腐乳雞絲炒飯 + 蠔油燜節瓜 + 蕃茄薯仔魚湯 ( 28-JUL-2015 ) (禁)

( 28-JUL-2015  TUE ) 

尋晚瞓得唔錯   實在太開心喇 ~

早餐食芝蛋治走牛油   無咁滯呢   但都係一樣咁飽   哈哈 ~

菇場無哂大粒   8 卦又上大陸   真係勁正   唔駛成日比人昅住哂 ~

今日帶 Lunch Box 嘛   阿爽同阿齋話好香呀   話搞到佢哋今晚都想食蝦   其實又真係喎   我聞到好香嘅嘢都好想即晚整   如果啲嘢易整嘅話   哈哈 ~

無啦啦飯氣攻心   加上成日整相   對眼真係好鬼攰 ~

放工先嚟落雨   不過好在係過雲雨   同埋太陽又未落山   我同同事都覺得好似 Lunch 出去食飯   唔似放工呢 ~   

幫里奧大人買完包就即番屋企   諗住整兩樣嘢都好快搞掂就去徑步啦   點知唔醒起要滾湯添   所以突然間覺得好趕咁 ~        

7 點半自己開餐先   因為我只係飲湯食節瓜   同埋之前食剩嘅 2 條粟米   之後里奧大人打嚟話放工   咁好啦   等埋佢食完再一齊徑步 ~     

是日晚餐 - 腐乳雞絲炒飯 + 蠔油燜節瓜 + 蕃茄薯仔魚湯  

腐乳雞絲炒飯 - 唔想成日焗雞扒   好似好悶咁   所以用嚟炒飯   加咗 3 件腐乳都無咩味咁   下次都係加少少豉油   好似會好味啲 ~     

蠔油燜節瓜 - 唔浸菜就會煮節瓜   最緊要夠快   同埋我要清哂啲蠔油呀 ~ 

蕃茄薯仔魚湯 - 今次仍都係 2 個薯仔 + 5 個細蕃茄 + 2 條紅衫魚   今次嘅紅衫魚係 $25/份   今次又係好好飲呀   好開心呢 ~

搞掂哂   諗住 9 點一齊去徑步   不過里奧大人話好飽   所以唔徑   咁好啦   我都唔徑喇   我都有啲攰攰哋 ~

沖埋涼   又睇 "急診男女"   呢套係家姐叫我睇嘅   咁我又心急想知主角嘅關係   咁即打比家姐問啦   估唔到佢又記得啲劇情喎   之後佢個勢好似想繼續講咁   我話唔好講   我要自己睇   之後佢話又要問人又叫人唔好講   哈哈 ~

睇到 11 點幾要瞓喇   難得瞓到呢 ~