招牌餃子 (外賣) + 自家製咖哩酥 ( 6-MAR-2021 )

家姐同事話卡樂 B 咖哩味薯片好味   又買咗包比我   開心開心

( 6-MAR-2021  SAT )

今朝鬧鐘響   原來係里奧大人無關佢自己個鬧鐘   我尋晚問佢又話關咗   真係呢   之後再瞓多 20 分鐘就要起身 lu ~

早餐食吉列魚柳餐    8 卦番嚟同我講話佢買嘅時候無哂吉列魚柳喇   我真係早佢一步咋   其實尋日我話食   佢都突然想食   不過估唔到囉   因為佢同里奧大人一樣係怕熱氣嘅人囉 ~

菇場個個唔忙啦   唔係打機就上網   所以次次一到 1 點就會個個準時彈起 ~

里奧大人話同事同佢講   叫你太太食完上面嗰個先食下面嗰個   咁即係無佢份啦   哈哈   我覺得好好笑

家姐去糟糟屋企拎嘢   叫糟糟車埋我放工   因為家姐唔識路   咁接完我就再車糟糟番屋企   之後就去新都城喇   今日行大運也 ~

2 點左右到新都城   家姐話食泰菜   感恩金坊好快有位呢 ~

正宗泰式遊船湯河配黃咖哩拚蒜蓉麵包條 ($45) - 下午茶份量絕對唔講得少   又唔記得要少河粉呀

蒜蓉麵慨包條就好味

香葉肉碎配煎蛋飯 (細) ($45) - 我話好味呀   家姐第一句就問辣唔辣 ?!   真係笑鬼死   頭先我比佢睇個樽仔   佢話裝辣椒油就最好   真係裝咩都要辣   裝沙糖唔得嘅

無諗過咁樣煮雞蛋   哈哈

4 點番到屋企   好掛住 Berry 女呀   佢成日撲向我個肚腩度   一係就揍向我 Pat Pat 度   專揀有肉嘅地方   識貨識貨   哈哈哈哈   撲唔係問題   但真係好鬼大力   次次撲到我大叫話好痛呀 ~

上次家姐已經話 Share   但唔記得   佢尋晚見到就即刻拎定出嚟比我

家姐話: 樂家杏仁糖   送比妳最錫嗰幾個   呢首真係經典廣告歌呢   哈哈

今日 Berry 去打針   咁一入醫生房   醫生好愕然問點解戴兩條狗帶 ?!   事實上 Berry 真係算細隻嘛   家姐話因為走過一次   所以真係好驚   一定要戴兩條狗帶呀   哈哈 ~

咁睇係咪細細隻咁呢

成張梳化都係佢嘅嘢   哈哈

飛撲埋嚟食雞肉

佢真係好鍾意食㗎

家姐訂咗好多嘢比 Berry   但送漏咗 1 條芝士狗骨   之後家姐話唔敢開呀   驚要有証據話真係得 1 條喎   我話有無搞錯呀 ?!   依家佢送漏比妳   而佢都收咗妳兩條錢喎 ?!   唔係送多妳 1 條比妳喎   開嚟食駛咩驚呀 ?!

聞下先

之後就係咁咬咬咬

我對住佢話   做咩又唔咬呀 ?!

之後咁樣望我   哈哈哈哈

原來眼瞓

如果塊臉無咁長   係得意啲㗎   哈哈

好可憐咁

我會捉住佢個頭仔係咁索㗎   香香的   同朱仔係同一個味道

比我摸到佢都無覺好瞓   哈哈

家姐無啦啦話我唔鍾意 B 仔佢哋   我叫佢唔好亂講嘢呀   係佢嘅狗仔就鍾意   之後家姐話我因為覺得 Berry 身世好可憐   所以特別錫佢   咁事實係喎   佢細細個真係身體好弱㗎   諗起當日話如果醫唔好   要比佢安樂走㗎喇   我喺菇場爆喊呀 ~

