( 26-SEP-2020 SAT )
感恩尋晚瞓得好好呀 雖然都有發夢 ~
里奧大人話陪我食早餐 但我叫佢瞓啦 今晚夜放工 瞓多陣好過 ~
咁我沖完涼 佢話佢已經醒咗 想陪我食早餐 ~
我其實前晚講笑話依家好少時間陪我 因為依家好少出去食飯 即係唔駛接佢放工 見面時間少咗 估唔到佢今朝陪我食早餐 我話佢夠瞓緊要過陪我食早餐啦 ~
食完抖陣就番工 呢兩日開始涼涼地 但行得急都會出汗 ~
菇場唔忙啦 家姐 Whatsapp 話買咗金奇異果比我 我呃佢話買咗 果然係唔信我 叫我打比佢 哈哈 ~
其實上星期我話想買嘅 但唔靚嘛 佢今朝又特登去買 ~
里奧大人同家姐今日做埋啲嘢都差唔多 感恩佢地對我咁好 所以第時我講嘢都要小心啲 哈哈 ~
放工即走 今次家姐仍然係會去沙爹王 但今次終於食到沙爹王喇 等咗好似 10 分鐘就有位 感恩感恩 ~
我話今次主要食小食 因為我仲好飽呀 ~
我睇咗時光倒流二十年 我心諗廿年前鬼記得咩 家姐就睇咗十二點前價 但我又好奇怪點解餐牌有兩個價錢 但係又同一個價 ?! 之後我舉手問問職員 好在無人理我 因為家姐話原來係十二年前價呀 哈哈 大佬 我哋兩姊妹都唔知睇咗啲咩 ~
時光倒流十二年
十二年前價
越南豬肉春卷 ($33/4件) - 個皮好煙韌
避風塘軟殼蟹 ($62) - 好惹味但超級熱氣 家姐話食完之後 個鼻哥窿好慶
蒜香牛油烤餅 ($15/3件) - 無諗過咁細件 哈哈 但好香蒜蓉味
芝士條 ($5/5條) - 怪不得一蚊一條咁平啦 原來咁細條
我手指尾都大隻過佢 哈哈
凍奶茶 ($9) - 凍同熱嘅奶茶咖啡 我都一定要少奶 否則我會好反胃 家姐最初唔慣 依家都慢慢接受 無計啦 唔係無得飲 嘻嘻
食完就去廣良興買豬肉乾 之後 Join 埋姐夫就番屋企喇 ~
我行最後 Berry 繞過家姐同姐夫 係咁撲我 但我除緊鞋摸唔到佢 之後佢行開又再嚟揍我 完全無揍家姐同姐夫 入到屋都只係跟住我 家姐話佢女生外向 哈哈 ~
佢跟埋我入廁所洗手 但我想關門嘅時候 佢無啦啦又轉身走 塊臉撞到牆呀 勁心痛 好在無事咋 佢真係成日四圍衝無時停 ~
一路咬手指 一路眼超超
靜靜咃咪幾乖囉 哈哈
同家姐傾傾下偈 Berry 喺度吠 果種吠法係好似叫我哋開門咁 果然係妹妹嚟咗 ~
佢請我同家姐飲新鮮椰青水 知家姐喉嚨痛 又話我上次請佢食韓國嘢 我話無喎 之後佢話家姐比咗盒 Market O 芝士餅比佢 咁應該家姐話係我買 ~
新鮮椰青水
妹妹尋日都特登拎水晶梨比家姐 咁今日一齊食 家姐比 Berry 唔食 我同妹妹比就食 好在之後都食家姐比嘅 如果佢唔食家姐比嘅 真係覺得 Berry 係咪痴咗線 哈哈 ~
妹妹拎嘅時候話好大嚿 但我睇唔到 之後家姐拎比我 我又好自然話咁大嚿 家姐話尋晚姐夫又係講好大嚿
家姐又用咗接近 $800 買咗 20 個水晶梨 咁比咗 2 個妹妹 佢細路女覺得好貴嘛 之後叫家姐唔好成日用咁多錢買嘢 好搞笑呀 同工人講嘅一樣 不過家姐真係鍾意買買買 所以我都同里奧大人講 千奇唔好話自己鍾意食啲咩買啲咩 唔係家姐實買 ~
妹妹坐到 5 點幾就走 家姐比個貓山王月餅比佢媽咪 佢係都話唔要 但家姐話妳媽咪鍾意食 佢咁先要 哈哈 ~
佢走之後 我就幫家姐執衣櫃 又掉咗 1 個大嘅黑色袋 咁姐夫喺廳 問家姐有無掉到嘢 ?! 哈哈 ~
馬來西亞出品 應該好味嘅
家姐話姐夫好鍾意我嚟屋企 因為成日幫佢掉嘢 姐夫唔敢掉家姐啲衫褲鞋襪 我就乜都同佢掉 有咩想要着就同我講 我會買比佢呢 ~
今日又幫佢執咗起碼 50 對新襪 全部係上次去韓國同日本買嘅 即係買完又買 我話咁唔係辦法 下次幫妳執埋底衫褲同襪嘅櫃桶 將妳啲舊嘢掉哂 唔係妳唔會知道自己有新嘢 ~
不過今日執咗 2 個櫃就唔執喇 我話好攰 點知家姐話因為我今日番工 笑死我 因為我上星期係咁講 ~
差唔多 6 點半走人 又拎一大袋食物番屋企 ~
番到屋企放低哂所有嘢就即沖涼 抖陣就煮晚餐喇 ~
里奧大人 8 點左右放工 今晚接近 9 點先開餐呀 ~
是日晚餐 - 黑椒牛柳絲炒意粉 + 清甜小旺菜 + 自家制曲奇 & 啫喱
黑椒牛柳絲炒意粉 - 星期六太夜食 所以多數煮麵 咁今晚都係清埋兩塊牛扒 咁炒意粉就最好 今晚都係清埋少少意粉 里奧大人話肉多過意粉呀 ~
清甜小旺菜 - 食埋最後半棵 唔想再見佢住喇 ~
自家制曲奇 & 啫喱 - 好開心又有甜品食呀 今日真係勁多收鑊呀 ~
洗完碗就大清潔廚房 其實聽晚都會煎嘢 但都忍唔住要大清潔 好唔鍾意啲油彈到周圍都係 我寧願辛苦啲 試過有次就係煎到無清潔 真係瞓得唔係咁好架 硬係差咁啲嘢無做咁 ~
沖埋涼就休息 終於睇埋 "反黑路人甲" 大結局 咁之後我又可以循環再當新劇睇喇 哈哈哈哈 ~
不過今晚我都係 11 點幾瞓 反而里奧大人話睇多一陣書 遲啲先瞓 ~
沒有留言:
發佈留言