榨菜木耳絲炒豚肉 + 辣菜甫菜心苗 + 牛大力鑽地老鼠素湯 ( 2-JUN-2019 )

( 2-JUN-2019  SUN )

我瞓到 9 點 45 分起身   里奧大人 8 點半起咗身   之後無瞓   佢話尋晚 10 點幾飲咗支啤酒   去咗 5 次廁所   好似無瞓過咁   哈哈   我尋晚都奇怪   咁夜仲飲啤酒   原來佢話仲有 4 支係 18 號到期   所以要飲呀 ~

沖埋涼就去食早餐   今日有事奉   所以都早啲番教會 ~

崇拜完畢去街市買湯料同生果   所以叫里奧大人行商場等我   佢係咁話好熱   反而我又唔係好熱喎   可能今日佢喺教會走來走去 ~

好想飲珍珠奶茶   呢間 CHALI 都唔錯   最緊要珍珠夠煙韌

買完就食埋下午茶先番屋企   唔想行來行去 ~

醬占多

茄汁豬扒火腿意粉 - 我其實好驚食呢個意粉   雖然我勁鍾意食汁   但見到呢碟汁就真係麻麻地   不過里奧大人鍾意食就叫啦   唔想成日叫佢揀   揀完又唔比佢食   哈哈 

番到屋企都 3 點喇   即刻煲湯   再整蘋果沙律   咁問家姐要唔要啦 ?!   估唔到佢話要   不過其實我都預咗整埋比佢   哈哈 ~

4 個富士大蘋果 + 1 罐椰果 + 1 罐粟米 + 1 罐紅腰豆   今次蘋果酸呀   但我又 OK   因為沙律醬比較漏

搞掂哂都 5 點幾   叫家姐嚟交收啦   佢送咗床單比我呀   唔怪得佢之前猛問我幾時探 Berry 啦   咁真係整定咁   唔係佢又心掛掛要點樣比我㗎喇   搞笑 ~

家姐自己都買咗張   家姐叫隻 Apeach 做 Pat Pat   哈哈哈哈

6 點左右飲湯   抖到 7 點半就煮嘢喇 ~

是日懶餐 - 榨菜木耳絲炒豚肉 + 辣菜甫菜心苗 + 牛大力鑽地老鼠素湯  

榨菜木耳絲炒豚肉 - 包榨菜木耳絲過期 1 個月喇   聞落無臭就煮埋啦 ~

辣菜甫菜心苗 - 好耐無食菜心苗   今次都幾甜 ~   

牛大力鑽地老鼠素湯 - 就咁湯料已經 $80   好在唔駛落豬骨   可能加咗竹蔗   個湯甜甜哋都唔錯   最緊要清熱毒祛濕   我覺得自己水腫   所以點都要煲個祛濕湯飲下 ~

洗埋碗之後就開機洗衫   沖埋涼   抖陣再食沙律 ~

里奧大人做功課   我就睇電視   11 點唔夠都瞓覺喇 ~