星洲炒米 ($45) - 份量好多 食剩一大半 所以要打包了
( 11-JUL-2020 SAT )
尋晚瞓到 5 點幾凍醒 咁順便起身去廁所 之後里奧大人又起身搽藥膏呀 隻左手腎仲痛 ~
今朝 8 點 10 分已經到咗茶記 8 卦 5 分鐘後到 本來去另一間食 但我話個袋太重 唔想行咁遠 ~
阿姐好搞笑 問咗我兩次係咪飲奶茶 ?! 因為佢記得我平時係飲咖啡呢 我話星期六會比較特別啲 哈哈哈哈 ~
1 點半先有車 熱到我呢 感恩車程暢順 去到差唔多 2 點 ~
同家姐 姐夫一齊食 Lunch 我同家姐講話要快食 一陣要去買嘢 哈哈 ~
我最想食嘅炸野菜天婦羅 原來已經停咗 1 年喇 呢幾樣炸物都接近 $80 越食越貴了
冷烏冬 (大) 好似 $36 我其實覺得勁唔抵 但嚟到實係食烏冬家嘛 哈哈
咖哩吉列豬扒飯 呢個姐夫食嘅 最搞笑職員話要蒸飯 家姐問蒸幾耐 ?! 佢話 5 分鐘 唔知以為半個鐘囉 因為蒸飯係定係一個飯煲家嘛 我唔明點解啲人唔直接講話蒸飯要等多 5 分鐘 硬係要人問要等幾多分鐘
食完之後去廣良興買嘢 買完即番屋企喇 ~
Berry 真係好搞笑 係都唔會撲家姐 真係連狗都蝦佢 之後家姐話佢同事前兩日同佢講 話佢成個樣都似比人蝦 不過我覺得家姐同事都好好嘅 成日會出去食飯傾偈 有筍嘢又開心 share 同埋佢哋見到係八哥同紫色嘅嘢 就會送比家姐 咁家姐又會成日買嘢食番公司 去旅行又勁多手信比佢哋 同埋其實最緊要係家姐肯做 唔會計計較較咁囉 ~
家姐好開心咁送咗個吸水墊比我 我話做咩係蛋黃哥嘅 ?! 我唔鍾意佢架喎 佢個樣好慘話: 乜妳唔係好鍾意佢嘅咩 ?! 我話 Minions 代替咗佢好耐啦 同埋依家鍾意 Apeach 嘛 之後我話妳送蛋黃哥比我 我都會用嘅 哈哈 ~
呢 2 包濃湯粟米圈係尋晚買比家姐 759 做特價只係 $5.9/包 實在太抵 家姐又好鍾意食 咁即買比佢 頭先特登同家姐去 759 我問佢抵唔抵 ?! 佢話好抵呀 屋企仲有 2 包 咁買唔買好呢 ?! 咁即係佢係想買囉 之後我開個袋比佢睇 我話其實買咗比妳 佢斜啤住我話我黐黐哋 哈哈哈哈
衰女包依家成日呢埋梳化底 唔係驚我呀嘛 不過我一叫其他狗名 佢又會即刻跳上梳化 好搞笑 ~
咁樣好似好細粒咁
好 BB 咁
無啦啦瞓落我隻腳度 全日係咁就好啦 里奧大人成日話我黐黐地㗎 咁鍾意啲狗咁樣 哈哈
其實佢對眼都無神 但又唔瞓喎
佢好鍾意咬呢條牛骨 好硬㗎 家姐話呢條牛骨要 $198 都好貴下喎
佢想食 但我唔比佢食 呵呵
成隻肥婆咁呀 哈哈哈哈
好得意呀肥嘟嘟咁
一瞓覺就會縮埋一嚿 好似好可憐咁
突然間好眼瞓 我 5 點瞓到 5 點半呀 可能晏晝等車曬咗成 25 分鐘 個人好攰呀 ~
家姐 6 點出門口 佢同我拜拜 我覺得好搞笑 因為好似我喺屋企咁 ~
我 Send 比家姐睇 話 Berry 係咁望住門口呀 不過唔係等妳番嚟 哈哈哈哈
無啦啦又碌住對眼望定定咁
家姐工人用辣椒炒飯 睇見都辣 但佢話唔辣
工人係咁同我講 "腐竹" 我又問佢係咪 "腐竹" ?! 咁佢咁啱整緊辣椒 以為佢整腐竹食囉 之後佢應該知道我唔明佢講乜 比佢手機我睇有大廈 "火燭" 又問我邊度火燭 ?! 我問係咪佢朋友住果度呀 ?! 佢話唔係 真係搞笑 咁問來做咩呀 嚇死我咩 ~
所以家姐真係好勁 可以聽得到佢講咩 哈哈 ~
我就坐到 7 點先走 衰女開始眼瞓 到我勁唔想走啦 好想摸到佢瞓覺呀 ~
里奧大人 8 點幾放工 所以快快去食晚餐喇 ~
食完就番屋企 叫里奧大人沖涼先 之後我大清潔廁所再沖涼 咁聽晚可以抖下 呵呵 ~
里奧大人 11 點唔夠都瞓 我就 11 點幾先瞓 ~
沒有留言:
發佈留言