蒸臘潤腸 + 安東燉雞膇 + 蒜蓉菜心苗 ( 14-APR-2022 )

( 14-APR-2022  THU )

今朝番到菇場又係未開門   感恩 2 分鐘之後就見到西瓜   依家我唔敢早一班車番工呀   我唔想企喺門口等人開門囉 ~

早餐都係奶醬多   連食 4 日呀   但仲未厭喎   呵呵 ~

阿花送支車銀優嘅筆比家姐   其實佢之前都送咗支筆同洗頭水比我   所以我話佢次次買嘢都有嘢益我   哈哈 

菇場忙   要開行 Turbo 做呀 ~

Lunch Time 去麵包   之後行多陣就買牛腩河番菇場喇 ~

阿齋捉住我傾偈   傾咗 15 分鐘   所以啲湯比河粉索哂   嗚嗚嗚嗚

仍然忙   感恩放工前搞掂哂   可以安心放假了   嘻嘻 ~

放工即去街市買餸   買下買下又兩大袋 ~

我每次去街市   都會拎定啲錢出嚟   但只係用手拎住   買完嘢就成手散紙   因為一隻手已經拎住嘢   無手數銀仔   一係啲銀紙比我 "渣" 到皺哂   所以我依家用銀包仔   最開心係呢個銀包係上次喺曼谷買㗎   當時未知點用   只覺得又平又靚先買咁囉   咁依家終於用得着就最好啦

沖完涼即預備晚餐   今晚 7 點唔夠都可以開餐 ~

是日懶餐 - 蒸臘潤腸 + 安東燉雞膇 + 蒜蓉菜心苗

蒸臘潤腸 - 叫做加多個餸啦   哈哈 ~ 

安東燉雞膇 - 仲食剩少少   聽晚再食   以前一係格硬食哂   再唔係就掉   依家就一定留番   真係覺得以前點解唔會有 "留番" 呢個概念囉 ~

蒜蓉菜心苗 - 買咗 2 斤菜心苗   可以分 3 餐食 ~

盒涼粉今晚到期   所以叫里奧大人即刻食喇   之後見到盒煎炸豆腐已經過期 2 日   咁即刻解凍啲免治豬肉   聽晚可以蒸豆腐豬肉 ~

里奧大人 8 點開會   我就大清潔屋企   之後自己跳舞啦   抖陣就沖涼休息了 ~

沖埋涼就開冷氣   都係開 2 個鐘就熄再開風扇 ~

里奧大人 9 點半開完會   我比綠茶雪糕比里奧大人食   其實上次以為有折   點知係無囉   真係心都痛埋   所以叫佢快啲食哂   唔想見到佢呀   哈哈 ~

睇陣 Youtube   都係 11 點幾瞓呢~