今次好感恩呀   Berry 打完針都好精神   又食零食   又一次過食哂自己嘅晚餐 ~

差唔多 7 點走人   又拎 1 袋嘢走呀 ~

買埋水餃就番屋企   今晚要大清潔廁所呀   搞掂哂就沖涼   舒舒服服等里奧大人放工 ~

今日家姐叫燴燴幫手去超市買詩樂氏百潔布   糟糟幫佢買咗 1 箱   之後話都幾重   我話唔重就奇啦   家姐比 10 包比糟糟   6 包比我   4 包比陳老二   其他就係佢要哂   上次叫家姐留 2 粒椰子糖比我   但我無拎   估唔到佢仲記得   哈哈

里奧大人 8 點左右放工   等佢沖埋涼   9 點先開餐呀 ~

是日懶餐 - 招牌餃子 (外賣) + 自家製咖哩酥

招牌餃子 (外賣) - 今晚煮 10 隻比里奧大人算喇   我都仲係好飽咁 ~

自家製咖哩酥 - 咖哩酥好好味呀   仲有一款係洋蔥雞柳又係好味 ~

洗埋碗就休息   好開心完全無出汗   所以唔駛再沖身 lu ~

今晚 11 點都瞓喇   出咗去全日有啲攰   哈哈 ~

韓式辣醬雞 + 麻醬蘭州麵 + 紅油拍青瓜 + 旺絲拼菠菜 ( 5-MAR-2021 )

( 5-MAR-2021  FRI )

今朝落毛毛雨   所以真係覺得凍咗 ~

里奧大人今日 WFH   又可以陪我食早餐喇 ~

里奧大人特登買比我飲嘅樽仔奶茶   佢叫我拎番工   但我話唔啦   拎到番去都暖哂   叫佢自己一陣飲呢

菇場唔忙呀   又做下自己嘢 ~

今日約師傅整熱水爐   原來有零件壞咗   同埋水壓低   所以成日無力   之後佢校大咗就無問題   成個過程 10 分鐘搞掂 ~

Lunch Time 出去買消毒洗手液   行咗 25 分鐘就要即買牛腩河番菇場   因為落緊毛毛雨喇 ~

忙下停下   有時打字打到呆呆哋   居然問 8 卦廿字點打 ?!   我係咁打頭尾碼   其實就咁打 T 咪得囉   哈哈 ~

放工即走  番到屋企都預備喇  ~

6 點半就瞓成咁

里奧大人 6 點幾番到屋企   又問今晚食咩   我陰陰咀笑   佢就會話係食好嘢吖嘛   哈哈 ~

是日懶餐 - 韓式辣醬雞 + 麻醬蘭州麵 + 紅油拍青瓜 + 旺 C 拚菠菜

韓式辣醬雞 - 今次焗得脆皮喇   上網睇話可能焗爐 200 度根本唔夠 200 度   咁我用光波爐   開到 220 又真係得喎   我之前係 180 度咋 ~

麻醬蘭州麵 - 唔想麻辣   突然醒起雪櫃有支芝麻醬   仲要係 3 月到期   好在睇一睇   無諗過麻醬撈蘭州麵都好味   加埋京蔥同青瓜   勁有冷麵 Feel   正呀   我就係想食呢個味道好耐喇 ~

紅油拍青瓜 - 買咗 4 條青瓜仔   尋晚手快快全部刨皮   咁食剩 2 隻   紅油撈就算喇 ~

旺絲拚菠菜 - 前晚食剩 2 棵旺絲   尋晚食剩 1 份菠菜   咁今晚煮埋去啦   不過都仲剩番幾棵菠菜   又要留番聽晚食 lu ~

洗埋碗就開機洗衫   之後沖涼喇 ~

我坐梳化睇電視   里奧大人即主動坐埋嚟同我按摩左手   勁感動呀   不過我話唔痛呀   唔駛按呢   咁佢都有主動做家務   番工又多嘢做   個人都攰嘅   所以如果唔係勁痛   我唔會下下叫佢按摩呢~

