燻蹄 (外賣) + 蔥油唐生菜 ( 1-DEC-2015 )

尋晚買咗 4 條超甜粟   食剩 2 條   今晚清埋去 

( 1-DEC-2015  TUE )

尋晚半夜醒兩次   一次餓醒   一次好似熱熱地咁   但唔蓋被又凍喎  ~

都唔明尋晚做咩餓醒   又唔係食得太飽喎   不過唔理喇   今朝一定要食米粉餐   因為晏晝食麥皮   朝早飽啲好   哈哈 ~

菇場忙爆   啲嘢又煩又亂   我真係好驚啲人比料唔清唔楚   真係差啲做到想爆佢粗囉 ~

之前買咗包麥皮   所以點都要食啦   買嘅時候就話好快食得哂   買咗之後就點都唔想開嚟食住   不過我唔會嘥嘅   每星期兩次囉   每次大碗啲   咁就唔駛每星期三次咁慘   哈哈 ~

繼續忙忙忙   終於叫做搞掂哂   但只係搞掂一半   之後又係忙呢啲煩嘢   諗起都煩 ~

放工去拎中藥   之後去街市買棵蔥   再去買麵包比里奧大人做早餐   最後買埋燻蹄就番屋企喇   一頭一尾行咗 15 分鐘   咁行法真係好鬼攰 ~   

番到屋企即開機洗衫   之後熨衫   里奧大人 7 點放工   咁我抖陣都預備喇 ~   

里奧大人話喉嚨唔多舒服   又話咬嘢好痛   所以想食丁麵   我話食麵唔駛咬咩 ?!   多多藉口   想食麵就食麵啦   麻鬼煩 ~

是日懶餐 - 燻蹄 (外賣) + 蔥油唐生菜 

燻蹄 (外賣) - 好想食呀   所以問咗里奧大人食唔食先買囉   因為我覺得佢唔太鍾意食咁   好在佢話無問題   唔係我諗唔到煮咩餸   呵呵 ~     

蔥油唐生菜 - 今次加咗蔥花同豉油   唔駛咁 Dry   但無諗過 3 棵蔥會整到咁多蔥花囉   差啲蔥花多過生菜呀   哈哈 ~

食完就洗碗   差唔多 8 點半就自己去徑步   徑半個鐘就番屋企   因為今日好攰   想快啲番屋企沖涼休息呢 ~

睇下雜誌   玩下 Line   今晚 11 點唔夠就瞓喇 ~