚 咁會唔會嚟探舅母㗎 佢好大反應話一定會啦 之後話妳哋點會離婚㗎 哈哈 無聊問下啫 希望佢唔好認真去諗啦 哈哈哈哈 ~
里奧大人 7 點半打嚟話喺黃大仙 咁我同晴晴都去吉豚屋攞位 lu ~
點知要等 11 張枱 我哋唔等喇 轉去大阪王將睇睇 坐出面就唔駛等位 我係驚晴晴凍啫 不過佢話唔凍 咁我哋坐出面喇 ~
晴晴喺澳洲成日食 Pizza 所以唔肥都難啦 咁佢番嚟香港呢兩個月 佢媽咪就話佢要減肥 唔好食炸嘢唔好食油膩嘢 但今晚話食吉列豬扒 佢好驚 但其實佢好想食 我咪同里奧大人講囉 減肥無問題 戒口都無問題 但忍住唔食就有問題囉 明明鍾意要抑壓住 情緒受影響呀 可能我肥開啦 同埋晴晴咁後生 新陳代謝快 食少少完全無問題 又唔係餐餐咁食 同埋我覺得做運動就最好 又健康 唔係單單節食囉 ~
我之前嘅髮型師 晚晚食 2 個飯盒 但身型 Fit 到爆 因為佢會每晚做 Gym 或者去跑步 人咃開開心心咁食 開開心心咁減 咁先身心健康家嘛 依家搞到晴晴啲方向錯哂 唉 ~
食完就番屋企整嘢 我叫晴晴等埋我沖完涼先好走 哈哈 ~
之後佢仲整緊嘢 我壓低咗把聲問晴晴 "晴晴妳幾點走 ?! 因為開住電視 驚晴晴聽唔到 之後里奧大人話做咩咁惡 ?! 因為晴晴真係好驚咁答話仲整緊 哈哈 我話無尾音問人嘢 原來真係好惡 Sorry 呀 但其實因為我想切生果比佢食 想佢食埋先走 我點會咁惡對佢喎 ~
咁啱尋晚媽咪比咗香梨同蓮霧比我 原來晴晴好鍾意食香梨 咁就好喇 難得佢鍾意食 ~
晴晴無啦啦想借我部手機睇下 仲以為佢想打機添 原來佢睇我手機有無佢澳洲電話 如果無就幫我入番 我話無又點用妳 Whatsapp 喎 之後里奧大人話又唔見妳驚父父無佢手機號嗎 哈哈 ~
整到差唔多 10 點半先搞掂呀 我比錢佢搭的士又唔要 話搭地鐵好方便 佢真係大個女喇 但番到屋企點都要打比我報平安囉 ~
里奧大人 11 點唔夠話瞓 我話晴晴都未打電話嚟 點可以瞓呀 之後講完晴晴就即刻打嚟 咁我哋之後都即刻瞓喇 哈哈 好鬼攰呢 ~
薑蔥魚雲煲 - 好鬼鹹 所以媽咪之後話食多嚿 我唔比佢食 之後佢話浸水 我話油林林浸水 咁食嚟做咩呢 ?!
灼海蝦 (12 兩) - 都幾大隻 同埋好彈牙
貴妃雞 (半隻)
( 29-DEC-2015 TUE )
好攰呀 完全唔想起身番工呀 哈哈 ~
今朝遲咗出門口 真係遲 5 分鐘就唔同世界㗎喇 度度都好鬼多人咁 所以今朝一定係食三文治 最緊要快呢 ~
菇場所有大粒唔喺度 加上唔太忙 感覺上可以抖下 同埋我真係頭重重 塊臉又敏感 搞到我都無咩心機囉 ~
Lunch 食超米算喇 之後阿齋問我出唔出街 我話唔想出街 佢話勁唔似我呀 因為我平時成日話出去行下呢 哈哈 ~
3 點左右頂唔順 咁沖杯齋啡飲啦 苦鬼到呢 真係飲中藥都無咁苦呀 所以我成個人醒哂啦 ~
放工去媽咪屋企分藥 之後媽咪同我講話叫家姐唔好番屋企 直接去客家好棧 我話咩客家好棧呀 ?! 妳叫分藥所以去嘉華嘛 之後媽咪話唔記得 我咪慶囉 話佢成日坐 又懶 記下嘢啦 唔好乜都旨意工人 就算依家分完藥 妳自己都要睇下係咩藥 唔係人比妳就食 做下運動 血氣好之餘 妳個腦都清醒啲啦 其實我依家對媽咪已經無耐性 我覺得好多嘢應做唔做 唔應做就特登去做 同埋我話我依家唔會理妳㗎喇 妳鍾意點就點 我費事煩 所以工人同我講媽咪點點點 我都話是但佢啦 佢鍾意點咪點囉 工人係好無奈㗎 但我真係唔想次次見親媽咪都好勞氣 反正話咗又唔聽 我真係唔需要知道妳點囉 ~