9 點半瞓喺家姐隻腳度呀   嗲到呢

同家姐講聽日去佢屋企   佢問我係咪放假 ?!  我話放就係放   不過係放工   哈哈哈哈 ~

之後又話我唔係做老大咩 ?!   我話做小二呀   上年小三嘛   所以下年先做老大坐正囉 ~

比佢講完   我都即睇月暦同埋問里奧大人係咪放第二星期呀   哈哈 ~

睇埋半 Part 新聞都瞓喇   天氣涼涼哋   好快有睡意㗎 ~

墨西哥雞肉卷餅 + 火腿粟米湯 ( 4-MAR-2021 )

諗住扮片皮雞   但塊卷餅焗到好脆   係無可能包到雞囉   所以要分開食   哈哈

( 4-MAR-2021  THU )

里奧大人今日 WFH   又陪我食早餐   開心開心 ~

今朝凍咗呀   因為我沖完熱水涼都覺得凍 ~

菇場忙呀   真係無停過手 ~

Lunch Time 要幫里奧大人配鎖匙   搞掂即番菇場喇   落毛毛雨好煩呢 ~

阿齋好搞笑㗎   次次聽到同睇到人哋食酸辣米線   佢就勁羨慕   今日阿花就係食酸辣米線   之後爽又話要食   個個都引佢   我話我唔食都要買嚟擺呀   等妳可以聞下  佢哋即刻話我夠哂賤呀   哈哈 ~

咁我一坐埋位   阿齋以為我真係買咗米線   我話唔啦   今朝好飽   食唔落米線呀 ~

到阿爽買完番嚟   無耐阿花又番埋   但佢哋唔同時間落去㗎   咁我話等妳可以聞耐啲囉   不過佢話我唔可以出聲   因為我無買呀   哈哈 ~

收埋對手仔

之後話咁快瞓着

仍然忙爆呀   所以好快放工 ~

番到屋企即預備   今晚煮新嘢   要多啲時間預備   哈哈 ~

是日懶餐 - 墨西哥雞肉卷餅

墨西哥雞肉卷餅 - 卷餅 3 月到期   我想快啲食埋去囉   咁屋企有雞扒   又早兩晚醃定   配料只係加咗京蔥同青瓜   因為我想有爽爽脆脆嘅口感呢   但牛油果他他醬陣味好難頂   一開成陣格甩底味   嗰一刻真係好想即掉   但我覺得廿幾蚊一樽仔好貴   都係留番囉   哈哈 ~

洗埋碗就沖涼   之後睇電視喇 ~

我有啲喉嚨痛   唔知係咪晏晝食咗芝士餅   咁里奧大人又話喉嚨有啲唔舒服   要飲啤酒   咁我都飲兩啖喇   無耐真係好好多喎   唔通個墨西哥餅熱氣 ?!   我白鑊烘熱咋喎 ~

今晚 11 點唔夠都瞓先喇   里奧大人就繼續睇 Youtube ~

香蔥鯪魚餅 + 七味粉豆腐 + 金銀蛋菠菜 ( 3-MAR-2021 )

( 3-MAR-2021  WED )

感恩一覺瞓天光呀   起身完全係好精神   又係嗰句   一星期有五日係咁就好喇   哈哈 ~

早餐仍然食奶醬多   好味好味 ~

菇場唔忙   係時候清埋啲唔想清嘅嘢 ~

同 8 卦 Skype   我係咪都會話鬼佢先   但有時又會讚下佢   我話發覺佢都有好人嘅時候   佢即問佢做過啲咩同幾時嘅事 ?!   我答佢話: 你唔番嘅時候   哈哈哈哈 ~

Lunch Time 行咗 15 分鐘就即買 Lunch   因為條街真係好凍   最衰自己無着外套啦 ~

阿齋以為我又食酸辣米線   佢話我今朝好怪咁望佢喎   我話想望下啲靚嘢嘛   佢話唔信   我話又要問人   但講真話又唔信   哈哈 ~

又要做長命 Report 呀   真係好怕對數字   對到眼瞓 ~

放工即走   里奧大人話今晚會遲啲放工   所以我去超市買嘢 ~

咁我排隊比錢   但突然暈一暈咁   所以我唔敢郁   但之後見到有個阿婆企喺我隔離   仲企我前面少少   擺明想打尖   不過見佢得一樣嘢就算   但我加句下次唔該排隊   最憎呢啲人 ~

