炸子雞 + 炒飯 + 勝瓜鹹蛋湯 ( 9-JUN-2019 )

( 9-JUN-2019  SUN )

今朝 9 點 45 分起身   原來里奧大人 9 點已經起身沖涼   所以我就可以慢慢刷牙洗臉沖涼 ~

食埋早餐就番教會   里奧大人上教會先   我就同姊妹 J 傾下偈先   哈哈 ~

   
番到教會   即問問姊妹 K 有無番小組 ?!   佢話番咗小組喇   仲好開心   真的感謝主   我上次鼓勵佢番小組   因為弟兄姊妹真係會關心妳   嗰種愛真係感受到   當中一齊敬拜分享代禱   真係好開心   我話我自己番咗小組之後都成個人更新咗   佢哋嘅愛同支持   真係比咗我好大嘅力量呢 ~

崇拜完畢就去街市買湯料同西瓜   里奧大人就去剪髮同拎淘寶 ~

番到屋企都 2 點   要抖啦   條街勁焗熱   慢行都出哂汗呀 ~

同里奧大人食下午茶   之後都即番屋企 ~

里奧大人切到好平均咁噃   不過佢食咗中間嗰件   我覺得係最好味嗰果件呢   如果我呢   我就一定會留比里奧大人或者家姐

抖陣就熨 3 機衫   咁又轉咗新熨斗   比較重手   所以熨完之後隻手好攰呀 ~

5 點左右想瞓   但死忍難忍   呢個時間瞓咗   夜晚一定早瞓唔到囉   點知好似 5 點 15分瞓着咗呀   起身係 5 點 45 分   仲要勁精神嗰隻   睇嚟今晚都唔會早瞓到 lu ~

今晚好簡單   只係焗熱啲飯餸同滾湯   所以 6 點半可以開餐喇 ~

是日懶餐 - 炸子雞 + 炒飯 + 勝瓜鹹蛋湯 

炸子雞 + 炒飯 - 係尋晚拎番嚟㗎   我話今晚唔駛諗食咩   本來整雞絲炒飯   但天氣太焗熱唔想開爐炒嘢   所以就咁焗熱算喇 ~

勝瓜鹹蛋湯 - 我眼皮生瘡呀   人生第一次   所以要飲啲清熱嘅湯水   哈哈 ~

洗埋碗就抖陣   8 點幾就同里奧大人一齊去徑步   今晚都係徑 20 分鐘   條街勁焗熱   唔想徑咁耐 ~

叫里奧大人沖涼先   我就拖地再開機洗衫   之後大清潔廁所   搞掂就沖涼 ~

睇陣電視又聽歌   里奧大人 11 點幾瞓   我差唔多 12 點先有啲睡意   但點都要瞓㗎喇 ~