蒜蓉剁椒菜心 + 蕃薯糖水 ( 23-DEC-2015 )

( 23-DEC-2015  WED )

尋晚瞓到半夜熱醒   即刻扯開張珊瑚絨被呀   唔係熱死都似   哈哈 ~

瞓得唔好   加上又似大回南天氣   真係無厘精神囉   就算唔駛番工都係咁話 ~

早餐無咩胃口   食奶油多算喇 ~

菇場忙下停下   有啲唔慣添 ~

心大心細想出去食   點知阿齋問我食咩   我話來來去去唔係車仔就酸辣   之後我話車仔啦   多啲 餸   咁我出去幫佢買埋   我要郁下呀   佢成日覺得唔好意思   我又無咩所謂   又唔係好重 ~

食完仲眼瞓   真係做嘢都慢九拍   我覺得直頭完全唔在狀態咁添呀 ~

放工即走   番到屋企即開機洗衫   之後拖地同熨衫   做哂所有嘢   無牽無掛了   呵呵 ~

里奧大人 7 點放工   咁我都預備煮嘢喇   今晚啲餸係尋晚食剩嘅粟子雞同燜豬肉   就咁蒸熱就算喇   但炒飯就要開鑊炒啦   蒸炒飯應該好難食   哈哈 ~

等埋里奧大人盒星洲炒米   炒幾炒就食得 lu   今餐嘅餸同飯麵都係食剩   如果有微波爐仲方便   一嘢叮熱就搞掂   呵呵 ~

是日懶餐 - 蒜蓉剁椒菜心 + 蕃薯糖水  

蒜蓉剁椒菜心 - 尋晚喺 Taste 買定㗎喇   咁今晚唔駛又特登去買菜   之前去黃山買咗樽蒜蓉剁椒比家姐   家姐話唔要   咁我要啦   估唔到都好辣 ~

蕃薯糖水 - 上星期買咗 1 份蕃薯   係時候要清啦   不過仲清剩半份 ~

今日勁攰   所以搞掂哂所有嘢都唔出去徑步喇   沖個熱水涼就休息 lu ~

打下機   睇陣雜誌   10 點半即瞓喇 ~