百樂門國際宴會廳 @ 九龍灣 ( 22-DEC-2018 )

( 22-DEC-2018  SAT )

今朝家姐同 Berry 睇醫生   所以唔同我食早餐   咁我同 8 卦食喇   佢想試新嘢   不過我話唔想行咁遠   哈哈 ~



菇場忙呀   不過無咩心情做嘢   反正工廠都無開   都唔駛咁急囉 ~

放工即走   約咗里奧大人去 APM   所以我都搭地鐵喇 ~

里奧大人見我帶條頸巾同着外套   佢問我係咪好凍 ?!   哈哈   佢話今日熱到爆呀 ~

我話今朝西瓜直頭着羽絨添呀   之後我都即問阿 mi 有無着羽絨 ?!   佢答今日 24 度喎   可想而知依家西瓜身體好差   佢加拿大番嚟幾個月   已經睇咗起碼 5 次醫生   同埋成日着衫仲多過我   以前佢喺菇場唔着外套㗎   依家就成日着呢 ~

大家都未餓   咁行陣先   我見到 Happy Lemon 有黑糖珍珠奶茶   所以又想買嚟飲囉 ~

無咩黑糖味   台灣珍煮丹真係好飲好多呀



唔想成日記住拎難   所以即去 Stage of Playlord 拎鞋   之後再去 MUJI 買 2 支筆   再行多陣就去食嘢   原來都已經 2 點半喇 ~

口水雞飯



咖哩牛腩飯



食完就番屋企   今個月好開心   買咗 5 對鞋   所以呢幾年都唔敢再買鞋   同埋今日一定要執好鞋柜   放番整整齊齊   之前太懶   成日唔執   今日執完就覺得了咗心事喇 ~

執完鞋柜就開機洗衫   之後收到淘寶通知   話有貨拎   記錯佢地今晚收 5 點   所以叫里奧大人即打去問   感恩係收 6 點   因為我啱啱開機洗衫   5 點前肯定趕唔到   咁今次又 2 大袋   所以一定要我幫手拎囉 ~

最搞笑係里奧大人   成日好想快啲拎張床仔比 Berry   實在好驚佢冷親呀   所以呢幾日佢都好緊張收唔收到貨   咁今日終於收到   佢仲話收得正合時   因為聽日會見到家姐   同埋之後又會凍   咁唔駛驚 Berry 冷親 ~

今次好感激里奧大人㗎   佢睇完 Berry 瞓毛巾之後   即話買張床仔比 Berry   仲幫家姐揀埋添   一條龍服務呀   哈哈 ~   

洗完衫即去淘寶拎嘢   之後打的去水姑屋企   放低張貓床比佢啦   佢間屋臭到我想嘔   好心養貓就整乾淨間屋啦   佢又賴隻貓周圍屙   我想話咁妳咪清潔要密啲囉   其實佢無貓嘅時候   間屋都一樣污糟 ~

此地不宜久留   所以即去舖頭拎嘢   咁 7 點前就去百樂門 ~

今晚同九龍區姑奶們一齊食飯   其實食飯係開心   但次次叫每樣餸都係講防癌 生癌 通便   頂佢   乜 Mood 都無哂 ~

一係講來講去都係嗰啲話題   幾十年都係嗰幾幅屁   我都識背喇   最難頂成日話自己有幾叻先攞命   我同里奧大人唔出聲串佢咋   費事佢要搵窿捐 ~

姑奶呢排見親我   都成日話我皮膚好   我話肥囉   無紋可以 "必" 到出來   同埋其實想講   妳唔好將我同妳哋比啦   妳哋啲皮膚咁乾   嗚嗚嗚嗚 ~

不過其實我係屋企人當中係皮膚最差囉   媽咪同家姐好鬼滑㗎   連里奧大人都話家姐皮膚好滑   哈哈 ~

食完去德福買戲飛   番到屋企都 10 點   即沖涼喇 ~

睇多陣電視   又 12 點幾先瞓 ~