鳳城水餃 (外賣) + 白菜仔 ( 17-DEC-2018 )

我剩咗 1 隻水餃食唔落   咁里奧大人食緊杯麵   我問佢夠唔夠餸 ?!  我比埋隻水餃你食吖   之後個衰佬話係咪食唔哂呀 ?!   講到咁好聽   哈哈 







( 17-DEC-2018  MON )

呢排瞓得麻麻地咁   但又唔係唔夠瞓   咁都好啲 ~

早餐食奶醬多   唔駛咁飽 ~



菇場超級勁忙   個頭又有啲痛   唉 ~

Lunch Time 出去買粉果同炒米粉   次次食佢啲米粉真係有一陣味   但就唔係臭嗰啲   唔通係麵粉味 ?!

仍然忙爆   8 卦搞笑   話我做份嘢做咗成日都未搞掂 ?!?!   我話你估我得一樣嘢做咩 ~

5 點 45 分走人   打比里奧大人話今晚食水餃算喇   佢好愕然話妳依家先放工 ?!   哈哈 ~

今晚佢都為咗星期六件事講唔好意思   我條氣就順番哂喇   有時啲嘢   唔好要我講哂出面   咁樣無意思呢 ~

成日唔記得自己遲咗放工   所以番到屋企都要預備了 ~



里奧大人 7 點左右番到屋企   咁就可以開餐喇 ~ 

本來想淥上海麵   不過都係食埋個過期 2 日嘅杯麵好啲   呵呵 ~

是日懶餐 - 鳳城水餃 (外賣) + 白菜仔 

鳳城水餃 (外賣) - 買 1 打水餃  最搞笑阿哥仔問我係咪打邊爐 ?!   我話煮麵呀   佢好愕然話咁多 ?!   我話同我老公一齊食嘛   可能佢見我平時都食水餃米得 3 隻水餃   哈哈 ~

白菜仔 - 買咗半斤   啱啱好食得哂 ~

洗埋碗就抖陣   8 點半同里奧大人去徑步   徑 20 分鐘   因為我好攰 ~

沖埋涼就開機洗衫   之後休息   睇多陣電視   個人覺得好鬼凍   好似作病嘅凍   所以 11 點唔夠都即瞓喇 ~