麻酸樂米線專門店 @ 九龍灣 ( 4-DEC-2015 )

豬仇家米線  

招牌十式米線 

( 4-DEC-2015  FRI )

又星期五喇   眨下眼就 12 月   但真係唔似 12 月囉   見仲有人着緊短袖   但我覺得今朝都凍咗少少   所以都係着番件長外套好啲 ~

早餐食熱狗餐   之後嘆報紙   爽呀 ~

菇場唔太忙喇   可以做下自己嘢   呢啲機會真係要好好把握呢   呵呵 ~

今日有 Lunch Box   我發覺真係 Lunch 食飯會覺得好飽好滯   但其實都係半碗飯   但食麵又無嘢喎   奇怪 ~

食完出去行   行咗半個鐘先番菇場   都係郁下好啲 ~

仍然可以做下自己嘢   實在太好喇   之後準時放工 ~

今晚我唔係咁想煮飯   因為想去探媽咪   其實佢無嘢   不過我想睇下佢啫 ~

我靜靜雞開門   工人見到我入咗屋   以為我係鬼呀   哈哈哈哈   媽咪又係有啲驚   因為無諗過我會番嚟嘛 ~

媽咪第一件事就問我食唔食飯   我唔食啦   第二件事就比生果比我   又比咗一袋人參果同皇帝蕉比我   呵呵   又唔駛買生果   正呀 ~

里奧大人開會   開到 7 點幾   佢仲叫我食飯先   我話喺媽咪屋企呀   佢以為媽咪又係唔舒服   所以探佢  哈哈 ~

不過原來媽咪呢兩晚都唔係咁服呀   要起身噴氣   之後我問工人   佢話媽咪噴咗氣就舒服好多   同埋媽咪話今日都好番好多   我話總知抖唔到氣   噴完氣都唔舒服就要入院   唔好拖呢 ~
   
坐到 7 點 40 分就走喇   因為里奧大人放工喇 ~

我次次走都會同工人講聲唔該哂佢睇住媽咪   之後我話佢係妳媽咪   妳係我個妹   要睇住媽咪呀   佢笑哂口話係呀係呀   好搞笑   但其實佢知唔知我講乜㗎   哈哈 ~

好餓呀突然   又好鬼凍喎   里奧大人無啦啦問我打唔打邊爐   不過佢就唔打   即係去大家樂啦   我去咗吉豚屋睇有無位   但要等位   所以即走   再去大快活 大家樂 吉野家都無位   咁諗住去叙苑食粉麵啦   又係無啦   所以最後我話去麻酸樂囉   以前麻酸樂啲米線真係好難食   依家好食好多   同埋佢坐得舒服啲   但都係迫㗎喇 ~

食完就番屋企   沖埋涼   之後就睇下電視   11 點半瞓喇 ~