元氣壽司 (外賣) ( 9-DEC-2015 )

( 9-DEC-2015  WED )

尋晚瞓覺嗰陣   個肚又痛   雖然唔係扯住   但都唔舒服囉   都唔知痛咗幾耐先瞓到添呀   所以今朝起身都幾攰 ~

里奧大人今朝上大陸   咁我瞓到 8 點先起身番工 ~

叫咗芝腿治 + 奶茶   不過飲咗半杯奶茶已經好飽   所以芝腿治就打包   希望一陣有胃口食啦 ~

菇場超級勁忙   因為 Hold 咗 2 日嘢未做   好在個肚唔痛   可以開行 Turbo 做喇 ~

做到 Lunch Time   但無胃口食嘢   咁上下網咁啦   個肚無啦啦又有啲痛   可能太緊張   所以又食包馬玉山芝麻糊暖暖個肚   不過只飲咗半杯咋   真係飲唔落呢 ~ 

做呀做   真係超級勁攰   放工先嚟咬幾啖芝腿治   其實凍鬼哂好難食 ~

勁攰呀   所以今晚打的去醫院探媽咪   順便兜埋工人   咁樣我覺得抵啲   哈哈 ~

居然塞車   坐咗 $70 的士   勁肉赤   嗚嗚 ~

見到媽咪聞氣仲係 4 度   但抖氣都無咁辛苦   又有啲胃口食嘢   咁我個心都安樂啲 ~

諗住等姑娘   等到 7 點 55 分都未到   咁我同工人都走喇 ~

無啦啦落大雨   好在又唔係話好凍咋   唔係真係好易冷親   今晚等咗 15 分鐘車呀   所以成個背囊濕哂   嗚嗚 ~

我真係好驚啲人開 Speaker 聽口訊   因為真係好嘈   同埋我成日覺得全世界人都知對方講 d 咩   咁好肉酸啫   今晚堅喇   坐我前面嘅阿叔呢   開住 speaker 好享受聽每一個口訊   最難頂係對方係鄉音人   仲要聽到佢話: 我電你   你又唔受我電"   我聽完勁想嘔 ~

好啦   佢聽哂就諗住靜番哂啦   點知後面又有個阿叔開 Speaker 傾偈   對方又係鄉音人   話做咩今日電話唔通   Whatsapp 又唔覆咁咁咁咁   之後個女人又講唔知咩咩咩   頂   嘈鬼到呢   好在我要落車   唔係人都顛 ~

里奧大人 8 點番到九龍灣   我話想食玉米蝦船   所以佢去元氣買壽司番屋企食呢 ~

食完抖陣就沖涼   唔知係咪飲咗葡萄適同寶礦力   11 點幾都未眼瞓   不過唔瞓唔得啦 ~