韓式豬軟骨 + 腐皮卷 + 自家制麵包 ( 13-APR-2022 )

( 13-APR-2022  WED )

尋晚瞓瞓下鬧鐘響   但明明好似啱啱先瞓得着咁嘛   點知原來真係里奧大人校嘅鬧鐘響囉   佢將12:10pm 校咗 12:10am   真係一年實有幾次比佢校錯鬧鐘而醒囉   唉 ~

最慘之後又熱醒咗   直頭出汗呀   但已經開咗冷氣喇噃   真係唔知做乜鬼 ~

今朝臨起身前仲發惡夢   係沖哥同阿爽對阿齋落降頭定咩   阿齋瓜咗   但佢哋唔送佢去醫院   仲要我一齊拍片話佢瓜咗添呀   勁恐怖 ~

里奧大人話我睇完金宵大廈呀   所以發惡夢   佢成日話我又要驚又要睇㗎   哈哈 ~

今朝真係搞笑   我正想食早餐   家姐打嚟話尋晚睇 "金宵大廈" 好恐怖呀   駛唔駛咁早打嚟傾呀   笑死   不過傾咗 10 分鐘都要食早餐喇 ~

早餐都係奶醬多   希望唔好咁快食厭 ~

依家菇場暫時停咗班清潔姐姐嚟清潔   所以我放工前都要洗杯   朝早就倒垃圾   其實都只係廢紙同紙巾   咁我拎垃圾桶去後巷   阿爽叫我做阿姐   阿齋叫我做垃圾婆   呢個好笑   哈哈 ~

菇場忙呀   日日係咁就好 lu ~

Lunch Time 出去行下   今日真係無嘢買呀   突然好想食粥   順便買 2 條牛脷蘇比阿齋 ~

仍然忙   但仍然放工準時走   今晚去完超市買乳酪同涼粉就番屋企 lu ~

沖埋涼就即開機洗衫   里奧大人 6 點左右放工    我都要預備 lu ~

是日懶餐 - 韓式豬軟骨 + 腐皮卷 + 自家制麵包

韓式豬軟骨 - 之前喺青林買咗包豬軟骨   咁尋晚燜定   我求其加蒜蓉燒汁同韓國辣椒醬咁咋   估唔到都幾好味   最正係軟骨唔硬   依家牙力唔好呀   所以太硬唔會食囉 ~

腐皮卷 - 前晚食剩   今晚一定要食啦   豆制品類唔想留太耐 ~

自家制麵包 - 今次係朱古力堅果味道   其實仲有 2 塊   我留番聽晚食   我今晚都只係食餸咋   再煮個油麵比里奧大人食算喇 ~

洗埋碗就抖陣   8 點左右開始跳舞 ~   

因為里奧大人驚我跳傷對腳   所以特登搵另一個導師嘅舞蹈比我跳   真係好感激佢吔   因為我跳新舞係無腳痛呢   同埋最緊要係超級爆汗   哈哈 ~

沖埋涼就睇電視   今晚開咗 2 個鐘頭冷氣之後就開風扇   始終依家未到最熱嘅時候   我唔係咁想開冷氣囉 ~

里奧大人話同事係都要比兩個橙比佢   好搞笑   

工人影比家姐睇㗎   我話 "Berry 掛住妳......先至奇"   哈哈哈哈

已經接近 2 個月無見 Berry 喇   好想索下佢陣味呀   希望佢仲記得我啦

里奧大人 11 點左右都瞓   我就忍唔住睇埋 ASTRO 討論區嘅新留言   所有成 12 點先瞓呀 ~