韭菜餃拚菜肉餃 + 蠔油芥蘭 ( 6-JUL-2020 )

( 6-JUL-2020  MON )

呢排都瞓得麻麻哋   周身骨痛   仲要加埋濕疹先煩 ~

早餐食芝腿治烘底   想食鹹嘢 ~

菇場忙呀   今日 Pack File   起碼 Pack 兩日 ~

雖然冷氣整番好   但我都要出動掛頸小風扇呀   唔係會熱到痴咗   始終行來行去又要搬喎 ~

小風扇係里奧大人特登買比我㗎   最搞笑佢諗住比驚喜我   點知我入咗去淘寶睇   因為佢實在淘咗好多嘢   我次次一入淘寶   就好多訊息彈出來   親親親   親到我都忍唔住入去睇佢買咩囉   之後我問佢係咪買咗小風扇 ?!   因為我已經有 2 把   以為係佢自己用嘛   佢個樣好失望咁問我點解會知 ?!   我話一入淘寶就係咁親   所以入去睇囉   之後佢話都估到我實八入去睇   痴鬼線   哈哈 ~
  
里奧大人突然要番工   好在今日無請假咋 ~

Lunch 食杯麵   因為我好熱好攰呀   唔想出去買嘢食 ~

繼續 Pack File   真係 Pack 到流哂汗  咁要抖下啦   坐番埋位感覺有啲暈暈哋   即刻食啲軟糖呀   感覺好番好多呢 ~

我同爽講話個位係西斜呀   唔可以企咁耐 ~

5 點都要走番出來啦   又要做其他嘢   好在 5 點半前搞掂 ~

放工去買餃子  順便買埋瓜菜   見蒜頭同乾蔥頭好平   又買比家姐   再買 1/4 西瓜   本身想買鯇魚都唔買喇   無手拎錢呀 ~

買完即番屋企   一放低所有嘢   真係感覺對手無無哂力   成日見到平嘢就想買   不過依家都好   買完真係會食呢   哈哈 ~

抖都唔抖就要預備晚餐   里奧大人 6 點半搞掂   所以番到屋企可以即刻開餐 ~ 

是日懶餐 - 韭菜餃拚菜肉餃 + 蠔油芥蘭

韭菜餃拚菜肉餃 - 其實我鍾意食韭菜餃   但里奧大人就麻麻哋   所以每樣都買一半咁囉 ~

蠔油芥蘭 - 芥蘭一份只係 $8   所以買來食   食慣軟身嘅菜   突然覺得芥蘭好硬   哈哈 ~

洗埋碗就沖涼   抖陣就食西瓜   依家真係狂食西瓜   成個人都熱到痴哂線呀 ~

隻手好痛呀   聽日仲要 Pack 箱   諗起都痛苦   嗚嗚 ~

我今晚 11 點唔夠都瞓覺喇   要補眠 ~