番到屋企浸好菜   之後里奧大人 7 點打嚟話叫我食先   驚我餓   因為要好晏走   咁我即問幾點走得啦 ?!   佢話半個鐘頭後   我話等埋啦   反正我唔餓 ~

本身諗住煎好哂啲嘢   等里奧大人番嚟就焗熱去   但諗諗下即係要做多樣   所以等埋佢先煮好過   哈哈 ~

里奧大人終於 7 點 40 分先放工   我都要即預備喇   我話今晚食完飯先好沖涼   因為唔想等   不過佢好彩   佢番到嚟都未有得食   可以沖涼   哈哈 ~

今晚煮一個辛辣麵 Share 食   里奧大人不知幾開心   都唔明點解食麵會咁開心囉 ~

是日晚餐 - 香蔥鯪魚餅 + 七味粉豆腐 + 金銀蛋菠菜

香蔥鯪魚餅 - 好有心機煎   特登煎到四面都脆卜卜   所以之後隻左手勁痛啦   因為我用鑊鏟將佢哋固定   煎咗好耐呢 ~

七味粉豆腐 - 呢碟就無心機煎   哈哈   所以加七味粉搭夠   因為全部白雪雪咁   真係好似無煎過咁㗎 ~

金銀蛋菠菜 - 好耐無食菠菜   又買嚟食下   諗住就咁鹹蛋   但感恩原來屋企仲有隻皮蛋   咁就可以金銀蛋喇 ~

洗埋碗再大清潔廚房   之後即沖涼喇   今晚好趕   因為我要睇 "陀槍師姐"呀 ~

7 點幾就瞓到咁

之後又瞓落張毯度

里奧大人幫我按左手   真係舒服好多   呢排唔係左手痛就右手痛   麻鬼煩 ~

今晚睇埋新聞   又 11 點幾先瞓 ~

水餃雲吞拚蝦滑 & 炸魚皮 (外賣) ( 2-MAR-2021 )

( 2-MAR-2021  TUE )

今朝覺得涼咗   好似下星期又凍呀 ~

早餐食好味嘅奶醬多   哈哈哈哈 ~

好似好細隻咁

菇場忙呀   仲要係煩嘢 ~

Lunch Time 同 8 卦一齊去拎酸辣米線   佢之前打電話叫定   所以去到即刻可以拎走   但我其實唔太餓   之得自己行陣先再買啦   哈哈 ~

今日去另一間涼茶舖買雞骨草   飲完個人好似舒服好多咁喎 ~

仍然忙   肥仔豪啲嘢比較複雜   佢越講得清楚反而令我更亂   其實佢講兩句   我就可以好輕鬆搞掂囉 ~

咁我好專心做嘢   肥仔豪細細聲叫我   我嚇到彈一彈起身   之後佢個樣都唔好意思   佢仲話今日佢好麻煩   因為佢今日搵咗我好多次呀   哈哈 ~

真係忙到 5 點 20 分   但好充實   日日係咁都唔錯   之前比較得閒   個人反而攰啲咁㗎 ~

里奧大人 5 點半打比我   話改今晚開會   不過唔緊要   反正我都諗住買水餃 ~

我去買菜   阿哥背住我問阿姐要咩嘢菜 ?!   我話要西蘭花   之後佢見到我就係咁笑住話: 嘻嘻嘻嘻   妳係靚女唔係阿姐   嘻嘻嘻嘻   我覺得佢好恐怖囉   同埋你讚我靚唔靚都無所謂啦   都戴咗口罩   最緊要係啲菜靚就得㗎喇   不過佢解釋咗西蘭花點解兩種色之後   我即轉買菠菜   哈哈 ~

去埋買水餃同 2 包無激素雞翼同大半磅急凍牛板腱就即番屋企   放哂所有嘢就拖地   之後就預備晚餐 ~

里奧大人 7 點幾先番到屋企   沖埋涼食埋晚餐   食完抖陣都差唔多預備開會 lu ~

咁我煮嘢期間   里奧大人話講樣搞笑嘢我知   話原來係佢記錯開會時間   其實不嬲都係今晚開喎   佢仲話自己寫低係星期二開會   咁做咩同我講星期三呀 ~

是日懶餐 - 水餃雲吞拚蝦滑 & 炸魚皮 (外賣)

