今朝 7 點半起身番工 依家懶開咗 真係好想星期六唔駛番工 哈哈 ~
買埋早餐就番菇場慢慢嘆 以前肯定唔會買早餐番菇場食 依家就好 Enjoy 喺菇場食喇 ~
忙咗一陣就可以做自己嘢 寫下 Blog 又 Load 下相 眨眼就 12 點 45 分 預備放工 ~
放工即走 超級大雨又行雷 差唔多 1 點 20 分先有小巴 差唔多 1 點 50 分落車 所以去街市睇下有無生果 不過唔係咁啱 之後家姐就打嚟話去緊沙爹王拎飛搵位 上次食唔到 家姐肯定今次要同我食 ~
咁我都去金坊拎飛先 之後見到家姐 我話邊度快就去邊度食 反正對面之嘛 哈哈 其實兩間都 OK 但越棧就肯定唔食囉 ~
今次仍然去唔到沙爹王 家姐話之得佢早啲嚟拎飛 我話食唔到咪食唔到囉 駛咩咁緊張喎 依家 2 點半就可以食下午茶餐 咁咪仲好 哈哈 ~
泰式燒豬頸肉遊船湯河 ($42) - 超級多料 無諗過餐牌註明 (細) 都咁大碗 仲要包飲品+小食只係 $42 真係超級勁平
正宗泰式遊船湯河 (碎豬肉+豬潤+豬肉丸+芽菜+蘿蔔+豬紅) ($42) - 我哋覺得好大碗 真係料又多粉又多 所以好快索哂啲湯
一開門 Berry 繞過家姐嚟撲我呀 雖然我好冧 但唔可以咁對家姐家嘛 不過家姐反而好開心同 Berry 講話快啲撲新媽咪啦 ~
我問家姐做咩張餐枱得隻生果碟喺度嘅 ?! 其他嘢呢 ?! 家姐反白眼話姐夫將佢啲零食 放哂落個紙箱再放入櫃 佢話之前買咗個新水煲 驚唔知有咩問題 所以留個紙箱 個紙箱係有開關位封口 即係開嘅時候要拉出來咁呢 家姐開嘅時候 我覺得佢好似啲黐線婆 將啲垃圾當寶物比人睇咁呀 哈哈 ~
咁我喺 AEON 買咗幾個籃比家姐 因為之前佢話將啲零食餅乾等等歸類喎 咁我見到啱 Size 就買比佢呢 ~
我又順便幫佢執另一個櫃 又比我見到隻易潔鑊 另一層又見到幾隻杯 我話點解真係層層都有鑊同杯架 之後無啦啦話想買個氣炸鍋比我 但我話千奇唔好 仲要話到勁唔鍾意同埋一定唔會用 咁佢先一定唔買 如果話屋企無位 佢會叫我用先拎出嚟咁㗎 ~
之後幫佢統一哂啲飲品 佢有 4 Pack 大嘅啤酒 2 Pack 大嘅汽水 加埋起碼 200 罐 仲有 12 支紅酒同埋 7 Pack 9 包裝檸檬茶 佢話妹妹鍾意飲 所以買多啲喎 不過佢哋有朋友嚟 都可以清唔少嘅 咁就唔話佢啦 哈哈 ~
真係無諗過家姐屋企多嘢到咁 因為好少開佢櫃 佢個櫃好大嘛 所以怪不得次次買咁多嘢又唔見哂咁 仲以為佢用得咁快 原來係收收埋埋 ~
佢又勁多環保袋同冰袋 咁我話其他嘅紙袋就掉哂去啦 佢只能夠答 "哦" 哈哈 ~
執到 5 點幾 我話好攰唔執呀 家姐以為我唔舒服 我話唔係呀 之後我話終於知道點解咁攰喇 因為之前兩個星期六係放假 瞓夠先嚟執嘢 今日要早起番工唔慣呀 ~
我又教佢用過期牙膏擦水龍頭 擦完就會立立令 咁我示範一次比佢睇 佢望到立立令真係勁開心 佢個樣堅搞笑㗎 大佬 又唔係啲咩新發現 不過我話妳勝在有個妹鍾意做家務 鍾意上網睇清潔方法囉 ~
差唔多 7 點幾就車我番屋企 番到屋企沖埋涼 順便大清潔廁所 ~
抖陣之後里奧大人就話放工 我就預備晚餐 lu ~
9 點先開餐 但我同里奧大人講話今次無發脾氣呀 可能就咁煮一個餸 但其實我都有開鑊 可能因為一番到屋企即大清潔廁所再沖涼 搞掂哂無耐就里奧大人放工 唔駛等咁呀 哈哈 ~
是日晚餐 - 燒汁牛仔骨
燒汁牛仔骨 - 今次用燒汁 唔駛驚里奧大人話黑椒汁會辣 今次煮咗 4 條牛仔骨 估唔到都幾好味 ~
洗埋碗就沖涼 之後休息喇 今日真係出咗去成日呀 哈哈哈哈 ~
今次又食又拎
我依家要追 "反黑路人甲" 但我成日讀 "路人甲乙丙" 之前睇 "慶餘年" 就會講 "瘐澄慶" 真係得里奧大人先明 ~
同里奧大人一齊睇 諗住睇 1 集 點知都係睇埋第 2 集 所以 12 點先瞓呀 ~
沒有留言:
發佈留言