炸雞 & 肉醬意粉 + 花生糯米飯 + 粟米蛋花湯 + 自家制古早味蛋糕 ( 8-SEP-2020 )

( 8-SEP-2020  TUE )

里奧大人 7 點 10 分起身   我都懶床都 7 點 20 分先起身 ~

諗住搭早一班車   點知喺屋企整依樣整嗰樣   又走咗班車   哈哈 ~

買埋早餐就番菇場   好在番得早咋   因為之後落好大雨呢 ~

食完早餐   抖下又開工了 ~

Lunch Time 就出去行陣   再買炒麵番菇場食   呢個炒麵真係好味道㗎   最正係有好多菜絲同魷魚絲   之前買開嘅炒麵   得幾條紅蘿蔔絲架咋 ~

放工準時走   番到屋企就沖涼   抖陣先煮晚餐 ~

里奧大人 7 點幾先放工   等埋佢沖涼   要 8 點幾先食飯 ~

是日懶餐 - 炸雞 & 肉醬意粉 + 花生糯米飯 + 粟米蛋花湯 + 自家刮古早味蛋糕

炸雞 & 肉醬意粉 - 尋晚食剩   其實炸雞就特登叫多 2 件   咁今晚唔駛諗住咩   哈哈   肉醬意粉都係落鑊煮熱   因為放入焗爐比較乾身   講真   我自己食真係求其   但比里奧大人食就整好啲咁呢 ~

花生糯米飯 - 想清埋包花生   咁整糯米飯啦   但食完就食唔落意粉   所以里奧大人係咁話好飽   哈哈 ~   

粟米蛋花湯 - 懶人湯   呢排又出現多咗 ~

自家刮古早味蛋糕 - 里奧大人同事整㗎   好味道呀 ~

我食飯嘅時候   我話下次咁夜放工就唔會煮   之後聽到佢話咩 10 點半 11 點瞓   我好大反應話咁夜食飯   洗埋碗都 9 點啦   10 點半點瞓呀 ?!   之後佢話係聽朝可以瞓到 10 點半11 點   仲話我成日忟忟憎憎   不過我都覺㗎   一夜食飯就咁   因為我真係好唔鍾意放工等好耐先煮   好似要拖慢做咁 ~

沖埋涼都休息喇   睇埋方東昇同新聞   差唔多11 點半左右瞓 ~