香煎三文魚柳 + 節瓜鹹蛋湯 ( 27-SEP-2020 )

蘸他他醬好正㗎   其實係我想清埋啲酸青瓜   哈哈

( 27-SEP-2020  SUN )

今朝里奧大人出咗門口   其實我都醒醒哋   但又覺得太早起身   所以又瞓下   不過瞓得唔好   臨起身前仲發惡夢   屋企有好多鬼   啲鬼仲 "捐" 入我張被入面   個畫面好真實   我感覺都張被係郁咁架   之後好在鬧鐘響   唔係仲有排驚   哈哈 ~

我校 9 點半起身   如果今朝咁發夢之後再瞓番   分分鐘瞓到 11 點㗎 ~

食埋早餐已經 10 點   之後大清潔屋企   星期五特登清潔廚房同廁所   所以今日好快搞掂   拖埋地就即沖涼 ~

抖陣就出發   買埋 Market O 芝士餅就同里奧大人食 Lunch 喇 ~

今日其實涼咗   因為家姐叫我着多件衫   但我話超級熱呀   真係行到我出哂汗   呢排講嘢又好緊張咁   因為我反應好大   里奧大人話驚我甲狀腺翻發   咁尋晚又覺得雙手比較震   真係好煩添   如果再係咁就去驗血   之後睇番中醫調理一下 ~

12 點 45 分同里奧大人一齊食 Lunch   真係好耐無試過喇   勁開心 ~

1 點半食完   里奧大人番公司開會   我就去剪髮   師傅話要等 20 分鐘   咁照等啦   因為我實在太想剪頭髮   8 個月無剪喇 ~

3 點剪完就即番屋企   沖埋涼就執衫   今次到我掉咗一袋冬天衫   因為所有衫都令我諗起媽咪   其實媽咪走咗之後   我着過邊件衫見媽咪   我都會掉   已經掉咗八八九九   我唔想一拎起就諗番唔開心嘅嘢 ~

執完之後   心情好低落   但點都好過每次見到都唔開心 ~

里奧大人 7 點開完會   所以今晚差唔多 8 點先開餐 ~

是日晚餐 - 香煎三文魚柳 + 節瓜鹹蛋湯

香煎三文魚柳 - 落鑊煎真係香口好多   因為我實煎到個皮脆卜卜   其實煎唔係問題   不過我真係唔想大清潔廚房啫   哈哈 ~

節瓜鹹蛋湯 - 本身諗住蠔油燜節瓜   但得兩個節瓜仔   所以都係滾湯算喇 ~

洗埋碗再大清潔廚房   沖埋涼就食生果同月餅 ~

奇華迷你白蓮蓉月餅   我諗緊點解有個白字   因為我只諗起中發白   之後先諗到係白蓬蓉呀   

蓮蓉同蛋黃比較乾

里奧大人 11 點都瞓   我就睇多陣電視   11 點 15 分先瞓 ~