焗香炸雞膇 + 水餃拚雲吞 + 紅豆年糕湯 ( 8-APR-2022 )

里奧大人尋日食剩半盒星洲炒米   所以今晚一定要食埋喇

依家嘅人參果係大大個   呢度要 $28 

( 8-APR-2022  FRI )

感恩一覺瞓天光   又係里奧大人鬧鐘未響   我都醒咗   不過就懶下床   同埋想里奧大人瞓耐啲 ~

估唔到里奧大人聽唔到自己鬧鐘響   佢仲話鬧鐘無響到   我話有響呀 ~

今朝都幫佢搽麵包   佢幾開心呀   我好衰架   主動幫佢搽就得   但佢叫我搽就唔會   我唔想好似喺屋企由朝做到晚咁呀   哈哈 ~

我 8 點 15 分番到菇場   第一次見菇場對門未開呀   我仲以為出錯 Lift   因為無諗過西瓜居然未番嚟   真係超級少有 ~

阿虫就 8 點 22 分番到   佢都好愕然無門口入呀   咁大家企喺公司門口吹水啦 ~

西瓜終於 8 點半先到   要拿拿聲洗杯同食早餐了 ~

菇場忙下停下   呢排比較靜 ~

Lunch Time 去麵包同買菜   本來想食酸辣米線   但又唔係咁餓   所以食鯪魚球米算喇 ~

都係忙下停下   可以準時 4 點半放工啦 ~

今晚要去完超市買嘢   最開心終於用哂家姐比我嘅電子 Coupon   佢之前比咗 5 張比我   但未必次次買到 $100 嘛   所以要成日記住要用   家姐仲搞笑   次次都話做咩唔買夠 $100 ?!   大佬   雖然唔駛錢   但真係唔會特登為咗用張 Coupon   而求其買嘢買夠 $100 囉 ~

番到屋企即沖涼   不過今晚里奧大人好晏放工   所以我整完糖水就提早做大清潔喇 ~

煮紅豆年糕湯真係好方便   哈哈

今晚差唔多 7 點半先開餐   好在煮啲簡單嘢 ~

是日晚餐 - 焗香炸雞膇 + 水餃拚雲吞 + 紅豆年糕湯

焗香炸雞膇 - 本身想買麥樂雞   但 6 件好似要 $2x   咁我覺得買香炸雞膇仲抵   5 隻都只係 $28   最緊要係好味嘛   我寧願花啲時間焗呢 ~     

水餃拚雲吞 - 都好似放咗 2 個星期有多   所以要食埋去啦 ~

紅豆年糕湯 - 有 3 罐紅豆蓉係 4 月 10 日到期   我要襯未到期之前煮埋去   里奧大人以為我自己煮紅豆   仲成日話要起沙先搞笑   今次煮兩款年糕   反而貴嘅無咁煙韌   哈哈 ~

洗埋碗就開機洗衫   今晚都唔跳舞喇   比膝頭哥抖下先 ~

睇完電視就睇 Youtube   不過都係 11 點幾就瞓 lu ~