興記茶餐廳 @ 牛頭角 ( 21-JUN-2019 )

豬扒湯麵套餐 ($40) - 好耐無食福字麵喇   好味道 

火腿奄列 + 牛油方包 - 其實最想食牛油餐包   不過賣哂囉   嗚嗚

( 21-JUN-2019  FRI )

今朝終於唔駛溫習   所以終於記得係有吞拿魚治烘底呢樣嘢   哈哈 ~

呢排真係無時無刻都係拎住份 Notes 博命睇架   時間唔夠   唯有盡量緊握每分每秒啦   所以呢   個人瞓得唔好   有壓力嘛   搞到左邊臉同個咀都爛埋   嗚嗚   好在里奧大人有隻強勁類固醇藥膏   咁我可以搽囉 ~

咁同 8 卦食早餐嘛   之後佢講咗句嘢   令到我非常之反感   不知所謂亂咁講嘢   所以我會將呢個人即刻 Downgrade 到過路人位置   唔好再同我講嘢   我仍都唔會再主動同佢傾偈   雖然可能會一齊食早餐   但你食你嘅   我食我嘅   唔好同我講嘢 ~

菇場忙下停下   但無停過手 ~   

Lunch Time 出去行陣   再買魚片頭河粉番菇場食 ~

忙呀   個個知我聽日 Off 就會突然比哂啲嘢我做   不過其實都感恩嘅   因為我啲同事係好急先會咁樣   如果平時唔急嘅   我幾時比佢哋都得嘅 ~

里奧大人同姑奶買手機   話可能要 6 點先搞掂   咁我話放工去街市買嘢   再睇到時煮唔煮啦 ~

放工即走   一落車就接到里奧大人話搞掂   咁我只係去買生果算喇 ~

今次主要去街市買黃金桃   感恩有得買呀   所以買 2 份   之前一份 $27/4 個   依家 $30/4 個   但照買啦   因為真係超級好食㗎   又甜又多汁   之後買埋 1/4 個西瓜就走喇 ~

一出街市就見到里奧大人   佢話已經揮哂手   但我都望唔到   只係望住個膠袋   話我真係好為食   我話我想再望下啲黃金桃有無爛嘛   我唔係真係為食到一買完就想食呢   哈哈 ~

我話去興記食豬扒麵   真係好耐無食喇   好想食呢 ~

食完就番屋企喇   我叫里奧大人沖涼先   我就拖地同抹嘢   太耐無做家務   難得唔駛溫習   係時候要做㗎喇 ~

呢幾個黃金桃   摸落唔似好熟咁   但一樣係又甜又多汁   

沖埋涼就休息   開電視睇呢   真係有啲唔慣呀   哈哈 ~

里奧大人作感冒   佢 10 點幾都瞓   我就 11 點幾先瞓呢 ~