煎鷹鯧魚 + 茄子蒸臘腸 ( 3-DEC-2015 )

( 3-DEC-2015  THU )

今朝有啲熱咁   不過都帶定長袖外套   好似話今晚會落雨   咁即係又會凍番呢 ~

勁想食甜嘢   所以去食菠蘿油   今次食哂塊牛油   不過好鬼滯   下次都係咪搞喇 ~

菇場忙呀   希望快啲到家鄉啦   唔想日日對住啲煩嘢 ~

今日要去超市買嘢   所以都出去食   同埋菇場好鬼凍   凍到對手都僵硬哂   但已經係咁打字係咁郁   對手都仲係咁凍囉 ~

諗住比錢埋單   點知原來唔記得帶銀包   所以我同收銀話不如留低公司卡或者電話   我轉頭即刻比番錢   不過佢好好人   話轉頭比番錢就得   之前里奧大人去麻酸樂食早餐唔記得帶銀包   個收銀叫佢留低電話   但個經理叫里奧大人轉頭比番錢就得囉   所以里奧大人話我呢間好好人呀   哈哈   其實依家有 CCTV   走數會比人 Cap 出嚟㗎   因為八方雲集同譚仔三哥都成日 Cap 相話人唔找數架 ~

番到菇場即拎銀包走人   比完錢就再去超市買嘢   之後番菇場喇   咁膝法好鬼攰   哈哈 ~

菇場忙下停下   咁都好   可以抖下 ~

放工落毛毛雨   所以凍咗好鬼多呀   好在今晚唔駛去街市買餸   可以直接番屋企 ~

番到屋企即熨衫   里奧大人 6 點 45 分放工   所以仲有啲褲都唔熨住喇   要預備煮飯喇   因為今晚要煎嘢   要多啲時間呢 ~        

是日晚餐 - 煎鷹鯧魚 + 茄子蒸臘腸

煎鷹鯧魚 - 媽咪尋晚買比我同家姐架   我好鍾意食鷹鯧   夠哂厚肉又唔多骨   但我就最驚煎嘢囉   煎完成屋都係煙   同埋廚房會一陣腥味咁   所以次次煎完嘢之後   一定要噴番 d 香嘢   唔係真係頂唔順囉 ~ 

茄子蒸臘腸 - 買咗 4 條細茄子   又唔想蒜蓉蒸   所以加啲臘腸   咁我可以聽日帶埋飯   呵呵 ~

食完洗埋碗   晾埋衫都 8 點半   同里奧大人去 mega BOX 嘅 UA 買星期六戲飛喇 ~

今晚落毛毛雨   所以坐 Shuttle Bus   估唔到要等   好似等咗 5 分鐘先有車 ~ 

咁差唔多到 mega BOX 嘅時候   里奧大人話佢要行去買飛先   我心諗我都行得好快喎   都唔駛自己行先   點知原來佢望到 Shuttle Bus 嘅時間係 21:58   但其實果時係 20:58 之嘛   唔怪得里奧大人咁驚啦   一陣 UA 收咗工   真係去行個大運咯 ~   

買完睇下啲皮鞋   不過唔買住啦   好攰呀   好想番屋企 ~

又坐番 Shuttle Bus 喇   番到屋企即沖涼   之後里奧大人問我啲衫係咪用新嘅熨衣刷熨   我話唔係啦   用熨斗熨㗎   佢話唔怪得咁直   哈哈   之後仲話我熨咗咁多衫   唔怪得頭先話熱喎   唔係你估   以為我早放工番到屋企唔駛做呀 ~

佢 10 點幾話瞓覺   我話我唔瞓住   之後佢又話瞓覺   如是者講幾次 "我瞓覺"   大佬   我睇緊報紙家嘛   每隔一陣就話我瞓覺我瞓覺   聽到我都煩埋   忍唔住話佢瞓就瞓啦   講幾十次話瞓瞓瞓   好煩呀   因為佢唔係第一次咁   次次自己瞓先都會講幾十次   如果我瞓先   我講一句即入房瞓囉 ~

睇埋報紙再打陣機   差唔多 12 點先瞓呀   勁夜呢 ~