稻香 @ 九龍灣 ( 14-JUL-2015 ) (禁)

深海龍躉兩味 - 清蒸頭腩  

碧綠炒球

蒜蓉蒜扇貝 - 唔掂啦   Overcook 

賽鎊蟹

燒鵝 (例)

鐵鍋瑞士醬油雞 - 今次個色唔靚

芝士珍寶蝦球伊麵 - 個汁好鹹

海皇白玉冬瓜盅 - 完全無味   又無料   得幾條蟹柳

( 14-JUL-2015  TUE )

今朝里奧大人 8 點半要跟車上大陸見客   所以 6 點半起身   咁可以番公司附近食早餐   唔駛咁趕   好在鬧鐘響咗之後   我都瞓得番 ~

我成日同里奧大人講   如果佢上大陸   我會有壓力   驚鬧鐘唔響   今朝我 7 點 55 分諗住出門口   點知里奧大人打嚟   驚我唔知醒   仲話之前打過比我   不過無人聽   因為我沖緊涼嘛 ~

食完哂早餐   諗住睇報紙   8 卦又話嚟   咁啱幫佢叫早餐嘅時候   原來阿爽都喺度   咁一齊坐啦   咁啱我嗰邊位好迫   同爽一齊坐 4 人枱就最好啦 ~

菇場唔忙   可以繼續做自己嘢 ~

咁 8 卦問我食咩 ?!   諗住食炒米粉同咖哩魚蛋   之後我又話想食榨菜   所以佢話一齊去買車仔麵 ~

食完超級勁勁飽   差唔多 4 點   見到 8 卦食個腸仔包   佢話唔想留過夜   我話食到先得㗎   我仲係超級飽囉 ~

里奧大人見完客就番公司   咁都好   今晚唔駛咁夜 ~

放工即走   點知反而要等車   係咪咁邪先 ~

去到醫院都要 6 點 15 分喇   見到姑娘即問媽咪情況   今日氧氣降到 2 度   心臟又無咁快   所以唔駛打心臟藥水   肺片都無問題   只不過未咁快清到哂   所以都要住多幾日   叫我唔好擔心   真係好耐無聽姑娘叫我唔好擔心喇   不過都好體諒佢哋   自己住過政府同私家醫院   政府醫院人手真係唔夠   真係講多句都唔得㗎   因為手頭上好多嘢做呢 ~

媽咪隔離個阿婆終於出院   咁就好喇   因為佢都 101 歲   其實唔知自己做咩   所以成日好大聲講嘢   係真係好大聲   媽咪無覺好瞓   不過我嚟到醫院   媽咪又瞓   其實我想話   如果妳瞓   我就唔嚟   無咩意思   但佢又真係眼瞓喎 ~

家姐 7 點到喇   之後傾下偈   7 點 45 分都一定要走喇   我約咗里奧大人屋企人食飯呢 ~

里奧大人嘅廣州大表姐 & 姐夫今日嚟香港   諗住今晚走   但佢想探 2 姑奶   所以打比佢   約埋一齊食飯呢 ~

食下傾下   估唔到又好好傾喎   可以我實在太鍾意講嘢   最搞笑   同個表姐傾傾下偈   無啦啦佢好怕羞咁同我講   話我好靚呀   皮膚好靚又成日笑   嗰下我比唔切反應   只話佢心地好啦   哈哈 ~

差唔多 10 點就走啦   送埋姑拉搭的士就番屋企喇 ~

沖埋涼   睇下電視   差唔多 12 點先瞓呀 ~