辣汁炒秀珍菇雞肉 + 菜心苗 ( 6-APR-2022 )

~

( 6-APR-2022  WED )

感恩尋晚都瞓得唔錯   可能天氣仲係涼涼哋 ~

今朝又突然搞肚痛   其實尋晚個肚已經唔係咁舒服   我估應該午餐太辣   所以咁呢 ~

拎早餐嘅時候   阿哥以為我 20 號先開始正常上班時間   我話今個星期已經正常時間了 ~

早餐食奶醬多   里奧大人話唔可以日日一樣款   但我又可以喎   因為我朝早最緊要係有杯咖啡就得   食咩無所謂   反正我食來食去都喺嗰兩款   哈哈 ~

阿爽見到我   就話到我爛蕃茄   之後我同阿齋傾偈   佢第一句就話妳塊臉敏感呀 ?!   唉 ~

菇場忙咗陣   之後又可以 Hea 過了 ~

Lunch Time 出去買菜買麵包   之後在周圍行下   行到 12 點半都要買粉果炒麵番菇場食喇 ~

唔太忙就做下 Filing   一做又做到 4 點半了   夠鐘放工 ~

放工去超市買嘢   見到個婆婆睇咗包瓜子好耐   我經過 3 轉都見佢仲喺度睇   忍唔住問佢想買咩 ?!   之後佢問包瓜子係咪葵花瓜子 ?! 我話包裝寫係囉   又問我啲瓜子硬唔硬 ?!   我話無食過唔知喎   同埋講比佢知價錢幾多   佢再問包栗子點樣食 ?!   我話係即食   佢又問硬唔硬 ?!   我答無食過呀   不過我叫佢唔好買啦   因為我覺得栗子質感比較乾   驚佢鯁親 ~

見佢仲諗緊買唔買好   咁我叫佢慢慢揀啦   我走先喇 ~

番到屋企即沖涼   之後浸菜同預備晚餐 ~

里奧大人 6 點幾先番到屋企   叫佢沖埋涼先開餐 ~

是日晚餐 - 辣汁炒秀珍菇雞肉 + 菜心苗

辣汁炒秀珍菇雞肉 - 好在買咗迷你秀珍菇   咁唔駛就咁齋雞肉咁悶 ~

菜心苗 - 都係 1 斤分兩餐食   諗起後生真係一晚煮 1 斤菜㗎   可能嗰時又帶飯   煮多啲都唔驚   同埋食力又勁呢   哈哈 ~

洗埋碗就休息下   諗住跳舞   但里奧大人話今晚唔好跳喇   依家隔日跳好啲   希望隻腳唔好再痛啦 ~

尋日食剩嘅 Brownie   我再焗熱食   勁好味呀

唔跳咁即沖涼同開機洗衫喇   呢星期睇 "金宵大廈 2"   里奧大人同阿 mi 都話 "妳唔驚咩 ?"   家姐就直頭話有咩好驚呀 ?!   不過唔好講笑   我真係覺得幾恐怖   真係一路睇   一路要慢慢呼吸咁架 ~

有段劇情講到個媽媽係咁抹屋   個女話 "其實間屋都好乾淨   妳唔駛抹啦"   之後我同里奧大人一齊對望一齊笑   因為里奧大人見我抹嘢   就肯定講 "其實都好乾淨   唔駛抹啦" 咁㗎 ~

今晚 11 點已經好眼瞓   勁開心呀   晚晚係咁時間瞓就好 lu ~