韭菜餃拚水餃 + 腐乳通菜 + 自家制麵包 ( 15-SEP-2020 )

橙香黑朱古力果仁 / 芝士牛油果 / 黑麥無花果雜果仁

( 15-SEP-2020  TUE )

尋晚 1 點幾咳醒   同埋喉嚨好痕   終於忍唔住起身用鹽水漱口   之後就舒服好多   但好鬼耐先瞓得番呢 ~

今朝里奧大人起身就問我係咪瞓得唔好   因為我成晚係咁郁呀 ~

落毛毛雨以為會涼涼哋   點知都一樣咁熱   哈哈 ~

買埋早餐就番菇場   同阿蟲同 Lift   佢同我講話好熱   成身濕哂   我本身諗緊係咪得我一個咁熱呀   好在佢都話好熱咋 ~

菇場依家唔係太忙   可以抖下 ~

呢排瞓得唔好   都唔知轉天氣定咩   所以頭先都買支五花茶   都唔記得有咩功效   但唔敢買雞骨草   費事太涼 ~

Lunch 食杯麵   原來出面落好大雨呀   同事以為我知落雨所以唔出去食   但其實我都唔知出面落雨   哈哈 ~

諗住唔忙   點知 2 點又開始忙   一忙就忙到 4 點幾 ~

放工即走   去埋街市買餸   估唔到街市無咩人   實在太好 ~

買完就即番屋企   沖埋涼就預備   之後里奧大人都番到屋企   我叫佢沖涼等食 ~

是日懶餐 - 韭菜餃拚水餃 + 腐乳通菜 + 自家制麵包

韭菜餃拚水餃 - 里奧大人話屋企有急凍水餃   點解要買 ?!   我話新鮮即包嘛   咁當然買嚟食啦   急凍係做儲備嘛   我再加白蘿蔔墊底   因為好想清熱氣呀 ~

腐乳通菜 - 通菜只係 $5   咁啱我好想食腐乳   所以即買 ~

自家制麵包 - 里奧大人影相叫我揀邊款   我只要芝士牛油果   之後里奧大人同事見佢放工   即刻幫手用盒裝麵包比佢拎走   我哋諗住每人一個   估唔到有 3 個 ~

洗埋碗就開機洗衫   之後沖涼休息 ~

好攰呀   所以今晚 10 點 50 分都瞓喇   依家都希望最遲 11 點瞓   過番正常生活   哈哈 ~