星州炒米 + 辣椒芝士香腸 + 蕃薯條 + 粟米蛋花湯 ( 12-JUL-2020 )

( 12-JUL-2020  SUN )

今朝 8 點 50 分都醒醒哋   但懶床懶到 9 點 10 分都起身喇   其實鬧鐘都未響   但唔想格硬瞓呀 ~

沖埋涼再抖陣就出發喇   今日可以他他條條 ~

其實今朝要番主日學   但我同里奧大人講話唔番呀   因為間房好多人   地方又唔大   以前無問題   依家咁情況真係唔想囉   同埋有時大家會講下嘢   你一句我一句   真係有啲驚 ~

突然好肚餓   所以今朝要食米粉餐   但就要走包   有時見啲人都無食塊方包   咁好心就走包啦   依家盡量唔會浪費   因為以前實在太折墮了   依家要還呀   哈哈 ~

食完就去里奧大人公司幫手   之後約咗大食一齊崇拜   我承認對佢之前態度比較冷淡   但唔係差   始終佢對我都係真心好嘅   所以今次見番佢   我都要對佢好啲   等我自己個舒服啲   哈哈 ~

估唔到佢仲送咗本靈修書比我   係我嘅生日禮物   我真係感動嘅   所以下次要請番佢食 Lunch   哈哈 ~

崇拜完畢就佢去沙田   我要幫里奧大人做嘢   搞掂哂就出去行陣   估唔到行下行下   都行咗接近一個鐘   怪不得開始熱啦 ~

里奧大人 2 點幾先放工   咁食完嘢就番屋企喇 ~

食到咁上下   水姑打嚟叫里奧大人即刻番屋企幫佢訂機票   里奧大人已經講咗喺街   佢都仲要里奧大人即刻番屋企   都發神經   佢話喺澳洲訂機票   個網站 Jam 哂   里奧大人就話佢訂都會 Jam 啦   大家都用同一個網站   之後里奧大人話 6 點先番到屋企 ~

我話囉   寧願等你幾個鐘頭後幫佢訂   都唔叫隔離房個女幫佢訂 ?!   真係好有問題   唔知以為妳單身   仲要叫里奧大人用手機幫佢訂   叫人用手機   咁妳做咩自己唔用手機訂 ?!

我同里奧大人講   求人幫手做嘢   唔該要客客氣氣   我唔係老馮幫妳做   里奧大人都話就算其實當時做到都唔會幫佢做   唔係個個都 Stand By 幫佢 ~

真係令到人火滾   我直頭同里奧大人講   如果你姐夫番香港   最好唔好比我見到   我一定會串爆佢   點解你成日都咁得閒   仲周圍叫人幫手做嘢   點解唔自己做呢 ?!   你應該周圍幫人做嘢差唔多啦   反正大把時間   里奧大人知我依家講嘢唔會客氣   而我所講嘅係事實   佢都會認同囉 ~

去到巴士站睇住架巴士走   但明明 Apps 話係 6 分鐘喎   咁唯有周圍行陣先啦 ~

番到屋企都即沖涼   之後就抖喇   里奧大人就沖埋涼   舒舒服服瞓咗半個鐘 ~

今晚唔太餓   所以 7 點先預備晚餐   7 點半就搞掂喇 ~

是日晚餐 - 星州炒米 + 辣椒芝士香腸 + 蕃薯條 + 粟米蛋花湯

星州炒米 - 尋晚食剩   今晚點都要食㗎喇 ~

辣椒芝士香腸 + 蕃薯條 - 唔想買餸   咁就食呢啲急凍食物最好   哈哈 ~

粟米蛋花湯 - 完全唔記得買菜   所以開罐粟米湯   依家 $10.9/罐   我特價都要 $7.6/罐   要慳住飲呀 ~

洗埋碗就沖涼   話咁快又 9 點 lu ~

睇 Youtube 好似越睇越精神   今晚 11 點 45 分先瞓   但其實唔眼瞓 ~