韭菜豬肉餃皇 + 青紅蘿蔔粟米豬骨湯 ( 4-JUL-2020 )

( 4-JUL-2020  SAT )

今朝里奧大人鬧鐘響   以為佢校錯鬧鐘   咁佢去廁所   我都諗住瞓多陣   之後佢沖埋涼先出來   原來佢今朝番早   但今朝先記得同我講   等我尋晚仲約咗家姐今日食炸雞添   咁要取消喇 ~

早餐食芝腿治烘底   其實好想食通粉   但今朝菇場整冷氣   我唔想個身熱辣辣仲要無冷氣呀   所以食三文治 + 凍飲    咁肯定個身唔會熱啦 ~

菇場忙呀   10 點左右整冷氣   真係唔可以咁大動作 ~

12 點左右整完   但仲未整好   下星期一再整   都唔明點解唔一日整哂   明知道要整嘛 ~

放工即走   同里奧大人一齊食 Lunch   之後我去買湯料   里奧大人就番屋企 ~

諗住買完料再行陣超市   但好鬼重   都係番屋企算喇 ~

煲落湯之後就大清潔廁所   沖埋涼就休息   之前都唔駛成日沖涼   但呢個幾月真係流咗好多汗   無可能唔沖囉 ~

原來今年 6 月係有史以來最熱嘅一個月   等我仲以為自己身體有咩問題   成日覺得熱添   哈哈 ~

里奧大人瞓覺   我就唔瞓得咯   要睇住煲湯嘛 ~

我呢排好少煲老火湯   咁家姐星期六日唔見我呢   就多數會問我去邊 ?!   食咩早午晚餐咁   我就話佢知今日煲湯   佢問我係咪煲瘦肉湯 ?!   齋湯 ?!   我話豬骨湯 ?!   之後又問我有無肉 ?!   我話買咗四十蚊西施骨 ~

咁我煲滾咗就影比佢睇 ?!   佢又問有無肉架 ?!   我好奇怪點解問我咁多次有無肉囉   之後到我問番佢係咪想要肉呀 ?!   佢話想比 Berry 食   笑死我啦   其實一開始同我講話想啲肉比 Berry 食咪得囉   咁我可以再買多廿蚊嘛 ~

里奧大人 5 點起身   又要做公司嘢喇 ~

我約咗家姐 5 點 15 分交收   今日帶埋工人同 Berry 出來   Berry 好驚咁呀   對腳仔震哂   唔知係咪以為睇醫生呢 ?!   傾咗 15 分鐘都走喇   等 Berry 快啲番屋企 ~

6 點左右飲湯   咁 7 點左右再食晚餐 ~

呢盒餃皇好大盒   所以好想清咗去   唔好阻住冰格位置   哈哈

兩隻餃子加埋   都有一個啤梨咁大

是日懶餐 -韭菜豬肉餃皇 + 青紅蘿蔔粟米豬骨湯

韭菜豬肉餃皇 - 第一次買呢款餃子   放哂落玫瑰鍋   都無空間反轉   所以要好小心煎呀   咁我又煎又加水焗   但最後都痴底   激死我呀   之得放入焗爐焗啦 ~

青紅蘿蔔粟米豬骨湯 - 其實我就係想飲肉湯先煲湯   但估唔到無得食肉   哈哈   不過見係 Berry 就無所謂啦 ~

洗埋碗又要大清潔   煎餃廿分鐘   大清潔同樣廿分鐘   大佬   煎 6 隻餃子咋   哈哈 ~

沖埋涼都休息喇   出完汗真係特別攰呢 ~

家姐同我講話 Berry 好鍾意食妳啲肉呀   我話 Berry 係肉就鍾意食㗎啦   理鬼得邊個比咩   痴鬼線   哈哈 ~

我仍然睇 Eric Sir 呀   因為我好鍾意 Kiko   見到佢就會好開心㗎 ~

里奧大人 11 點瞓   我 12 點先瞓呀 ~