客家好棧 @ 九龍灣 ( 22-DEC-2015 )

客家燜豬肉 ($68) - 唔好食嘅   最後食剩幾嚿肉   咁比我留番聽晚做餸啦   唔好嘥

客家釀豆腐 ($58)

北菇栗子滑雞煲 ($68) - 食剩 1/3   又益我啦  

皇牌脆皮燒鵝 (例) ($88)

蒜蓉豆苗 ($68) 

瑤柱蛋白炒飯 ($78) - 食唔哂   繼續益埋我

( 22-DEC-2015  TUE )

里奧大人今朝上大陸見客   佢醒咗之後   我都好在瞓得番   唔係就慘喇 ~

今朝又好潮濕   我直頭覺得有啲熱添呀   勁似回南天囉   一啲都唔似冬天   到依家個衣柜仍然係放短袖衫   睇嚟冬天衫真係唔駛拎出嚟着 lu ~

早餐食麥皮餐   份腿治就留番 Lunch 食   好多時朝早會突然間好餓   但一叫完嘢食就唔想食囉 ~

菇場忙呀   差唔多 11 點居然肚餓   所以食埋份腿治 lu ~

Lunch Time 出去買肌研水   估唔到屈臣氏只係 $98   所以即買   之後再行多個大圈就買嘢食番菇場喇 ~

1 點 40 分先出 Email 話今日放 4 點   好唔明點解唔早一日出   或者朝早出   係都要 Lunch Time 之後先出   奇奇怪怪   8 卦話聽到西瓜叫 Admin 同事出 Email 記住寫明做哂嘢先好放工   公司做得哂啲 嘢就唔駛要你啦   做哂 Urgent 嘢咪得囉   自己放早無節目好痛苦係你事   唔好搞到人嘛   唔該 ~

放工即走   里奧大人 5 點鐘都番到屋企 lu   不過我 5 點 45 分都落去客家好棧攞位喇   今日冬至   好多人出去食飯呢 ~

其實我約呢晚食飯   係因為每星期都會同媽咪食一次飯嘛   我都完全唔記得呢日係冬至   同埋本來里奧大人話聽日喺大陸見客   所以會早啲番   我就陪佢啦   咁咪諗住改今晚食囉   點知世事多變   改咗今日見客   聽日廠無電就唔駛上   不過咁都好   今晚可以一齊做冬呢 ~   

家姐 6 點 15 分就到喇   今晚 8 點要還枱   咁其實都無問題   我哋都唔會食咁耐   因為媽咪都要番屋企食藥 ~

買比家姐嘅電話套真係好大   好在佢肯用咋   哈哈

隔離枱有個女人好勞嘈   話點解對方要搭巴士   明知做冬多人搭車   加上又 8 點要交枱   做咩唔搭地鐵   佢無限 Loop 嗰幾句嘢   又大聲   我覺得好煩   食餐飯食到咁勞氣做咩呢   之後有個伯伯嚟到   又即話佢搭地鐵嘛   咁咁咁咁   個伯伯無出聲   我覺得佢好慘   已經趕啦   仲要比人鬧 ~

我咃唔夠 8 點都走喇   我同家姐送埋媽咪搭車   里奧大人就拎啲雪梨水番屋企先   之後再 Join 埋一齊食雪糕 ~   

食完即去 Taste 買嘢   因為有 92 折   呵呵   咁家姐好驚木瓜   衰里奧大人特登將個木瓜隊落家姐個鼻度   我笑住話賤人   之後有個男人望住里奧大人呀   唔知係咪以為里奧大人非禮我哋呢   哈哈 ~   

叫里奧大人揀完木瓜就叫佢番屋企先   佢無耐性行超市   次次未入到去就已經問要買啲咩   一係行唔夠 30 秒就打喊露   所以最驚同佢行超市   同家姐行就最好   慢慢研究   但同佢行有樣唔好   就係咩都想買   哈哈 ~

我帶咗 1 個環保袋咋   因為無諗過家姐買辛辣麵同 9 包公仔麵嘛   我又要買 2 Pack 辛辣麵   加埋其他嘢   1 個環保袋真係唔夠   之後我同家姐講話駛唔駛加 5 毫紙買個膠袋   家姐話死都拎呀   唔要買膠袋   我覺得嗰下佢好爆   5 毫子啫   我比得起  哈哈 ~

咁我簽卡嘛   之後見架車啲嘢無哂   得番 2 Pack 辛辣麵同 3 包餅   咁個環保袋又滿哂   原來家姐將剩低嘅嘢放哂入佢手袋呀   佢好驚我拎重嘢   因為我買咗 4 支佳得樂   佢實唔比我拎㗎   所以我覺得佢真係好錫我呢 ~

番到屋企已經 9 點   家姐做按摩   咁我都沖涼先喇 ~

之後家姐見里奧大人淘咗個沖茶壺   佢又想要   咁里奧大人即做嘢   家姐之後又話要卡片套   里奧大人又幫佢淘   幾咁快手   其實我覺得里奧大人自己都鍾意買嘢啦   幾乎日日上淘寶睇有咩嘢好買   仲話食 Lunch 嘅時候   佢同事又坐埋嚟   阻住佢食大茶飯添呀   哈哈   黐鬼線 ~

家姐坐到 10 點幾都走喇   我就睇下電視   11 點幾都瞓 lu ~