星林居雲南米線餐廳 @ 尖沙咀 ( 7-JUN-2012 )

魚腐小鍋米線 ( 中辣 )

( 7-JUN-2012  THU )

尋晚成 12 點先瞓   好在今朝又唔係話好眼瞓咋 ~

早餐想食濕嘢   但又唔想太飽   所以就要少通粉喇   份量啱啱好 ~

會計部啲人成日做唔長   所以依家好多都係 Part Time   有個番全日   有 2 個番半日   其實 Part Time 番半日都幾好   我以前都好想番半日   之後大把時間用   依家攰嘅時候就會咁諗   成日想番屋企瞓嘛   但諗深一層又唔會想咁   第一因為 Part Time 唔能夠享用公司嘅福利   第二我放工後會好想搵屋企人食飯   啲錢會好快會所剩無幾   第三會喺屋企開冷氣睇電視同上網   應該會入不敷支了   第四依家里奧大人咁夜番   想煲老火湯佢潤下   佢都唔會飲啦   種種原因都係覺得番全日好好多呢 ~

今日食 Lunch Box 係少飯   所以無飯氣攻心   正呀 ~

放工即走   因為趕住睇中醫   今次做埋針灸   吉 6 枝針喺腰   吉嗰下酸酸軟軟   不過吉完又無嘢   最緊要我睇唔到   咁都無咁驚   但成日唔敢抖大氣   因為好驚啲針彈咗出嚟呀   其實唔知會唔會咁嘅呢 ~

好感恩 7 點 45 分搞掂   咁即打比里奧大人   不過佢 5 點幾見完客先同同事去南記食完嘢   原來佢個女 Director 話有間粉麵好好食   所以帶佢哋一齊去   但估唔到就係南記   女 Director 仲話嚟南記食係因為佢嘅辣醬 & 冬菜   果然志同道合   不過里奧大人只係獨孤一味春卷豬腩肉小鍋米線   我唔食冬菜   覺得好鹹   反而家姐就鍾意冬菜 + 辣醬   就係咁   令到我想食酸辣米線   反正里奧大人又唔知幾時放工   佢又話飽   咁我睇完中醫即去星林居食米線喇 ~

路盲果然係路盲   我都間唔中去星林居家嘛   點知今次自己一個人去   行錯路   兜咗個大圈添   嗰下有啲驚去咗碼頭   真係好怕夜晚自己一個人去街呢 ~

食完搭 13X 番屋企   沖完涼諗住抖   不過又忍唔住熨衫   里奧大人差唔多 10 點就番到屋企   傾下傾下又 11 點   我要瞓喇 ~