水餃雲吞拚蝦滑 - 里奧大人鍾意食蝦滑   所以又買 $20 (4 兩) 比佢食   今晚用昆明旺 C 墊底   我問菜檔旺 C 係咩   佢話類似娃娃菜   只係 $10/斤   我用嚟做湯底都唔錯   不過我都會食埋啲菜㗎 ~

炸魚皮 - 唔想食薯片咁就食炸魚皮   浸腍無咁熱氣   哈哈 ~

洗埋碗就沖涼   之後開機洗衫 ~

真係好邪   尋晚同里奧大人講話唔想同邊個食飯   點知佢今朝 Whatsapp 約我食飯   我同里奧大人講話即係要鍾意番佢喇   點知里奧大人聽錯話要拒絕佢 ~

咁我話我不嬲係記仇㗎喎   里奧大人即話我有樣好   知道自己記仇   哈哈 ~

8 點半準時開會   9 點半開完   我覺得算快喇 ~

里奧大人 11 點唔夠都瞓   我就 11 點幾先瞓   因為好想打機   哈哈 ~

蝦仁豆腐蒸蛋 + 鹹魚蓉蒸節瓜粒 ( 1-MAR-2021 )

( 1-MAR-2021  MON )

今朝又潮潮濕濕   加上星期一   真係特別攰   哈哈 ~

早餐食芝腿治烘底   好想食濃味嘢呀 ~

3 月新開始

菇場唔太忙   但好攰   好在 8 卦都唔忙   可以傾偈   因為我都有啲眼瞓 ~

我同 8 卦講話潮濕天氣影響   所以個人好攰   佢話關事咩 ?!   我話春天潮濕   個人真係特別攰㗎喎   我都好少成日話攰啦   之後我話佢係咪因為日日都攰同眼瞓   所以唔覺春天呢啲潮濕日子先有呢 ?!   講完比佢鬧   哈哈   講中咗佢呀 ~

Lunch Time 出去一田買餅乾比里奧大人拎番公司   之後就買鯪魚球米番菇場食 ~

無啦啦又勁忙   真係令人情緒緊張   哈哈   好在兩個鐘就搞掂哂 ~

放工即走   番到屋企即預備晚餐喇 ~

是日懶餐 - 蝦仁豆腐蒸蛋 + 鹹魚蓉蒸節瓜粒

蝦仁豆腐蒸蛋 - 今晚煮新嘢呀   依家上網學煮餸真係好方便    不過都係學簡單嘢   材料只係 2 條玉子豆腐 + 2 隻雞蛋 + 急凍蝦仁   放落鑊蒸就可以   簡單快捷又好味 ~

鹹魚蓉蒸節瓜粒- 唔想飲湯   所以加鹹魚蓉蒸   因為我好想食鹹魚呀 ~

食完就洗碗喇   之後沖涼休息   今晚煮完飯都好攰   所以全程坐喺梳化睇電視 ~

可瑞安朱古力夾心批 ($16.5) / 樂天檸檬綠茶味朱古力批 ($29.9) / 樂天蜜糖味窩夫 ($13.9)

我試咗檸檬綠茶朱古力批   我同里奧大人講話得 Cream 無麻糬嘅 ?!   佢問番我邊度寫係麻糬 ?!   我話朱古力中間嗰 Pat 唔係咩 ?!   唉   我其實無睇清楚價錢牌寫咩   以為係麻糬咋

電視劇情節話隻狗食物中毒   問主人隻狗食咗啲咩 ?!   里奧大人好大反應話   如果我食物中毒就死喇   因為我成日係咁食食食   食咁多嘢   都唔知道我食過啲咩嘢中毒喎   真係大吉利是過佢呀   哈哈 ~

里奧大人就熨衫   佢要連熨 3 機衫   其實都攰架   有次我洗衫   佢話又洗 ?!   之後我話又唔係你洗   佢話洗完佢要熨呀   哈哈 ~

今晚 11 點幾都瞓喇   但又唔係話特別眼瞓咁喎 ~