綠豆糭 + 南瓜粟米紅蘿蔔豬骨湯 ( 17-JUN-2012 )

( 17-JUN-2012  SUN )

9 點 15 分起身   食完早餐番主日學喇 ~

里奧大人要做公司嘢   所以唔番崇拜   番到屋企佢即瞓覺   鬼咩   尋晚 12 點幾先瞓   今朝又早起身 ~

我就去買餸   番到屋企抹下嘢執下嘢   差唔多 2 點就陪家姐買熨斗   睇啱就叫里奧大人落嚟幫下眼   同埋簽卡儲分   不過無貨   所以去另一間   好感恩有貨又有折   家姐超級勁愛紫色   凡係紫色都覺得好靚   咁啱買嘅熨斗係紫色   但原來要新款嘅得藍色   里奧大人一睇到個盒喺藍色就即刻問 Sales 有無紫色   我同家姐都好愕然佢問得咁快   算佢啦   成日記得家姐鍾意紫色 ~

買完去大快活食 Tea   因為家姐好想食雞肶   食完陪我去買鞋買銀包   佢仲買咗件衫   點知臨比錢時先知睇錯對鞋嘅價錢   所以我唔買喇   其實訂咗貨咋   之後個 Sales 態度差到不得了   但收錢嗰個又態度好好   不過我都決定要投訴個 Sales 呢 ~

上到屋企   里奧大人幫家姐 Download 歌   又教佢熨衫   我就入廚房煲湯喇   家姐 5 點鐘走人   我就即沖涼呀   超熱 ~

是日懶餐 - 綠豆糭 + 南瓜粟米紅蘿蔔豬骨湯

綠豆糭 - 姑奶同朋友一齊包㗎   好煙韌   我最鍾意食煙韌嘅嘢    不過有隻有頭髮   有隻鹹蛋係臭嘅   好嘔心囉 ~ 

南瓜粟米紅蘿蔔豬骨湯 - 材料有 1 個中國南瓜 + 3 條細粟米 + 2 條甘筍 + $30 豬骨   點知開大火半個鐘   懶去轉細火   10 分鐘後入廚房聞到燶味   好在唔係全濃   太耐無煲南瓜湯喇   唔記得南瓜係咪會出水   所以比咗好少水   因為我好驚啲湯無味   好在飲嘅時候無燶味咋   感恩 ~