口水汁雞翼 (外賣) + 巴辣香雞翼 (外賣) + 椰菜炒刀削麵 + 椰菜 ( 5-APR-2022 )

Pacific Coffee 換咗 3 件蛋糕   但 Brownie ($16) 就留番聽晚先食

法國 Valrhona 特濃朱古力蛋糕 ($39) - 好濃朱古力味呀   正  

士多啤梨芝士蛋糕 ($34) - 一般啦   但我都鍾意食   哈哈

( 5-APR-2022  TUE )

今朝 9 點 10 分醒咗   咁梳洗之後就整早餐   居然由 9 點 20 分整到 10 點 05 分   唔知以為煮咩大龍鳳   哈哈 ~

牛油焗芝麻包   勁好味   今朝要食豐富啲   因為一陣要出去行街   哈哈

沖完涼就抖陣   差唔多 11 點左右就出發喇 ~

我同里奧大人都有 3 個半月無去行街   我唔想長假期先出呀   因為肯定多人   所以揀今日出去行下咁呢   同埋我最想係清哂 Pacific Coffee 同 KFC Coupon 呀   今年 6 月到期喇 ~

今次講明   衫褲鞋襪就一定唔會買㗎喇   所以主攻睇食物   哈哈哈哈 ~

去 MUJI 買啲零食   之後里奧大人話買韓國炸雞做晚餐   我話堂食先好味   如果再翻焗   我好驚焗到好乾   所以我話唔買呀 ~

再周圍行下   之後都要買午餐喇 ~

去 KFC 換雞翼   再去譚仔三哥買米線   之後去 Pacific Coffee 換咖啡同蛋糕   職員叫我補多十幾蚊   咁我比完之後   佢又比番我   佢話有十幾蚊多咗   我奇怪用 5 張 Coupon 但剩十幾蚊 ?!   原來佢以為我用 4 張 Coupon 呀   所以我要買 3 件蛋糕   因為佢退唔到比我 ~

其實我以為 1 張 Coupon 金額係 $20   但原來係 $25   問番里奧大人同家姐   張 Coupon 金額係 $20 定 $25 ?!   佢哋又話唔記得   哈哈 ~

最後買埋珍珠奶茶就走喇   里奧大人知我鍾意飲珍珠奶茶   我之前話飲咖啡就飲唔到奶茶   佢話駛咩特登買 2 杯咖啡呀   買 1 杯咖啡   剩咗就買蛋糕就得啦   佢今次真係好醒呀   哈哈 ~

因為食物係熱飲品係凍   所以要即番屋企喇 ~

番到屋企都 1 點 45 分   要即開餐   因為驚啲湯唔熱呀 ~

過橋米線 (煳辣小辣湯底) + 口水汁雲耳 + Ice Caffe Mocha + 波霸奶茶

抖陣就沖涼   之後打機同投票   今日唔想做家務呀 ~

忍唔住買 Sweet Potato Stick   我覺得 $35 貴呀   但又好想食  

1 樽雪菊 + 2 樽胎菊總共 $75   我覺得抵呀

6 點唔夠就預備晚餐   但 6 點 45 分先可以開餐   估唔到咁都要整 1 個鐘   哈哈 ~

是日晚餐 - 口水汁雞翼 (外賣) + 巴辣香雞翼 (外賣) + 椰菜炒刀削麵 + 椰菜

口水汁雞翼 (外賣) - 喺譚仔三哥買㗎   因為份量係 XL   所以要 $42   我覺得唔夠辣 ~

巴辣香雞翼 (外賣) - 用 $20 Coupon 再加 $2   咁 4 隻 $22 真係好過自己整   同埋都算大隻呀 ~

椰菜炒刀削麵 - 里奧大人唔知道係有刀削麵   仲話點解今晚咁奇怪只係食菜   哈哈 ~

椰菜 - 本來想加埋落刀削麵   但又好似多得滯   所以另外裝一碗   我覺得椰菜爽爽甜甜都好味道 ~

洗埋碗就食蛋糕   抖 45 分鐘就跳舞 ~

今晚都係跳 25 分鐘   我膝頭哥痛呀   里奧大人話唔可以跳咁耐 ~

次次一做運動   無耐就腳痛   里奧大人話我未 Warm Up 夠就不斷做   佢咁講又真喎   之前徑步又係咁   停咗無徑步   我隻腳真係唔痛啊 ~

睇 Youtube 睇到 11 點 15 分   明明諗住瞓覺   但醒起未做快涮   所以要起身做   因為如果朝早做   我會好緊張架   同埋用多咗時間咁呢 ~