福源餐廳小廚 @ 官塘 ( 12-DEC-2015 )

豉汁涼瓜斑腩煲 - 好惹味   但食到最後就好油呢    

羅漢齋炒麵 - 我好鍾意食   所以嚟呢間必叫  

( 12-DEC-2015  SAT )

估唔到一覺瞓天光   仲要 7 點 26 分已經醒   鬧鐘都唔駛響添呀   但只係瞓咗 6 個鐘咋噃   估唔到又幾精神   可能係熟睡啦 ~

8 卦約咗我食早餐   所以今朝都好快去到餐廳   仲可以慢慢食   但食食下胃痛   可能唔慣朝早食粟米   哈哈 ~

本來尋日已經話食羅宋湯通粉   但印象中記得份量係好多   所以唔食啦   今朝唔太餓嘛   好在真係無食咋   因為今次份量仲好似巨過上次嗰碗呢   

菇場忙呀   救命   還凸哂喇噃   比我抖下啦   一日半日都好啦 ~

放工即走   番到屋企見里奧大人熨衫   咁我話我熨啦   雖然我攰   但我更加唔想佢攰   佢上網睇嘢或者睇雜誌   即係代表佢可以真正 Relex   我會好開心㗎 ~

差唔多 2 點幾無啦啦勁餓   要食車仔麵喇   不過呢間唔會再食   已經娛咗超級好難食   我已經比咗兩次機會佢㗎喇   但真係越嚟越差   要飛佢喇 ~

我食嘅豬皮   唔入味都算   但口感好似食擦膠咁     

里奧大人食嘅伊麵都唔熟嘅   牛丸同啲卷   口感係一 Pat 粉咁   勁難食     

食完就去 Bauhaus 散貨場睇嘢   老實講   一件短 Tee 減咗價都要 $190   又唔係靚   仲要件件好似梅菜咁款   睇見唔開胃   咁睇手袋啦   放低個袋之後   我發覺我隻手立黐黐嘅   真係好倉底貨咁喎 ~

睇完去 Taste 買生果   之後就番屋企抖喇 ~

睇下雜誌   話咁快就 5 點半   要出發探媽咪喇 ~

我一去到醫院   就見到有盒沙田柚   其實我好慶   但忍住道氣   我講咗九萬次話沙田柚對腎唔好   點解妳仲要買嚟食呢 ?!   再比我見埋盒滷水雞翼   真係唔鹹唔食咁喎   之後我都唔再話佢   只係叫佢最緊要最緊要係食多油多鹽嘅嘢   同埋對腎唔好嘅嘢就一定要食多啲   唔需要再戒口   仲要記得話我知妳想食咩喎   我多多都買比妳食㗎 ~

之後里奧大人行入嚟見到盒沙田柚   佢即黑面   叫工人即拎番屋企添呀 ~

家姐仲黐孖根   走去問媽咪係咪真係唔食沙田柚呀 ?!   大佬   對佢好唔係咁呀嘛   唔好以為表面無嘢就等如身體無嘢啦   我真係想講佢咃真係白痴   點解明知唔好都仲要食呢 ?!

媽咪今晚全程合埋眼   食嘢都係   唔老嚟我同里奧話人話佢嘛   講真   我哋探妳妳咁樣   我哋唔嚟㗎咋   唔好懶得戚 ~

婆婆又係超級麻煩   我知妳關心媽咪   但妳都唔駛一日打 4 次比工人   4 次比家姐   2 次打比我呀嘛 ?!   大佬   媽咪無打嚟   我哋又未去到醫院   鬼知媽咪點咩 ?!   成日問媽咪點   我好想問妳想點就真呀 ?!  我最唔鍾意佢知媽咪入院   佢問我媽咪有無嘢   之後又問家姐媽咪有無嘢   大佬   我哋一齊探媽咪㗎   駛唔駛打 2 次問同一樣嘢呢下 ?!   

之後婆婆又打比家姐   我地覺得唔係辦法   始終佢都係想聽媽咪把聲   咁我哋叫媽咪講話同緊我哋食飯   點知媽咪玩嘢話自己喺醫院   仲話因為自己心臟病發先入   真係黐黐哋線   之後我頂唔順話叫佢 24 小時掛住手機響身   唔好煩到我哋 ~

我覺得佢今晚做埋啲嘢令我十分之討厭   所以基本上我由到醫院嗰刻   我根本係無理佢   因為佢之前幾晚都已經令我好激氣   佢唔好以為我做埋啲嘢令佢唔開心   佢唔彩我哋   我哋會驚   真係 Sorry 囉   同埋我已經講咗半年   鬧又鬧過   勸又勸過   妳都咁   咁我都由妳啦   我真係好攰好攰   唔想再勞氣 ~

不過我承認   有時鬧完佢   我都覺得自己好衰   所以   我聽日中午會探番佢   不過同時同佢講埋   下星期我唔會探佢   有時啲嘢妳唔珍惜   我做嘅嘢即係多嚿魚啦   咁我可以慳番 ~

呢幾個月   家姐成日見到我都問我塊臉做咩咁   我話係雀斑啩   之後里奧大人尋晚話係壓力斑    因為佢朋友都係咁   我不嬲都話自己 6 月開始   我都瞓得唔好   好擔心媽咪   夜晚半夜一起身又會好自然諗起媽咪啲激心嘢   好難先瞓到   真係遲早情緒病   好在上次睇家庭醫生   佢叫我放鬆   迫佢做佢唔開心   佢唔做又到我唔開心   咁由佢囉   我真係好希望可以做到呢點   不過經過今晚咁   我都應該會逐步遘向平常心了   我好多地方未去   我唔想死住 ~

8 點即走   我同里奧大人一早講定話落官塘食印尼嘢   點知佢休息 5 日   下星期二先照常營業   唔係咁黑呀嘛   哈哈 ~

咁唔想行咁遠   所以去番福源   我勁想食羅漢齋炒麵呀 ~

我話食完去 APM 行陣   里奧大人即話有咩想買   無理由無啦啦話想去 APM   哈哈   其實都好耐無行街啦   同埋依家好多嘢都減價   如果啱心水真係要即買   手快有手慢無㗎 ~

行到 10 點就走喇   搭地鐵番屋企   我話今日心情唔好   要食薯片   咁頭先去 Muji   又唔想買粟米片   所以我話自己去 Taste 買   10 點 20 分去到即望營業時間   原來 10 點半就關門㗎喇   所以要加快腳步呢   但反而排隊等咗好耐囉   哈哈 ~

番到屋企即沖涼   之後食零食   無咩幾何差唔多 11 點仲食零食㗎   呵呵 ~

今晚成 1 點先瞓   死啦   呢幾晚真係瞓唔着   定係每月一到果兩日瞓得太多   所以呢幾晚都瞓唔到呢 ~