媽咪話個鼻哥好痛 之後工人話佢晚晚飲個椰青 話好口渴 咁我即上網睇 如果飲得太多都會燥熱 咁妳啲咪自己攞嚟衰囉 飲唔係問題 妳都無理由晚晚飲啦 飲水係口淡淡 但成日飲啲甜嘢都唔好啦 一陣糖尿病翻發就煩 但佢咁都唔驚 我都無辦法 之後佢叫我唔好掂佢鼻哥 我話鬼得閒掂妳咩 因為平時如果佢唔舒服 我實摸下有咩事 依家唔會㗎喇 我懶得理 lu ~
去到酒樓無耐 家姐都到 lu 原來已經 7 點幾 ~
家姐話同事比佢食 佢留番比我食
食完就同家姐行一陣 佢成日都搵利口樂 之後我話買比佢 佢又話唔要 我話佢成日講 一定係想食 不過要排隊 所以我唔買住喇 想番媽咪屋企先 ~
肌研透明質酸潔面乳 ($79) 75 折之後 只係 $59.25 所以即買 咁啱屋企支潔面乳差唔多用完呢
坐多陣都 9 點喇 咁拎埋生果同西洋菜湯就走喇 ~
我同家姐講話我依家唔會勞氣 家姐都話勞氣都無用 仲話媽咪成日講大話 明明飲茶咪飲茶囉 又呃人唔知食咩 最衰係講又唔聽 聽話都好 所以我地話是鬼但佢啦 唔係一個人做事 兩個人激氣 唔化算 我無理由真係每星期都激氣一次家嘛 我驚我好快死 我前排好擔心媽咪 又好激氣 真係甩咗好多頭髮 大佬呀 頭髮已經唔多 真係好驚甩鬼哂囉 所以我要學識放手 最緊要比媽咪知道 妳已經唔會令到我緊張妳 一齊嘅所有嘢 係妳自己攞嚟 唔係我冷血 而係我要做嘅已經做凸 呢半年我個心好攰好攰 我都需要抖抖呢 ~
里奧大人今晚 8 點先放工 所以佢番嚟屋企無耐 我都番到 佢仲話我早添 哈哈 ~
擺好哂生果同湯入雪柜就開機洗衫 之後即沖涼 ~
諗住熄電視同里奧大人傾啲嘢 點知佢又唔知放咗個 Remote Control 喺邊 搵咗 5 分鐘 我覺得佢真係好煩 成日啲嘢周圍擺 所以如果我見到 我都唔會同佢講 由佢自己慢慢搵 其實我最想佢搵唔到 呢啲係一個教訓 大佬 今晚心情已經唔好 仲咁樣 真係想爆粗 所以之後都唔
想同佢講嘢 覺得佢好很煩 已經唔係第一次整唔見 Remote Control ~
我整好哂影子啲手信就抖陣 之後阿仔打嚟教我玩 Pokopang 又傾咗半個鐘 佢話佢之前 Download 太多 Game 拎 Free Coins 所以唔知係咪電話中咗毒 佢話間唔中同朋友傾電話 個電話無啦啦會發出嘭嘭嘭聲 嚇鬼死佢 但我覺得好搞笑呀 哈哈 ~
晾埋衫 抖陣 差唔多 12 點先瞓呀 ~
炸蘑菇
香煎蟹肉餅沙律 - 個蟹肉餅好鬼漏
肉醬味肋骨雞槌拚盆
芝士白汁海蝦寬條麵 - 辣辣哋幾好味喎
雪糕朱古力軟餅 - 呢個我一定要叫比表表同小寶食
( 28-DEC-2015 MON )
今朝 9 點起身喇 食埋早餐 里奧大人就去睇醫生 因為隻腳仲有啲痛 佢話醫生睇都唔睇佢隻腳就介紹骨科醫生佢睇 所以佢一番到嚟就嬲爆爆咁 哈哈 ~
番到屋企就整呢樣嗰樣 11 點先出發去坐 619 等咗好耐車 之後再轉 603 最終都係 12 點 20 分左右先到碼頭 不過表表嘅粥仲未到 所以我哋坐喺碼頭等佢呢 ~
今日天氣又係灰灰暗暗 尋晚又夜瞓 有啲攰 哈哈 希望表表佢哋唔攰啦 ~
我哋坐 12 點 45 分嘅[快船 1 點 25 分已經到長洲 lu ~
唔想太晏食 Lunch 所以即去食嘢 食下傾下 時間過得好快 呢餐麻麻哋㗎咋 希望佢哋鍾意食啦 哈哈 ~
叫咗 1 支大藍妹
唔知咩例湯
小寶急不及待 哈哈
蒜蓉蒸蝦
椒鹽鮮魷
避風塘炒蟹
蒜蓉蒸扇貝
豉椒炒蜆 (加辣)
蒜蓉炒芥蘭
芒果糯米糍 x 3 - 嚟到長洲 當然要表表同小寶食番隻芒果糯米糍啦
唔太熱 所以坐出面
咁差唔多食完 里奧大人話去洗手間 之後表表無啦啦好緊張 細細聲同小寶講話無咗張單 咁小寶仲手持蟹腳 食到 lam lam 脷家嘛 嚇到佢即刻抹手走去比錢 笑鬼死我 其實表表同小寶唔係咁緊張 我都唔知原來里奧大人係去咗埋單 哈哈 ~
之後行陣 表表想買平安包 小寶就掃咗雞仔餅同合桃酥同埋一包唔知咩來 好奇怪小寶好少會咁主動買嘢食家嘛 原來佢買比同事食嘅 ~
買完都 4 點 經過允升就食埋甜品先 估唔到要等位 諗住平日 不過其實好多學生都放緊假 哈 ~
感恩等咗無耐就有位 表表相機塊唔知咩玻璃片甩咗出嚟 所以里奧大人即出去買 AA 超能膠 咁坐喺度黐實都好啦 起碼唔駛企喺街度咁大風 又多塵 ~
糖不甩 / 楊枝金露
芒果糯米糍 (紫糯米皮) / 芝麻芒果腸粉
芝麻糊豆腐花 (凍)
呢餐又係小寶請我哋 真係太客氣啦 表表唔知係咪喺出發前一星期 練定好啲眼力 再叫小寶練定好身手鬧快比錢呢 哈哈 ~
食完諗住行去小長城 經過海灘又影下相 都未去到小長城 表表話已經 5 點 唔怪得個天咁黑啦 咁去小長城喇 因為來回起碼個半鐘呢 ~
喺度釣魚 ?! 實在太神奇喇
咁打道回府啦 想同表表食大魚蛋 其實我都未試過 估唔到真係好味喎 呵呵 ~
好多人排隊
好幸運呀 因為呢兜係最後呢 我地買完之後就無得買 lu
貓貓都聞到魚香味 哈哈
熱辣辣
拎到 "呢咁 Hea" 哈哈 因為好鬼熱呀 又驚趺喎 我哋食咗大魚蛋 / 細魚蛋 / 墨魚丸 / 鯪魚球 但我地一致認為最好味係墨魚丸呀 哈哈
大魚蛋好彈牙呀 又唔腥 都好好味
咁一路行去碼頭 一路聽小寶講鬼故 佢又細聲 真係要黐到好埋先聽到 人哋唔知以為講咩驚天大秘密咁 哈哈 ~
佢好勁呀 居然唔驚鬼 仲一路講一路笑 我覺得佢好似講緊笑話咁 同埋佢講鬼故之前加多句係 "真人真事" 嘩哈哈 喺你身上發生 我都知係真人真事嚟嘅 哈哈 ~
之後坐大船出碼頭 咁架船就定好多 表表無咁辛苦呢 ~
再搭地鐵去銅鑼灣 Outback 其實我真係唔知銅鑼灣有咩好食 我來來去去都係食南記同 Outback 所以今次好懶 仍然帶表表去 Outback 希望佢哋鍾意食啦 ~
8 點到 Outback 估唔到要等位 好感恩等咗 10 分鐘左右就有位 ~
一路食一路傾 無啦啦有一剎那好眼瞓啊 燈光太昏暗 加上有啲攰 呆咗幾呆之後都清醒番噂 咁真係要搵人講下嘢 又輪到小寶繼續講佢工作上嘅 "真人真事" 啦 好在我真係唔眼瞓咋 唔係加埋佢啲聲調語氣 我會即瞓着 哈哈 ~
10 點半 Last Order 真係唔經唔覺又兩個幾鐘 小寶無啦啦話去洗手間 但佢啲戲實在太差了 哈哈 大佬呀 佢同里奧大人今日成日都話去洗手間 去到真係唔知真去定假去 哈哈 不過咁 小寶第時一話去洗手間 我哋就知咩事 lu 呵呵 ~
同表表一齊搭地鐵啦 不過我哋係搭唔同嘅路線 所以一路扶手電梯之後就要分手喇 當然要攬下先啦 真係唔捨得佢哋 好似見完無耐就要走咁 堅期待下次我哋可以 6 個喺馬來西亞相聚呀 ~
番到屋企都即沖涼 又 12 點先瞓 聽日仲要番工 希望夠精神啦 呵呵 ~
